ཤིན་ཅིང་ལ་གཅིག་གྱུར་ཐོག་རྒྱ་ནག་གི་ཕྱིར་བསྐྱོད་ལག་ཁྱེར་སྤྲོད་རྒྱུ།

ཤིན་ཅིང་དུ་གཅིག་གྱུར་ཐོག་རྒྱ་ནག་གི་ཕྱིར་བསྐྱོད་ལག་ཁྱེར་སྤྲོད་རྒྱུའི་སྲིད་ཇུས་འཛིན་རྒྱུ་ཡིན་པ་ཤིན་ཅིང་ཉེན་རྟོག་ཕྱོགས་ནས་བཤད་འདུག
དེའང་དེ་རིང་ཟླ་༨ཚེས་༦ཉིན་ཤིན་ཅིང་ཉིན་རེའི་ཚགས་པར་ཐོག ཤིན་ཅང་དམར་ཤོག་ཚོགས་པས་གནས་ཚུལ་ཞིག་སྤེལ་བ་BBC་སོགས་བརྒྱུད་ལམ་དུ་བཀོད་པ་ལྟར་ན། ཤིན་ཅིང་ཉེན་རྟོག་ཕྱོགས་ཀྱི་ཕྱིར་བསྐྱོད་ལག་ཁྱེར་སྤྲོད་མཁན་ལས་ཁང་གིས་ཕྱིར་བསྐྱོད་ལག་ཁྱེར་དཀྱུས་མ་དོ་དམ་བསྒྱུར་བཅོས་སྔར་བས་མགྱོགས་སུ་གཏོང་རྒྱུ་དང་། ཁྲིམས་ལུགས་གཞིར་བཟུང་ཕྱིར་བསྐྱོད་ལག་ཁྱེར་དཀྱུས་མ་གཅིག་གྱུར་སྤྲོད་རྒྱུའི་དོ་དམ་སྲིད་ཇུས་ཕྱོགས་ཡོངས་ནས་ལག་བསྟར་བྱ་རྒྱུ་ཡིན་པ་ཁྱབ་བསྒྲགས་བྱས་ཡོད་པ་དང་། སྲིད་ཇུས་གསར་པའི་འོག་ཤིན་ཅིང་ཡུལ་མི་ཕྱིར་བསྐྱོད་ལག་ཁྱེར་ཞུ་མཁན་ཚང་མར་སྤྱིར་བཏང་ཕྱིར་བསྐྱོད་ལག་ཁྱེར་སྲིད་ཇུས་གཅིག་གྱུར་ལག་བསྟར་བྱ་རྒྱུ་ཡིན་པ་རེད། ཡིན་ནའང་གནས་ཚུལ་ལ་གཞིགས་ནས་ལག་ཁྱེར་ཞུ་མཁན་དོ་བདག་གིས་ཡུལ་མིའི་མིང་ཐོབ་ལག་ཁྱེར་དང་ཐེམ་ཐོ་མ་ཡིན་པའི་ཡིག་ཆ རིགས་དགོས་གལ་ཡོད་པ་རེད་ཅེས་བཀོད་པ་རེད།  
དེའི་གོང་དུ་ཨ་རིའི་གྲོང་ཁྱེར་ནེའུ་ཡོག་ནང་ལ་རྟེན་གཞི་བྱེད་པའི་འགྲོ་བ་མིའི་ཐོབ་ཐང་ལྟ་ཞིབ་སྒྲིག་འཛུགས་ཀྱིས་གནས་ཚུལ་སྤེལ་བར། རྒྱ་ནག་གིས་བོད་སོགས་ས་ཁུལ་དུ་གྲངས་ཉུང་མི་རིགས་ཀྱི་སྤྱི་འབངས་ལ་ཕྱིར་བསྐྱོད་ལག་ཁྱེར་མི་སྤྲོད་པ་འམ་ཡང་ན་ནར་འགྱངས་བཏང་བ། ཕྱིར་བསྐྱོད་ལག་ཁྱེར་ཞུ་མཁན་འགའ་ཞིག་ལོ་ལྔ་ཙམ་ངང་སྒུག་བྱེད་དགོས་པ། ཐ་ན་ལག་ཁྱེར་ཞུ་སྙན་རྩིས་ལེན་བྱེད་ཀྱི་མེད་པ་རེད།  
ད་རེས་ཤིན་ཅིང་ས་ཁུལ་དུ་ཕྱིར་བསྐྱོད་ལག་ཁྱེར་སྤྲོད་ཕྱོགས་དེའི་ཐད་ཤིན་ཅང་ཉིན་རེའི་ཚགས་པར་ཐོག་གནས་ཚུལ་སྤེལ་བའི་ནང་། ཐེངས་དེར་ཕྱིར་སྐྱོད་ལག་ཁྱེར་དཀྱུས་མའི་བསྒྱུར་བཅོས་མགྱོགས་སུ་བཏང་བ་དེ་ནི་ལྟེ་བའི་ས་ཁུལ་གྱི་འཛུགས་བསྐྲུན་དང་འཚམ་པ་དང་། ཤིན་ཅིང་གི་བསྒྱུར་བཅོས་སྒོ་མོི་དབྱེ་རྒྱུ་སྐུལ་འདེད་མགྱོགས་སུ་གཏོང་རྒྱུར་སྲིད་གཞུང་གིས་ལག་ཁྱེར་ཞུ་ཕྱོགས་དང་། མང་ཚོགས་ལ་སྟབས་བདེ་ཡོང་ཆེད་ཡིན་ལུགས་སྐོར་བཀོད་ཡོད་པ་རེད།

གསར་འགོད་པ་འཇམ་དཔལ་ཕུན་ཚོགས།