བོད་ནང་འཛིན་པའི་སྲིད་ཇུས་ཁག་ལ་བསྐྱར་ཞིབ་གནང་དགོས།

རྒྱ་ནག་གཞུང་གིས་བོད་ནང་ཆོས་དད་རང་དབང་ཐོག་དམ་བསྒྲཊ་བྱེད་བཞིན་པའི་སྲིད་ཇུས་ཁག་ལ་བསྐྱར་ཞིབ་བྱེད་དགོས་པ་ཨ་རིས་ནན་སྐུལ་གནང་བ།
དེ་ཡང་ཨ་མེ་རི་ཀའི་ཆེས་མཐོའི་དཔོན་རིགས་ཤིག་རྒྱ་ནག་ནང་གཟིགས་སྐོར་ལ་ཕེབས་ནས་རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པ་དང་། ཆོས་དད་རང་དབང་སོགས་ཀྱི་སྐོར་རྒྱ་མིའི་དཔོན་རིགས་ཚོའི་ལྷན་དུ་བཀའ་བསྡུར་གནང་བའི་ཉིན་ཤས་རྗེས་སུ་རྒྱ་ནག་གཞུང་གིས་བོད་ནང་ཆོས་དད་རང་དབང་ཐོག་དམ་བསྒྲགས་བྱེད་བཞིན་པའི་སྲིད་ཇུས་ཁག་ལ་བསྐྱར་ཞིབ་བྱེད་དགོས་པ་ཨ་རིས་སྐུལ་ལྕག་ནན་པོ་གནང་འདུག
དེའི་སྐོར་བསྒྲགས་གཏམ་ཞིག་སྤེལ་བའི་ནང་གསལ་ལྟར་ན། ཨ་མེ་རི་ཀའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་David Sapersteinམཆོག འདི་ལོའི་ཕྱི་ཟླ་༨་ཚེས་༢༠་ཉིན་དབུ་འཛུགས་ཀྱིས་ཉིན་བརྒྱད་རིང་རྒྱ་ནག་གི་རྒྱལ་ས་པེ་ཅིང་དང་། གྲོང་ཁྱེར་Shijiazhuang, Shanghai, Hangzhou དེ་བཞིན་ཧོང་ཀོང་བཅས་ནང་གཟིགས་སྐོར་ལ་ཕེབས་སྐབས་ཁོང་གིས་རྒྱ་ནག་གཞུང་ནས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པ་དང་། ཆོས་དད་རང་དབང་ལ་དམ་བསྒྲགས་ཆེ་བའི་སྲིད་ཇུས་འཛིན་བཞིན་པ་ཁག་ལ་ཨ་མེ་རི་ཀས་སེམས་འཚབ་གནང་གི་ཡོད་པ་སོགས་གནད་དོན་མང་པོའི་སྐོར་རྒྱ་གཞུང་གི་དཔོན་རིགས་ཚོར་གླེང་སློང་གནང་འདུག
ད་དུང་ཁོང་ནས་དེང་སྐབས་Zhejiangཞིང་ཆེན་ནང་ཡེ་ཤུའི་ལྷ་ཁང་གཏོར་བཤིག་གཏོང་བཞིན་པའི་ལས་འགུལ་དང་དེབ་སྐྱེལ་མ་བྱས་པའི་ཆོས་ཚོགས་ཀྱི་ཚོགས་མི་ཚོར་བསུན་གཙིར་བརྡབ་གསིག་གཏོང་བཞིན་པ་ཁག་མཚམས་འཇོག་དགོས་པའི་འབོད་སྐུལ་གནང་འདུག
ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་David Saperstein མཆོག་ནས་རྒྱ་ནག་གཞུང་གིས་བོད་མི་དང་ཡུ་གུར་ཁ་ཆེའི་མི་རིགས་ཀྱི་ཆོས་ཕྱོགས་བྱེད་སྒོ་ཁག་གི་ཐོག་དམ་བསྒྲགས་གཙོས་པའི་འབྲས་བུ་ལྡོག་ཕྱོགས་འགྱུར་རྒྱུའི་སྲིད་ཇུས་འཛིན་བཞིན་པ་ཁག་ལ་བསྐྱར་ཞིབ་དགོས་པའི་སྐུལ་ལྕག་ནན་པོ་གནང་བ་མ་ཟད། ཉེ་དུས་རྒྱ་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་ཆོས་ཕྱོགས་ཀྱི་དབུ་ཁྲིད་མང་པོ་འཛིན་བཟུང་བཀག་ཉར་ཞུས་པ་རྣམས་ཀྱི་ཐད་ཨ་མེ་རི་ཀར་སེམས་འཚབ་གཏིང་གཟབ་ཡོད་སྐོར་ཡང་གསུངས་འདུག
དེ་དང་མཉམ་David Sapersteinམཆོག་ནས་རྒྱ་གཞུང་འབྲེལ་དཔོན་རིགས་ཚོའི་ལྷན་དུ་མཇལ་འཕྲད་གནང་སྐབས་རྒྱ་ནག་ནང་ཆོས་ཚོགས་ཇེ་མང་དུ་འགྲོ་བཞིན་པ་ཐེ་བའི་བཟང་ཕྱོགས་ཀྱི་ཡར་རྒྱས་ཁག་དང་དེ་བཞིན་ཆོས་ཚོགས་ཁག་གིས་སྤྱི་ཚོགས་ཞབས་ཞུ་གང་ལེགས་གནང་བཞིན་པར་བསྔགས་བརྗོད་ཀྱང་གནང་འདུག

གསར་འགོད་པ་སེང་གེ་རི་བསོད་ནམས་ལྷ་མོ།