བོད་ནང་མི་རབས་གསར་པས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ།

འདི་ལོའི་ཕྱི་ཟླ་ ༣ ཚེས་ ༡༠ ཉིན་མོ་འདི་ནི་བོད་ནང་༡༩༥༩ ལོར་རང་དབང་སྒེར་ལངས་བྱས་ཏེ་མི་ལོ་ ༦༣ འཁོར་བའི་དུས་ཚིགས་འཁེལ་གྱི་ཡོད་ཅིང་།  ཕྱི་ལོ་ ༡༩༨༧ དང་། ༡༩༨༨ དང་།   ༡༩༨༩ བཅས་སུ་མི་རབས་གསར་པའི་ལས་འགུལ་ཞེས་རྒྱ་ནག་དམར་པོའི་གཞུང་གིས་འཛིན་སྐྱོང་བྱེད་པའི་བོད་ནང་སྐྱེས་ཚར་བྱུང་བའི་མི་རབས་གཞོན་པས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་བའི་དུས་ཚིགས་དམིགས་བསལ་བ་ཞིག་ཆགས་ཡོད་པ་རེད།  དེ་བཞིན་ཕྱི་ལོ་ ༢༠༠༨ ཟླ་ ༣ པའི་ནང་བོད་ཀྱི་རྒྱལ་ས་ལྷ་སས་གཙོས་པའི་ཆོལ་གསུམ་ཁྱོན་དུ་རྔམ་སྟོན་ངོ་རྒོལ་སྤེལ་ཞིང་། བོད་མི་ ༡༦༠ ཙམ་གྱིས་རང་ལུས་མེར་བསྲེགས་བཏང་སྟེ།  འདིའི་ཁྲོད་གནས་ཚུལ་གསར་ཤོས་གཅིག་ནི་ཉེ་ལམ་ཕྱི་ཟླ་ ༢ ཚེས་ ༢༥ ཉིན་ཕོ་བྲང་པོ་ཏཱ་ལའི་མདུན་དུ་རང་ལུས་མེར་བསྲེགས་ཀྱིས་རྐྱེན་འདས་སུ་གྱུར་བ་གླུ་པ་གྲགས་ཅན་ཚེ་དབང་ནོར་བུ་ལགས་ཡིན་པ་རེད།  ཐེངས་འདིའི་གནད་དོན་གླེང་མོལ་གྱི་ལས་རིམ་ནང་། ༡༩༨༠ འི་བཅུ་ཕྲག་མཇུག་གི་རྔམ་སྟོན་ངོ་རྒོལ་ནང་དངོས་སུ་ཞུགས་མྱོང་པ། ཆབ་སྲིད་བཙོན་ཟུར་ཁག་ཅིག་དང་ལྷན་ཁོང་རྣམ་པའི་ལོ་རྒྱུས་དང་། མྱོང་ཚོར་དང་འབྲེལ་ནས་ཨེ་ཤེ་ཡ་རང་དབང་རླུང་འཕྲིན་ཁང་གི་གསར་འགོད་པ་བཀྲ་ཤིས་དབང་ཕྱུག་ལགས་ཀྱིས་གླེང་མོལ་ཞུས་པར་གསན་རོགས་ཞུ།
གསར་འགོད་པ། བཀྲ་ཤིས་དབང་ཕྱུག
རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་སྤེལ་མཁན། ཡེ་ཤེས་བཀྲ་ཤིས།