ཨ་རིའི་རོགས་ཚོགས་ནས་ལྷོ་ཨེ་ཤེ་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བ་ཞེས་པའི་ལས་གཞི་གསར་དུ་དབུ་འབྱེད་གནང་བ།

ཟླ་ ༡༡ ཚེས་ ༢༥ ཉིན་བཞུགས་སྒར་དུ་རྟེན་གཞི་བྱས་པའི་བོད་ཀྱི་ཟློས་གར་ཚོགས་ཁང་དུ་ཨ་རིའི་རོགས་ཚོགས་དང་བོད་མིའི་སྒྲིག་འཛུགས་མཉམ་འབྲེལ་ཐོག་ནས། ལྷོ་ཨེ་ཤི་ཡའི་བཙན་བྱོལ་བོད་མི་རྣམས་ཀྱི་སྤྱི་ཚོགས་བདེ་དོན་ལ་སྨན་པའི་གཞི་རྒྱ་ཆེ་བའི་ལས་གཞི་ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བ་ཞེས་པའི་ལས་གཞི་ཞིག་དངོས་སུ་དབུ་འབྱེད་གནང་ཡོད་པ་དང་། སྐབས་དེར་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་ལགས་དང་ཨ་རིའི་རོགས་ཚོགས་ཀྱི་ལས་འཆར་འགན་འཛིན་སྐུ་ཞབས་ Steven Olive ལགས་ཆེད་ཕེབས་ཀྱིས། བོད་མིའི་སྒྲིག་འཇུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་ལགས་ནས། འདས་པའི་ལོ་ངོ་ ༦༥ ལྷག་རྒྱ་ནག་གཞུང་གིས་རྒྱུན་ཆད་མེད་པའི་སྲིད་བྱུས་ངན་པ་མང་དག་ཅིག་སྤེལ་ཏེ། བོད་ཀྱི་སྐད་ཡིག་དང་རིག་གཞུང་རྣམས་རྩ་ནས་མེད་པ་བཟོས་ཏེ་བོད་ཀྱི་ངོ་བོ་རྣམས་ཤུལ་ལུས་མེད་པ་བཟོ་ཐབས་བྱས་ཡོད་ནའང། ད་བར་བོད་ཀྱི་རིག་གཞུང་དང་ངོ་བོ་རྣམས་རྒྱུན་གནས་ཐུབ་པ་བྱུང་ཡོད་པ་ནི་བོད་མི་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ཨ་རིའི་རོགས་སྐྱོར་ཚོགས་པ་དང་རྒྱ་གར་གཞུང་གི་རྒྱབ་སྐྱོར་ལ་བརྟེན་ནས་བྱུང་བ་ཞིག་ཡིན་པས། ཁོང་རྣམས་ནི་བོད་མིའི་སྒྲིག་འཛུགས་དང་བོད་མི་ཚོར་ཤིན་ཏུ་ནས་བཀའ་དྲིན་ཆེན་པོ་ཡིན་ཞེས་གསུངས་སོང་།

གཞན་ཡང་ཐེངས་འདིའི་མཛད་སྒོའི་ཐོག་ཨ་རིའི་རོགས་ཚོགས་ཀྱི་ལས་འཆར་འགན་འཛིན་སྐུ་ཞབས་ Steven Olive ལགས་ནས། ཐེངས་འདིའི་ལས་གཞིའི་དམིགས་ཡུལ་གཙོ་བོ་ནི། དམིགས་བསལ་བལ་ཡུལ་དང་རྒྱ་གར། དེ་བཞིན་ལྷོ་ཨེ་ཤེ་ཡ་ཁྱོན་ཡོངས་སུ་གནས་སྡོད་བོད་མི་རྣམས་ལ་རང་རང་སོ་སོའི་ལས་འཆར་དང་འཚམ་པའི་ཟབ་སྦྱོང་འདྲ་མིན་གནང་སྟེ། ལས་འཆར་འདྲ་མིན་གཉེར་བའི་བརྒྱུད་བོད་པའི་སྐད་ཡིག་དང་རིག་གཞུང་དེ་བཞིན་ངོ་བོ་རྣམས་དུས་དང་འཚམ་པའི་ཐོག་རྒྱུན་གནས་ཐུབ་ཅིང་གོང་མཐོར་སྤེལ་སླད་དུ་ཡིན་ཞིང་། ཨ་རིའི་རོགས་སྐྱོར་ཚོགས་པས་དེ་སྔ་ནས་བཙན་བྱོལ་བོད་མི་རྣམས་ལ་ལས་གཞི་མང་དག་ཅིག་གི་ཐོག་རྒྱབ་སྐྱོར་གནང་ཡོད་པས། ལས་གཞི་དེ་དག་ལ་གྲུབ་འབྲས་གང་ལེགས་སོན་ཡོད་སྟབས་ལས་གཞི་མུ་མཐུད་རྒྱུན་འཁྱོངས་ཆེད་ཐེངས་འདིར་ལས་གཞི་གསར་པ་ཞིག་དབུ་འཛུགས་གནང་ཡོད་སྐོར་དང་། ཐེངས་འདིའི་ལས་གཞི་གསར་པ་དེའི་ནང་འདས་ཟིན་པའི་ལས་གཞི་དེ་དག་ལས་ལེགས་ཆ་མང་དག་ཅིག་བླངས་ཏེ་གསར་གཏོད་ཀྱི་རང་བཞིན་ལྡན་ཡོད་པས། ལས་གཞི་དེ་ཚགས་ཚུད་ཡོང་སླད་དུ་ཨ་རིའི་རོགས་ཚོགས་ཀྱི་ཚོགས་མི་རྣམས་ནས་བོད་མིའི་སྒྲིག་འཛུགས་དང་མཉམ་ལས་གནང་གལ་ཆེ་བ་ཡིན་ཞེས་འདི་ག་རླུང་འཕྲིན་ཁང་ལ་གསུངས་བྱུང་།

རྩ་བའི་ཐེངས་འདིའི་ཨ་རིའི་རོགས་ཚོགས་ཀྱི་ལས་གཞི་གསར་པའི་དབུ་འབྱེད་ཀྱི་མཛད་སྒོའི་ཐོག ལས་གཞི་དེ་དང་འབྲེལ་ཡོད་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་དང་། དྲུང་ཚབ་རྣམས་ནས་སོ་སོའི་སྤྱི་ཚོགས་བདེ་དོན་གྱི་ལས་གཞི་ཁག་ངོ་སྤྲོད་དང་ཨ་རིའི་རོགས་སྐྱོར་ཚོགས་པའི་ཚོགས་མི་རྣམས་ལ་ཐུགས་རྗེ་ཆེ་ཞུས་གནང་སོང་།

གསར་འགོད་པ། བདེ་ཆེན་དབང་མོ།

རྩོམ་སྒྲིག་པ།་བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།