སླར་ཡང་བོད་ནང་རང་ལུས་མེར་བསྲེགས་ནས་ངོ་རྒོལ་བྱས་པ།

༄༅༎སླར་ཡང་བོད་མདོ་སྨད་ཨ་མདོ་རྔ་པའི་བོད་མི་ན་གཞོན་ཞིག་གིས་རང་ལུས་མེར་བསྲེགས་བཏང་སྟེ་རྒྱ་ནག་གཞུང་ལ་ངོ་རྒོལ་གནང་འདུག
དེ་རིང་ཕྱི་ལོ་ ༢༠༡༡ ཟླ་ ༡༠ ཚེས་ ༡༥འི་སྔ་དྲོ་ རང་ལོ་ ༡༩ ཡིན་པ། ནོར་བུ་དགྲ་འདུལ་ལགས་ཞུ་བ་ཞིག་གིས་རྔ་པའི་ཁྲོམ་གཞུང་དུ་ཐོན་ནས། བོད་ཁ་བ་ཅན་ལ་རང་དབང་རང་བཙན་དགོས། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་ངོ་རྒོལ་སྐད་འབོད་བྱེད་བཞིན་དུ་རང་ལུས་མེར་བསྲེགས་བཏང་ཡོད་པ་བཞུགས་སྒར་རྡ་རམ་ས་ལར་ཡོད་པའི་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་འཐུད་ཁང་ནས་གནས་ཚུལ་སྤེལ་འདུག
ནོར་བུ་དགྲ་འདུལ་ལགས་ནི་རྔ་པ་རྫོང་ཆོས་རྗེ་ཞང་སོ་རུ་མའི་པདྨ་ཚང་གི་བུ་ཡིན་པ་དང་། དེ་སྔོན་རྔ་པ་ཀིརྟི་དགོན་པའི་དགེ་འདུན་པ་ཞིག་ཡིན་ཡང་། ཕྱི་ལོ་ ༢༠༡༠འི་ནང་སྐྱ་སར་བབས་པ་ནས་བཟུང་ཁོང་གི་ཕ་མའི་ཁྱིམ་སར་བསྡད་ཡོད་འདུག
ནོར་བུ་དགྲ་འདུལ་ལགས་ཀྱི་ལུས་ཐོག་མེ་འབར་བཞིན་པའི་སྐབས། ཁྲོམ་གཞུང་དུ་ཡོད་པའི་ཉེན་རྟོག་པ་ཚོས་ཆུ་དང་མེ་གསོད་ཡོ་ཆས་བེད་སྤྱོད་བྱས་ཏེ་མེ་བསད་འདུག་ན་ཡང་། སྐབས་དེར་གནས་ཚུལ་དངོས་སུ་མཐོང་མཁན་ཚོས་བརྗོད་ན། ཉེན་རྟོག་པས་ནོར་བུ་དགྲ་འདུལ་ཐོག་བཅར་བརྡུང་བཏང་སྟེ། ཉེན་རྟོག་པའི་རླངས་འཁོར་ཆུང་ཆུང་ཞིག་གི་ནང་འཁྱེར་ཡོད་འདུག་ན་ཡང་ གང་དུ་འཁྱེར་ཡོད་མེད་ད་བར་ཤེས་རྟོགས་ཐུབ་མེད་པ་རེད་འདུག
ད་དུང་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པས་གནས་ཚུལ་སྤེལ་བར་གཞིགས་ན་ ནོར་བུ་དགྲ་འདུལ་ལགས་ཀྱི་གཟུགས་པོར་མེ་སྐྱོན་ཚབས་ཆེ་བྱུང་ཡོད་འདུག་ན་ཡང་། ཉེན་རྟོག་པས་རླངས་འཁོར་ནང་འོར་འདྲེན་སྐབས་འདས་གྲོངས་སུ་གྱུར་མེད་པ་གསལ་པོ་ཡིན་འདུག།