မြန်မာနှင့်မြောက်ကိုရီးယား၏ နျူကလီယားကိစ္စ တောင်ကိုရီးယား မေးမြန်းမည်

တောင်ကိုရီးယား ဒုတိယနိုင်ငံခြားရေးဝန်ကြီးဟာ သြဂုတ်လ ၁၉ ရက်နေ့က နေ ၂၁ ရက်နေ့အထိ မြန်မာ နိုင်ငံကို လည်ပတ်မှာ ဖြစ်ပါတယ်၊

မြန်မာစစ်အစိုးရအဖွဲ့ဝင်တွေနဲ့ တွေ့ဆုံတဲ့အခါ လာမယ့် ရွေးကောက်ပွဲဟာ လွတ်လပ် မျှတစေချင်ကြောင်း တောင်ကိုရီးယားအစိုးရရဲ့ စကားနဲ့အတူ သံသယဝင်စရာဖြစ်နေတဲ့ မြောက်ကိုရီးယား နဲ့မြန်မာ နျူကလီးယားကိစ္စ အကြောင်းလည်း ပြောဆိုမှာ ဖြစ်တယ်လို့ သိရပါတယ်၊

မိမိတို့အစိုးရဟာ မြန်မာနဲ့ မြောက်ကိုရီးယား နျူကလီးယားကိစ္စ အပါအဝင် စစ်ရေး ပူးပေါင်းဆောင်ရွက်မှုအပေါ် မျက်စိဒေါက်ထောက် ကြည့်နေတာ ဖြစ်ကြောင်း။ ဒီကိစ္စအပေါ် အမေရိကန်ပြည်ထောင်စုနဲ့ရော။ တခြားနိုင်ငံတွေနဲ့ပါ ပူးတွဲစုံစမ်းနေပေမဲ့ ခိုင်မာတဲ့ အထောက်အထား တစုံတရာ မတွေ့ရသေးကြောင်း။ ဒါပေမဲ့ မစ္စတာ ရှက်ကက်ဆူးဟာ မြန်မာပြည်ခရီးစဉ်အတွင်း ဒီကိစ္စပြောဆိုမှာဖြစ်ကြောင်း တောင်ကိုရီးယား နိုင်ငံခြားရေး ဝန်ကြီးဌာန ပြောခွင့်ရပုဂ္ဂိုလ်က ဆိုပါတယ်၊

တောင်ကိုရီယားနိုင်ငံ အင်အယ်လ်ဒီ (လွတ်မြောက်နယ်မြေ) သတင်းနဲ့ ပြန်ကြားရေးတာဝန်ခံ ဦးရန်နိုင်ထွန်းကတော့  အခုလို မှတ်ချက်ပြုပါတယ်။

“အဓိကတော့ များမကြာသေးခင်အချိန်ကမှ ဒီ မြောက်ကိုရီးယားရဲ့ ခေါင်းဆောင်ပိုင်းတွေကလည်း မြန်မာပြည်ကို သွားတယ်။ နောက် တောင်ကိုရီးယားအနေနဲ့က မြန်မာနိုင်ငံအတွင်းမှာ စီးပွားရေးဆိုင်ရာ ရင်းနှီးမြှုပ်နှံမှုတွေ ပြုလုပ်နေတယ်။ အဲဒီအတွက်ကြောင့်မို့လို့ မြောက်ကိုရီးယားနဲ့ မြန်မာနိုင်ငံနဲ့ အရမ်းကို ရင်းနှီးကျွမ်းဝင်သွားမှာ၊ နောက်တခုက ဒီ နျူကလီးယားဆိုင်ရာ စစ်လက်နက်တွေကို ဗမာနိုင်ငံအတွက်ကို မြောက်ကိုရီးယားက အားပေးအားမြှောက်မှုတွေ ပြုလုပ်မှာကိုလည်း သူတို့ စိုးရိမ်ပါတယ်။