ဒေါ်အောင်ဆန်းစုကြည်နဲ့ ဦးအောင်ကြည် ၄ ကြိမ်မြောက် တွေ့ဆုံ

ဒီကနေ့ တွေ့ဆုံရာမှာ လွတ်လပ်စွာ ကုန်သွယ်ခွင့်နဲ့ ငွေကြေး လည်ပတ်ခွင့်၊ နိုင်ငံရေးအကျဉ်းသား လွတ်ငြိမ်းချမ်းသာခွင့် အပါအဝင် ပြည်တွင်းငြိမ်းချမ်းရေး ရရှိဖို့ ကိစ္စတွေ ဆွေးနွေးခဲ့ကြတယ်လို့ တရားဝင် သတင်းထုတ်ပြန်ခဲ့ကြောင်း အမျိုးသား ဒီမိုကရေစီအဖွဲ့ချုပ် ပြန်ကြားရေး တာဝန်ခံ ဦးအုန်းကြိုင်က အာအက်ဖ်အေကို ပြောပါတယ်။

နှစ်ဘက် ဆက်လက်တွေ့ဆုံ ဆွေးနွေးသွားဖို့လည်း သဘောတူညီခဲ့ကြ တယ်လို့ သတင်းထုတ်ပြန်ချက်မှာ ဖော်ပြထားပါတယ်။

အမျိုးသား ဒီမိုကရေစီအဖွဲ့ချုပ် အနေနဲ့ ပါတီ မှတ်ပုံတင်မယ့် ကိစ္စကို နိုင်ငံရေးပါတီဆိုင်ရာ ဥပဒေသစ် တရားဝင် ထွက်လာပြီးမှသာ အစည်းအဝေး ခေါ်ယူပြီး အများသဘောတူ ဆုံးဖြတ်မှာ ဖြစ်တယ်လို့ ဒေါ်အောင်ဆန်းစုကြည်က ဆွေးနွေးပွဲအပြီး သတင်းထောက်တွေနဲ့ တွေ့ဆုံရာမှာ ပြောဆိုခဲ့တယ်လို့ သိရပါတယ်။

ဒေါ်အောင်ဆန်းစုကြည်နဲ့ ဦးအောင်ကြည်တို့ဟာ စိမ်းလဲ့ကန်သာ အစိုးရဧည့်ဂေဟာမှာ တွေ့ဆုံခဲ့ပြီး တနာရီနီးပါး ဆွေးနွေးခဲ့ကြတာပါ။ အခု တွေ့ဆုံမှုဟာ သမ္မတဦးသိန်းစိန် အစိုးရလက်ထက်မှာ (၄) ကြိမ်မြောက် တွေ့ဆုံတာလည်း ဖြစ်ပါတယ်။