རྒྱ་མིའི་བཟོ་པ་༡༠༠༠ཙམ་གྱིས་གླ་ཕོགས་ཆད་པ་སྤྲོད་པའི་རེ་འདུན།

༄༅༎དེའང་ཧྲང་ཧད་ཀྱི་གློག་འཕྲུལ་བཟོ་གྲྭ་གཉིས་ཀྱི་བཟོ་པ་ཧ་ལམ་ཆིག་སྟོང་ཙམ་གྱིས་ཟླ་བ་བཅུ་གཉིས་པའི་ཚེས་བརྒྱད་ཉིན་འགོ་བཙུགས་ཉིན་གཉིས་རིང་བཟོ་གྲྭའི་ཕྱི་རོལ་དུ་འགོག་རྒོལ་བྱས་ཏེ་གླ་ཕོགས་ཆད་པ་སྤྲོད་དགོས་པའི་དགོས་འདུན་བཏོན་ཡོད་འདུག

གནས་ཚུལ་ཐོན་པར་ལྟར་ན་ཁྲོམ་བསྐོར་བྱེད་པའི་སྐབས་བཟོ་པ་དང་བདེ་སྲུང་མི་སྣའི་བར་གདོང་ཐུག་བྱུང་ནས་བཟོ་པ་འགའ་ཤས་རྨས་སྐྱོན་ཕོག་པ་དང་གཞན་བཟོ་པ་འགའ་ཤས་ཉེན་རྟོག་པས་བཟུང་ཁྲིད་བྱས་ཡོད་པ་རེད། འཛམ་གླིང་ཁྱོན་ཡོངས་ཀྱི་དཔལ་འབྱོར་ཉེན་ཚབས་ཀྱིས་རྒྱ་ནག་ལྷོ་ཕྱོགས་ཀྱི་ཁེ་ལས་བཟོ་གྲྭ་གྲངས་ལས་འདས་པ་སྒོ་བརྒྱབ་དགོས་པ་ཆགས་པའི་རྐྱེན་ལས་བཟོ་པས་ངོ་རྒོལ་རྔམ་སྟོན་རྒྱུན་མི་ཆད་པར་ཡོངས་ཁྱབ་ཏུ་གནས་པ་རིའུ་ཀྲར་གསར་འགྱུར་ལས་ཁང་གིས་གནས་ཚུལ་གཏོང་སྤེལ་བྱས་འདུག འོན་ཀྱང་ད་ལམ་ཧྲང་ཧད་དུ་འགོག་རྒོལ་བྱེད་པ་དེ་ནི་ཐེངས་དང་པོ་གཞི་རྒྱ་ཆེ་བའི་ངོ་རྒོལ་རྔམ་སྟོན་གྲས་ཤིག་ཡིན་པ་རེད། གོང་གསལ་བཟོ་གྲྭ་དེའི་བཟོ་པས་བཤད་ཡག་བྱས་ན་བཟོ་གྲྭའི་ཐོན་སྐྱེད་མཚམས་བཞག་པའི་རྗེས་ཁོང་ཚོར་ཟབ་སྦྱོང་དང་ཡང་ན་བཟོ་གྲྭ་གཞན་ལ་གནས་བསྒྱུར་ལས་ཀར་འགྲོ་དགོས་པའི་བརྡ་ཐོ་འབྱོར་ཞིང་ཡིན་ནའང་བཟོ་པ་ཚོས་གླ་ཕོགས་ཆད་པ་རྣམས་མ་སྤྲད་བར་དུ་བཟོ་གྲྭ་ནས་ཁ་བྲལ་རྒྱུ་ཁས་ལེན་བྱེད་ཀྱི་མེད་པ་གསལ་འགྲེལ་བྱས་ཡོད་འདུག