စစ်ရာဇဝတ်မှုတွေ စစ်ကောင်စီ ကျူးလွန်နေကြောင်း AA ပြော

စစ်ကောင်စီက တိုက်ပွဲနဲ့မသက်ဆိုင်တဲ့ အရပ်ဘက်နေရာတွေကို ဦးတည်ပစ်ခတ် တိုက်ခိုက်နေပြီး စစ်ရာဇဝတ်မှုတွေ ကျူးလွန်နေတယ်လို့ ရက္ခိုင့်တပ်တော် (AA) က မေ ၁၅ ရက်နေ့မှာ သတင်းထုတ်ပြန်ပါတယ်။

မေ ၁၄ ရက်နေ့ညက ရခိုင်ပြည်နယ် ကျောက်တော်မြို့နယ် ဝဲကြီးထောင့်ရွာ ဆေးရုံ နဲ့ စာသင်ကျောင်း ဗုံးကြဲတိုက်ခိုက်ခံရတာနဲ့ပတ်သက်ပြီး AA က သတင်းထုတ်ပြန်တာဖြစ်ပါတယ်။

စစ်ကောင်စီ ကျူးလွန်ထားတာတွေကို နိုင်ငံတကာအဖွဲ့အစည်းတွေဆီ ပေးပို့သွားမယ်လို့လည်း AA က ဆိုပါတယ်။

ဝဲကြီးထောင့်ရွာ ဆေးရုံကို စစ်ကောင်စီက ဂျက်တိုက်လေယာဉ်နဲ့ ဗုံးကြဲတိုက်ခိုက်ခဲ့တာကြောင့် ဆေးရုံတစ်ခုလုံးနီးပါး ပျက်စီးဆုံးရှုံးခဲ့ပြီး ဆေးဝန်ထမ်း၊ လူနာနဲ့ လူနာစောင့် အရပ်သား စုစုပေါင်း အယောက် ၂ဝထက်မနည်း ထိခိုက်ဒဏ်ရာရရှိခဲ့သလို သေဆုံးသူတချို့ရှိတယ်လို့လည်း ထုတ်ပြန်ချက်မှာ ဖော်ပြထားပါတယ်။ သေဆုံးသူအရေအတွက်ကိုတော့ ဖော်ပြမထားပါဘူး။ ဒဏ်ရာရသူတွေထဲ ငါးဦးက စိုးရိမ်ရတယ်လို့ ဆိုပါတယ်။

ရခိုင်ပြည်နယ်တွင်း တိုက်ပွဲတွေမှာ ရှုံးနိမ့်နေတဲ့ စစ်ကောင်စီက လူမျိုးရေးအမုန်းတရားတွေကို အခြေခံပြီး တိုက်ပွဲနဲ့မသက်ဆိုင်တဲ့နေရာတွေကို ဦးတည်တိုက်ခိုက်နေတာဟာ စစ်ရာဇဝတ်မှုကို ကျူးလွန်နေတာလို့ စွပ်စွဲထားပါတယ်။

ဒီတိုက်ခိုက်မှုနဲ့ပတ်သက်ပြီး ဒေသခံတစ်ဦးက တိုက်ပွဲဖြစ်တာမရှိဘဲ စစ်ကောင်စီက ဗုံးသုံးလုံးကြဲချခဲ့တာလို့ RFA ကို ပြောထားပါတယ်။

ဒီအခြေအနေနဲ့ပတ်သက်ပြီး စစ်ကောင်စီ ပြောခွင့်ရသူ ဗိုလ်ချုပ်ဇော်မင်းထွန်းကို RFA က တယ်လီဖုန်းနဲ့ ဆက်သွယ်ပေမဲ့ဖုန်းမဖြေပါဘူး။