ཨུ་རུ་སུའི་སྲིད་བློན་ལ་གཟེངས་རྟགས་འབུལ་འཆར་ཕྱིར་འཐེན།

༄༅༎ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ལྦཀ་ལེལྦ་ཧ་ལྦེལ་མཆོག་གིས་འཇར་མ་ནི་གཟེངས་རྟགས་ཚོགས་ཆུང་གིས་ཨུ་རུ་སུའི་སྲིད་བློན་ལྦ་ལ་རྡི་མིར་པུ་ཀྲིན་ལ་གཟེངས་རྟགས་འབུལ་འཆར་དེ་ཕྱིར་འཐེན་གནང་བར་དགའ་བསུ་ཞུས་འདུག

འཇར་མ་ནི་གཟེངས་རྟགས་ཚོིགས་ཆུང་གིས་གཟེངས་རྟགས་འབུལ་ཡུལ་ལ་བསྐྱར་ཞིབ་གནང་བ་དེ་ནི་འོས་འཚམས་ཡིན་པར་དགོངས་ཀྱི་འདུག་ཅེས་གསུངས་གནང་འདུག གཟེངས་རྟགས་དེ་ནི། ཨེ་ན་པོ་ལིཏ་ཀོལྦ་སི་ཀ་ཡ་ འམ།   སེར་གེ་ཀོ་ལྦ་ལོལྦ་ ཡང་ན། ལིའུ་ཤའོ་ཕུའུ་སོགས་འགྲོ་བ་མིའི་ཐོབ་ཐང་དང་། རང་དབང་། མང་གཙོ་དར་སྤེལ་གཏོང་ཐབས་སུ་འབད་འབུངས་ལྷོད་མེད་གནང་མཁན་ཚོར་འབུལ་འོས་པ་ཡིན་ཞེས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ལྦཀ་ལེལྦ་ཧ་ལྦེལ་མཆོག་གིས་གསུངས་གནང་འདུག

འཇར་མ་ནི་གསར་འགྱུར་བརྒྱུད་ལམ་ནང་ཐོན་པར་གཞིགས་ན།    འདི་ལོའི་འཇར་མ་ནི་གཟེངས་རྟགས་དེ་ཨུ་རུ་སུའི་སྲིད་བློན་ལྦ་ལ་ྲདི་མིར་པུ་ཀྲིན་ལ་གཟེངས་རྟགས་འབུལ་འཆར་ཡོད་པར་བརྟེན། ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ལྦཀ་ལེལྦ་ཧ་ལྦེལ་མཆོག་གིས་འོས་མི་འདེམས་སྒྲུགས་གནང་ཕྱོགས་དེར་ངོ་རྒོལ་མཚོན་ཆེད་དུ་དེ་སྔོན་ཁོང་ལ་འབུལ་བཞེས་གནང་བའི་འཇར་མ་ནི་གཟེངས་རྟགས་དེ་ཕྱིར་སློག་གནང་རྩིས་གནང་ཡོད་པ་རེད།

འོན་ཀྱང་ད་ཆ་འཇར་མ་ནི་གཟེངས་རྟགས་ཚོགས་ཆུང་གིས་ཨུ་རུ་སུའི་སྲིད་བློན་ལྦ་ལ་རྡི་མིར་པུ་ཀྲིན་ལ་གཟེངས་རྟགས་འབུལ་འཆར་དེ་ཕྱིར་འཐེན་གནང་ཟིན་པར་ཁོང་གིས་དགའ་བསུ་ཞུས་པ་མ་ཟད། ཁོང་དང་མཚུངས་པའི་དེ་སྔོན་གཟེངས་རྟགས་འབུལ་བཞེས་གནང་མཁན་གཞན་ཚོར་ཡང་དེ་དེ་བཞིན་གྱི་འཚོར་སྣང་བྱུང་ཡོད་པ་རེད། ཕྱི་ལོ་༢༠༠༣་ལོར་འཇར་མ་ནི་ཤར་ནུབ་གཉིས་ཟླ་བསྒྲིལ་བྱུང་བའི་དགའ་སྟོན་མཚོན་ཆེད་དུ་ཁུཨ་ཌིརི་ག་ཞེས་པའི་གཟེངས་རྟགས་དེ་གསར་གཏོད་གནང་ཞིང་། འདས་པའི་ལོ་ཤས་རིང་འཛམ་གླིང་ནང་ཞི་བདེ་དང་། རང་དབང༌། མང་གཙོ་བཅས་དོན་གཉེར་བ་ཚོར་གཟེངས་རྟགས་འབུལ་བཞེས་གནང་ཡོད་པ་རེད། འོན་ཀྱང་ཨུ་རུ་སུའི་སྲིད་བློན་ལྦ་ལ་རྡི་མིར་པུ་ཀྲིན་གྱིས་དེ་སྔོན་ཨུ་རུ་སུའི་སྲིད་བློན་བྱེད་རིང་དང་། ད་ལྟ་སྲིད་བློན་གྱི་ལས་གནས་བཟུང་བའི་རིང་གསར་འགོད་རང་དབང་སོགས་ལ་བཀག་སྡོམ་དང་། མང་གཙོ་དོན་གཉེར་བར་དྲག་གནོན་སོགས་ཀྱི་ལོ་རྒྱུས་ཡོད་པར་བརྟེན། ཁོང་ལ་གཟེངས་རྟགས་འབུལ་བཞེས་གནང་རྒྱུའི་གནས་ཚུལ་ཐོན་མ་ཐག་གསར་འགྱུར་བརྒྱུད་ལམ་ནང་སྐྱོན་བརྗོད་དྲག་པོ་བྱུང་སྟེ་གཟེངས་རྟགས་འབུལ་བཞེས་ཕྱིར་འཐེན་མི་བྱེད་ཀ་མེད་དུ་འགྱུར་འདུག།