မြန်မာနိုင်ငံမှာရင်းနှီးမြှုပ်နှံကြဖို့ ဒေါ်အောင်ဆန်းစုကြည် တိုက်တွန်း

ပြင်သစ်သမ္မတသစ် Francois Hollande ဖရန်စွာ ဟိုလန်နဲ့ ပါရီမြို့ သမ္မတအိမ်တော်မှာ ကျင်းပတဲ့ ပူးတွဲ သတင်းစာရှင်းလင်းပွဲမှာ အဲဒီလို ပြောကြားလိုက်တာပါ။

ဒီ သတင်းစာရှင်းလင်းပွဲမှာ မြန်မာနိုင်ငံ ဒီမိုကရေစီ အသွင်ပြောင်း လဲနိုင်ဖို့ အရေးကြီးတဲ့အကြောင်း ဒေါ်အောင်ဆန်းစုကြည်က ပြောကြား ခဲ့တယ်လို့ ပြင်သစ်နိုင် ငံရောက် မြန်မာလူမျိုးများအဖွဲ့ တာဝန်ခံ ဦးထင်ကျော်က အခုလို ပြောပါတယ်။

"ဒေါ်အောင်ဆန်းစုကြည် ပြောသွားတာကတော့ ဗမာပြည်ရဲ့ ဒီမိုကရေစီအရေး ပြောင်းလဲမှုဟာ ပထမအနေနဲ့ အရေးကြီးတယ်။ အဲဒီနောက်မှာ ဒီစီးပွားရေး၊ လူမှုရေး နောက်ကနေပြီး တပါတည်း ဖြစ်ဖို့ သင့်တော်တယ်။ ဒါကြောင့်မို့လို့ ဒီမိုကရေစီ ပြောင်းလဲရေးဟာ ပထမဆုံးဦးဆုံး အနေနဲ့ အရေးကြီးတယ်ဆိုတဲ့ အကြောင်း ပြောသွားပါတယ်"

ရေနံ၊တွင်းထွက်သတ္တု စတဲ့ သယံဇာတတွေထုတ်ယူတဲ့ ရင်းနှီးမြှုပ်နှံရေး လုပ်ငန်းတွေနဲ့ အထွေထွေ စီးပွားရေးလုပ်ငန်းတွေမှာ ဘဏ္ဍာရေးနဲ့ ပတ်သက်လို့ ပွင့်လင်းပြီး ထင်သာမြင်သာဖြစ်ဖို့ မရှိမဖြစ် လိုအပ်တယ်လို့ ဒေါ်အောင်ဆန်းစုကြည်က ပြောပါတယ်။

သမ္မတ Francois Hollande ဖရန်စွာဟိုလန် ကလည်း မြန်မာနိုင်ငံ ဒီမိုကရေစီ အသွင်ပြောင်းရေး ကဏ္ဍမှာ ပါဝင်သူတွေအားလုံး ကို ပြင်သစ်နိုင်ငံက ထောက်ခံမယ်လို့ ပြောကြားပြီး၊ မြန်မာ သမ္မတ ဦးသိန်းစိန် ပြင်သစ်နိုင်ငံကို လာရောက်လည်ပတ်မယ် ဆိုရင် ကြိုဆိုဖို့ အသင့်ရှိတယ်လို့ ပြောဆိုလိုက်ပါတယ်။

ဒေါ်အောင်ဆန်းစုကြည်ဟာ ဥရောပတိုက် နောက်ဆုံး ခရီးစဉ် အဖြစ် ပြင်သစ်နိုင်ငံ ပါရီမြို့ကို ဗြိတိန်နိုင်ငံ လန်ဒန်မြို့ကနေ ရထားနဲ့ ရောက်ရှိခဲ့တာပါ။ ပြင်သစ်မှာ သုံးရက်ကြာ နေထိုင်ချိန် အတွင်း ပြင်သစ်နိုင်ငံခြားရေး ဝန်ကြီးနဲ့ တခြား ထိပ်တန်း တာဝန် ရှိသူတွေနဲ့ တွေ့ဆုံမှာ ဖြစ်ပါတယ်။

ဒါ့အပြင် ဒေါ်အောင်ဆန်းစုကြည်ဟာ ပြင်သစ်နိုင်ငံရောက် မြန်မာအသိုင်းအဝိုင်းနဲ့ ဒီနေ့ မနက် ၉ နာရီကနေ ၁၁ နာရီအထိ တွေ့ဆုံမှာဖြစ်ပြီး၊ လူ့အခွင့်အရေး အဖွဲ့တွေနဲ့လည်း တွေဆုံဖို့ စီစဉ်ထားတယ်လို့ သိရပါ တယ်။

ဒေါ်အောင်ဆန်းစုကြည်နဲ့ ပြင်သစ်သမ္မတတို့ရဲ့ ပူးတွဲသတင်းစာ ရှင်းလင်းပွဲအကြောင်း ဒေါ်စမ်းစမ်းတင်က ကောက်နှုတ် တင်ပြ မှာ ဖြစ်ပါတယ်။

	ကောက်နှုတ်တင်ပြချက်။
	အသံဖိုင်ယူရန်။