ཨ་རིས་ལྷོ་རྒྱ་ནག་རྒྱ་མཚོའི་རྩོད་རྙོག་ཐོག་ཉེན་བརྡ་བཏང་བ།

༄༅༎ཨ་རིའི་ཕྱི་སྲིད་དྲུང་ཆེ་མཆོག་ནས་ལྷོ་རྒྱ་ནག་རྒྱ་མཚོའི་མཚོ་གླིང་ཐོག་རྩོད་རྙོག་བྱུང་བ་དེ་ནི་ཞི་བདེ་བརྟན་ལྷིང་ལ་གནོད་སྐྱོན་འགྲོ་གཞི་ཞིག་རེད་ཅེས་གསུངས་ཡོད་འདུག

ཨིན་རྡོ་ནེ་ཤེ་ཡའི་མཚོ་གླིང་བྷ་ལིའི་ནང་ཚུགས་བཞིན་པའི་ལྷོ་ཤར་ཨེ་ཤ་ཡའི་མཐུན་ཕྱོགས་རྒྱལ་ཁབ་ཀྱི་ཕྱི་སྲིད་བློན་ཆེན་གྱི་ལྷན་ཚོགས་སུ་ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ ཁི་ལན་དྲན་མཆོག་གིས།

ཉེ་ཆར་ལྷོ་རྒྱ་ནག་རྒྱ་མཚོའི་བདག་དབང་དང་ལྷག་པར་དུ་དེ་དག་གི་ཐོག་རྒྱ་ནག་གི་མཚོ་དམག་གྲུ་གཟིངས་བཏང་ནས་རང་སྣང་གང་དྲན་བྱེད་པའི་རྐྱེན་གྱིས་བདག་དབང་ཐོག་འཐབ་རྩོད་བྱེད་མཁན་ཁྱིམ་མཚེས་རྒྱལ་ཁབ་ཚོས་ངོ་རྒོལ་བྱས་པ་སོགས་ཀྱི་གནས་ཚུལ་བྱུང་བ་དེ་ནི་རྒྱ་མཚོའི་ཉེན་སྲུང་དང་། དཔལ་འབྱོར་དང་། ཚོང་འབྲེལ་གང་ས་ཅིའི་ཐད་གནོད་སྐྱོན་འགྲོ་གཞི་ཞིག་ཡིན་པ་མ་ཟད། དེས་རང་བཞིན་གྱི་ཞི་བདེ་བརྟན་ལྷིང་ལ་དོ་ཕོག་ཐེབས་རྒྱུའི་ཉེན་ཁ་ཞིག་ཀྱང་རེད་ཅེས་གསུངས་ཡོད་པ་རེད།

ཡང་ལྷན་ཚོགས་དེའི་ཐོག་རྒྱ་ནག་གི་ཕྱི་སྲིད་བློན་ཆེན་ཡང་ ཇེ་ཆིས། ལྷོ་རྒྱ་ནག་རྒྱ་མཚོའི་གནད་དོན་ཐོག་ད་ལྟའི་ཆར་ཞི་བདེ་ལྷིང་འཇགས་ཡོད་རེད་ལ་མུ་མཐུད་ནས་ང་ཚོ་མཉམ་རུབ་ཀྱི་ཐོག་ནས་གཏན་ལྷིང་ཡོང་ཐབས་བྱེད་དགོས་ཀྱི་རེད། རྒྱ་ནག་གི་ངོས་ནས་ཀྱང་ཨེ་ཤ་ཡའི་ནང་ཞི་བདེ་བརྟན་ལྷིང་ཡོང་ཐབས་སུ་ཞབས་འདེགས་ཞུ་རྒྱུ་ཡིན་ཞེས་གཏམ་བཤད་སྤེལ་ཡོད་འདུག

འོན་ཀྱང་ཕི་ལི་པིན་གྱི་ཕྱི་སྲིད་དྲུང་ཆེས། རྒྱ་ནག་དེང་སང་སྟོབས་ཆེན་རྒྱལ་ཁབ་ཅིག་ཏུ་འགྱུར་གྱི་ཡོད་རེད། འོན་ཀྱང་དེར་གཞིགས་པས་འགན་ཡང་འཁྱཻར་དགོས་ཀྱི་རེད་ཅེས་གསུངས་ནས་རྒྱ་ནག་གི་ཕྱོགས་ནས་རྒྱ་མཚོའི་བདག་དབང་ཆ་ཚང་ཁོང་ཚོར་ཡོད་ལུགས་རྙོག་ཁྲ་བཤད་བཞིན་པ་དེ་ནི་ཁུངས་བདེན་མེད་པ་ཞིག་ཡིན་པའི་སྐོར་ཡང་འགྲེལ་བརྗོད་བྱས་ཡོད་པ་རེད།

གོང་དུ་ཞུས་པའི་ལྷོ་རྒྱ་ནག་རྒྱ་མཚོ་ཞེས་པ་དེའི་བདག་དབང་རྒྱ་ནག་ནས་ཆ་ཚང་ཡོད་ལུགས་བཤད་བཞིན་ཡོད་པ་དེ་ནི། རྒྱ་མཚོ་དེ་ནི་རང་འབྱུང་རྡོ་སྣུམ་བསྔོགས་བཏོན་བྱེད་ས་ཡོད་པ་གནད་འགག་ཆེན་པོ་ཞིག་ཆགས་ཀྱི་ཡོད་པར་བརྟེན་ཡིན་པ་རེད། འོན་ཀྱང་དེའི་ཐོག་ཁྱིམ་མཚེས་རྒྱལ་ཁབ་འགའ་ཤས་ནས་བདག་དབང་ཡོད་ཚུལ་རྩོད་ལེན་བྱེད་ཀྱི་ཡོད་པ་ཞིག་ཡིན་པ་རེད།།