ཨ་རིས་བོད་མིའི་སྤྱི་ཚོཊ་ལ་ཨ་སྒོར་ས་ཡ་༢༣་གྱི་རོཊ་དངུལ་གནང་འདུག

ཨ་མི་རི་ཀའི་གཞུང་གིས་བཙན་བྱོལ་བོད་མིའི་སྤྱི་ཚོགས་ཀྱི་འཚོ་བ་ཡར་རྒྱས་གཏོང་ཐབས་སུ་དམིགས་ནས་ཨ་སྒོར་ས་ཡ་ཉི་ཤུ་རྩ་གསུམ་གྱི་རོགས་རམ་གནང་རྒྱུ་རེད།
དེ་ཡང་འདི་ཚེས་༣་གཟའ་ཟླ་བའི་ཉིན་བཞུགས་སྒར་རྡ་རམ་ས་ལར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། དཔལ་འབྱོར་བཀའ་བློན་མཆོག་རྣམ་གཉིས་ཀྱི་གཙོས་འབྲེལ་ཡོད་ལས་བྱེད་ཚོ་དང་ལྷན་དུ་། གསར་འགོད་ལྷན་ཚོགས་ཤིག་བསྐོངས་ཚོགས་གནང་བའི་སར་། སྲིད་སྐྱོང་མཆོག་གིས། འདས་པའི་དུས་ཡུན་གང་འཚམ་ཞིག་ནས་བཟུང་འབོད་སྐུལ་ཞུས་དོན་ལྟར། ཨ་རིའི་འབྲེལ་ཡོད་རྣམས་བཞུགས་སྒར་དུ་དངོས་སུ་གཟིགས་བསྐོར་དང་འབྲེལ་ལས་འཆར་ཁག་ལ་ཉམས་ཞིབ་གནང་སྟེ། ཨ་རིའི་གཞུང་གི་རོགས་རམ་ཐེབས་རྩ་ཁང་USAID་ཞེས་པ་བརྒྱུད་ཨ་སྒོར་ས་ཡ་ཉི་ཤུ་རྩ་གསུམ་ལོ་ལྔའི་རིང་རོགས་རམ་གནང་རྒྱུའི་ཞལ་བཞེས་གནང་ཡོད་པ་མ་ཟད། ད་རེས་དངོས་སུ་ཕྱི་ཟླ་བཅུ་པ་ནས་འགོ་བཙུགས་ཀྱིས་ལག་བསྟར་གནང་རྒྱུ་ཡིག་ཐོག་ནས་ཀྱང་ཞལ་བཞེས་ཐོབ་སོན་བྱུང་། གོང་ཞུས་རོགས་དངུལ་དེ་དག་ལྷོ་ཨེ་ཤེ་ཡའི་ནང་ཡོད་པའི་བོད་མིའི་སྤྱི་ཚོགས་ཀྱི་འཚོ་བའི་གནས་སྟངས་སྤྱི་དང་། ལྷག་པར་དུ་གཞིས་ཆགས་ཁག་ཏུ་མང་ཚོགས་ཀྱི་འཚོ་བ་ཡར་རྒྱས་གཏོང་བ་བརྒྱུད་གཞིས་ཆགས་སྲ་བརྟན་ཡོང་ཐབས་ཀྱི་ལས་གཞི་བཀོད་སྒྲིག་བྱེད་རྒྱུ་དང་། དེའི་ཁོངས་སུ་གཞིས་ཆགས་ཁག་གི་ནང་། དཔེ་མཛོད་རྒྱག་རྒྱུ་དང་། འཕྲོད་བསྟེན་ཆེད་རྩེད་ཐང་རྒྱབ་རྒྱུ་སོགས་དགོས་གལ་ལ་གཟིགས་ནས་ལས་འཆར་སྤེལ་གནང་རྒྱུ་ཡིན་ལུགས་གསུངས་འདུག
དེ་དང་ཕྱོགས་མཚུངས་བུད་མེད་ནུས་སྟོབས་གོང་འཕེལ་གཏོང་ཐབས་ཀྱི་ལས་གཞི་རྒྱ་བསྐྱེད་གཏོང་རྒྱུ་དང་། ལྷག་པར་དུ་བོད་མིས་འཛིན་སྐྱོང་བྱེད་པའི་དངུལ་ཁང་ཞིག་འཛུགས་ཐབས་སུ་དགོས་ངེས་རྒྱ་གར་གཞུང་ལ་ཆོག་མཆན་ཞུས་ཏེ། ཕྱི་ལོ་༢༠༡༩་ཙམ་ལ་ལས་གཞི་འགོ་འཛུགས་ཐུབ་པའི་རེ་བ་གནང་གི་ཡོད་པ་བཅས་གང་ལྟར་ཨ་རིའི་གཞུང་ནས་བཙན་བྱོལ་བོད་མིའི་འཚོ་བའི་གནས་སྟངས་ཡར་རྒྱས་གཏོང་ཐབས་སུ་དམིགས་པའི་རོགས་རམ་གནང་བ་དེ་དག་ཆུད་ཟོས་སུ་མ་འགྲོ་བའི་ཆེད་མང་ཚོགས་ནས་ཀྱང་གཞུང་གི་འཆར་གཞི་ཁག་ལ་འཕྱར་གྲུ་མཉམ་འདེགས་བྱེད་དགོས་ལུགས་གསུངས་འདུག

གསར་འགོད་པ་རིག་འཛིན་ཆོས་སྒྲོན།