ရခိုင်ပါတီနှစ်ခု ပူးပေါင်းဖို့ အဆင့်သင့်လို့ အေအယ်လ်ဒီ ပြော

ရခိုင်ဒီမိုကရေစီအဖွဲ့ချုပ် (ALD) ပါတီဟာ ၂၀၁၀ ရွေးကောက်ပွဲ အနိုင်ရပါတီတစ်ခုဖြစ်တဲ့ ရခိုင်တိုင်းရင်းသားများ တိုးတက်ရေးပါတီ(RNDP) နဲ့ပူးပေါင်းကာ ပါတီတစ်ခုတည်းအဖြစ် ရပ်တည်သွားဖို့ အဆင်သင့်ရှိနေကြောင်း ALD ပါတီတာဝန်ရှိသူတွေက ဒီကနေ့မနက်ပိုင်းက စစ်တွေမြို့မှာပြုလုပ်တဲ့ ရပ်မိရပ်ဖတွေ၊ မြို့ခံတွေနဲ့ တွေ့ဆုံရှင်းလင်းပွဲမှာ ထုတ်ဖော်ပြောကြားလိုက်ပါတယ်။

ရခိုင်ဒီမိုကရေစီအဖွဲ့ချုပ်(ALD) ပါတီအနေနဲ့ ရခိုင်လူထုရဲ့ဆန္ဒအရ ပါတီ ၂ ခုကို အမြန်ဆုံးပေါင်းစည်းနိုင်အောင် ကြိုးပမ်းဆောင်ရွက်သွားမှာ ဖြစ်တယ်လို့လည်း ALD ပါတီ ဥက္ကဌ ဦးအေးသာအောင်က ပြောပါတယ်။

ဒီကနေ့မနက်ပိုင်းကပြုလုပ်တဲ့ ပါတီတာဝန်ရှိသူတွေနဲ့ လူထုတွေ့ဆုံပွဲမှာ ရခိုင်ဒီမိုကရေစီအဖွဲ့ချုပ်(ALD) ပါတီက ပါတီရဲ့မူဝါဒနဲ့ ရပ်တည်ချက်တွေအပြင် လက်ရှိမြန်မာ့နိုင်ငံရေး အခင်းအကျင်းတွေနဲ့ ပတ်သက်ပြီး ဆွေးနွေးခဲ့ကြပါတယ်။