စစ်ကောင်စီ တပ်ရင်းနှစ်ခုကို တစ်ရက်တည်းသိမ်းပိုက်ခဲ့ကြောင်း AA အဖွဲ့ထုတ်ပြန်

ရခိုင်ပြည်နယ် မြောက်ဦးမြို့မှာ စစ်ကောင်စီတပ်က အခိုင်အမာ တည်ဆောက်ထားတဲ့ ခမရ - ၅၄၀ တပ်ရင်းနဲ့ ကျောက်တော်မြို့အခြေစိုက် ခမရ - ၃၇၄ တပ်ရင်းနှစ်ခုကို ဇန်နဝါရီလ ၃၀ ရက်နေ့က အလုံးစုံသိမ်းပိုက်ခဲ့ကြောင်း ရက္ခိုင့်တပ်တော်(AA) က မနေ့ညက ထုတ်ပြန်ပါတယ်။

အဲဒီ ခမရ - ၅၄၀ တပ်ရင်းဟာ မြောက်ဦးမြို့ ပြည်သူလူထုနဲ့ ယဉ်ကျေးမှု အမွေအနှစ်တွေကို ဒုက္ခပေးဖျက်ဆီးနေတဲ့ တပ်စခန်းတစ်ခု ဖြစ်တယ်လို့လည်း ထုတ်ပြန်ချက်မှာပါရှိပါတယ်။

နောက်ထပ် ကျန်ရှိနေတဲ့ မြောက်ဦးမြို့အခြေစိုက် ခမရ - ၃၇၇၊ ခမရ- ၃၇၈ တပ်ရင်းတွေကိုလည်း တစ်ပြိုင်နက် ထိုးစစ်ဆင် တိုက်ခိုက်နေတယ်လို့လည်း ဆိုပါတယ်။

အလားတူ ဇန်နဝါရီ ၃၀ ရက်နေ့မှာပဲ ကျောက်တော်မြို့အခြေစိုက် ခမရ - ၃၇၄ တပ်ရင်းကို ရက္ခိုင့်တပ်တော် (AA) က ဆက်လက်သိမ်းပိုက်ခဲ့သလို ဇန်နဝါရီလ ၂၈ ရက်နေ့ကလည်း မင်းပြားမြို့အခြေစိုက် ခမရ - ၃၈၀ တပ်ရင်းကို သိမ်းပိုက်ခဲ့တယ်လို့ ထုတ်ပြန်ချက်မှာဖော်ပြထားပါတယ်။

လက်ရှိမှာတော့ မြောက်ဦး၊ မင်းပြား၊ ကျောက်တော်၊ ရသေ့တောင်၊ ပုဏ္ဏားကျွန်းနဲ့ ရမ်းဗြဲမြို့နယ်တွေမှာ တိုက်ပွဲပြင်းထန်နေဆဲဖြစ်ပြီး စစ်ကောင်စီတပ်ကလည်း တပ်စခန်းတွေမကျဖို့ လေကြောင်း၊ ရေကြောင်းနဲ့ လက်နက်ကြီးပစ်ကူတွေပေးပြီး ခုခံကာကွယ်နေသလို စစ်အင်အားနဲ့ လက်နက်၊ ခဲယမ်းတွေလည်း အများအပြား ဖြည့်တင်းနေတယ်လို့ဆိုပါတယ်။

ရမ်းဗြဲမြို့မှာတော့ နှစ်ဖက်တိုက်ပွဲ ပြင်းထန်နေပြီး စစ်ကူလာတဲ့ စစ်ကောင်စီတပ်ဖွဲ့တွေကို ရက္ခိုင့်တပ်တော် (AA) က မနေ့က ကြားဖြတ်တိုက်ခိုက်ရာမှာ စစ်ကောင်စီ တပ်သားအလောင်းတွေနဲ့ လက်နက်ခဲယမ်းတချို့ သိမ်းပိုက်ရရှိခဲ့တယ်လို့လည်း ထုတ်ပြန်ချက်မှာပါရှိပါတယ်။

ပုဏ္ဏားကျွန်းမြို့နယ်မှာလည်း ဇန်နဝါရီလ ၃၁ ရက် မနေ့က အချိန်တစ်နာရီခန်ကြာ တိုက်ပွဲဖြစ်ပွားခဲ့ပြီး အထိနာခဲ့တဲ့ စစ်ကောင်စီတပ်ဖွဲ့ဝင်တွေဟာ ပုဏ္ဏားကျွန်းမြို့နယ် ဆားကုန်ဘုတ်ရွာကို ရည်ရွယ်ချက်ရှိရှိ ရွာလုံးကျွတ် မီးရှို့ဖျက်ဆီးသွားခဲ့တယ်လို့လည်းဆိုပါတယ်။

ဒီကိစ္စတွေနဲ့ပတ်သက်လို့ စစ်ကောင်စီဘက်က တစ်စုံတစ်ရာထုတ်ပြန်တာမ ရှိသေးပါဘူး။ ရခိုင်ပြည်နယ် စစ်ကောင်စီပြောခွင့်ရ ပြည်နယ်ဥပဒေချုပ် ဦးလှသိန်းကိုလည်း RFA က ဆက်သွယ်ခဲ့ရာမှာလည်း ဖုန်းစက်ပိတ်ထားတာကြောင့် ဆက်သွယ်လို့မရခဲ့ပါဘူး။

ရခိုင်ပြည်နယ်မှာ စစ်ကောင်စီတပ်နဲ့ ရက္ခိုင့်တပ်တော် (AA) တို့ တိုက်ပွဲဖြစ်ပွားတာ အချိန်နှစ်လကျော်ရှိသွားပါပြီ။ ဒီနှစ်လတာအတွင်းမှာ ချင်းပြည်နယ် ပလက်ဝနဲ့ ရခိုင်ပြည်နယ် ပေါက်တောကို ရက္ခိုင့်တပ်တော် (AA) က အလုံးစုံသိမ်းပိုက်ခဲ့ပြီး ရခိုင်ပြည်နယ်အတွင်းမှာလည်း စစ်ကောင်စီရဲ့ တပ်ရင်းကြီးငါးရင်းနဲ့ ဗျူဟာကုန်းတွေ၊ တပ်စခန်းတွေ အများအပြားကို AAက သိမ်းပိုက်ထားပါတယ်။