ལྷ་སར་གཞུང་ཚབ་ཁང་འཛུགས་ཐབས།

༄༅༎ཨ་མི་རི་ཀས་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཀྱི་ཡན་ལག་གསར་འཛུགས་ཐབས་མཇུག་སྐྱོང་གནང་རྒྱུ་ཡིན་འདུག པེ་ཅིང་ནང་བཅའ་ཞུགས་ཨ་མི་རི་ཀའི་གཞུང་ཚབ་་གེ་རི་ལོཀ་(Gary Locke) མཆོག་ཉིན་གསུམ་རིང་བོད་ཀྱི་རྒྱལ་ས་ལྷ་སར་མཚམས་གཟིགས་ལ་ཕེབས་སྐབས་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ཁྲན་ཇོང་ཀོ་(Chen Quanguo)གཙོས་པའི་འགོ་ཁྲིད་ཁག་ཅིག་དང་དེ་བཞིན་དགེ་འདུན་པ་ཁག་ཁག་ཅིག་མཇལ་འཕྲད་སྐབས་བོད་ཀྱི་ཆོས་དང་རིག་གཞུང་སྲུང་སྐྱོབ་དགོས་གལ་ཆེའི་སྐོར་ནན་བརྗོད་གནང་ཡོད་ལུགས་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་པེཊྲིཀ་ཝིནཊརེལ་(Patrrick Vintrell) ཡིས་འགྲེལ་བརྗོད་གནང་འདུག སྐབས་དེར་ཨ་རིའི་གཞུང་ཚབ་ཀྱིས་བོད་ཀྱི་སྐད་ཡིག་དང་།རིག་གཞུང་ཆོས་ལུགས་སོགས་བདག་གཅེས་སྲུང་སྐྱོབ་དགོས་པའི་འབོད་སྐུལ་ནན་པོ་གནང་བ་མ་ཟད། རང་ལུས་མེར་སྲེག་གཏོང་དགོས་པའི་གནད་དོན་ཐད་ཨ་རིའི་གཞུང་གིས་ཐུགས་འཚབ་ཆེན་པོ་ཡོད་པ་གསལ་སྟོན་གནང་འདུག  གོང་ཞུས་མགྲིན་ཚབ་པས་འགྲེལ་བརྗོད་གནང་བར་གཞིགས་ན།  ཨ་རིའི་གྲོས་ཚོགས་ཀྱིས་བོད་ཐོག་འཛིན་པའི་སྲིད་བྱུས་ནང་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཀྱི་ཡན་ལག་ལས་ཁུངས་ཞིག་གསར་འཛུགས་གནང་རྒྱུར་ཐག་གཅོད་གནང་བ་བཞིན་ཨ་རིའི་ཕྱི་སྲིད་ལས་ཁུངས་ནས་ཐབས་ཤེས་གནང་མུས་ཀྱང་རྒྱ་ནག་གི་ངོས་ནས་ད་བར་ལ་བསམ་ཤེས་བྱས་མེད་པ་རེད་ཅེས་གསལ་བཤད་གནང་འདུག།