རྒྱལ་ཚོཊ་ཀྱི་ཞིབ་དཔྱོད་པས་རྒྱ་ནག་གི་བྱ་སྤྱོད་ལ་སྐྱོན་བརྗོད་གནང་།

རྒྱལ་ཚོགས་ཀྱི་ཞིབ་དཔྱོད་པས་རྒྱ་ནག་གིས་བོད་དང་ཤིན་ཅང་གི་ཐོག་འཛིན་བཞིན་པའི་སྲིད་ཇུས་ཐད་སེམས་འཚབ་རང་བཞིན་གྱིས་སྐྱོན་བརྗོད་གནང་།
དེ་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐད་ཞིབ་དཔྱོད་པ་སྐུ་ཞབས་ཧཡེནར་སྦིཡེ་ལེ་ཕྷེ་Heiner Bielefeldtལགས་ཀྱིས། ཁ་སང་གསར་འགོད་ལྷན་ཚོགས་ཐོག་རྒྱ་ནག་གཞུང་གིས་བོད་དང་ཤིན་ཅང་ལྟ་བུའི་གྲངས་ཉུང་མི་རིགས་ལ་དྲག་གནོན་སུན་གཙེར་བཟོི་བཞིན་པའི་སེམས་འཚབ་རང་བཞིན་གྱི་ལོ་རྒྱུས་མང་དག་ཅིག་ལུང་འདྲེན་གནང་སྟེ། རྒྱ་ནག་གཞུང་གི་བྱ་སྤྱོད་ལ་སྐྱོན་བརྗོད་གནང་ཡོད་པ་དང་། རྒྱ་ནག་གཞུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་ཐད་སྟངས་འཛིན་བྱེད་བཞིན་པ་དེ་ནི་སྤྱི་ཚོགས་དེའི་ཆོས་དད་ཀྱི་རང་དབང་ལ་གཏོར་བཤིག་བཏང་བ་དང་། མི་རིགས་ནང་ཁུལ་འགལ་ཟླ་བཟོ་བ། ཆེད་མངགས་དབྱེ་འབྱེད་བཟོས་པ་དེ་ནི་ཆབ་སྲིད་ཀྱི་སྟངས་འཛིན་གྱི་བྱ་སྤྱོད་ཡིན་པའི་སྐྱོན་བརྗོད་གནང་བ་དང་། ཡང་རྒྱ་ནག་གཞུང་གིས་ཤིན་ཅང་ལ་འཛིན་པའི་སྲིད་ཇུས་ལའང་སྐྱོན་བརྗོད་གནང་འདུག
རྒྱ་ནག་གཞུང་གིས་ཤིན་ཅང་དུ་ཡུ་གུར་མི་རིགས་ལ་འཛིན་པའི་སྲིད་ཇུས་ཀྱིས་གྲངས་ཉུང་མི་རིགས་ལ་སུན་གཙེར་དང་འཇིགས་སྣང་སྐུལ་བའི་ཧ་ཅང་ཚབས་ཆེའི་དོན་རྐྱེན་བྱུང་བ་གསལ་འདོན་གནང་སྟེ་དེ་ནི་རྒྱ་ནག་གིས་ཡུ་གུར་བར་འཛིན་པའི་བྱ་སྤྱོད་ནི་གལ་ཆེའི་གནད་དོན་ཞིག་ཡིན་ཞིང་། ངས་ཚབས་ཆེའི་སུན་གཙེར་བཟོ་བའི་དོན་རྐྱེན་མང་པོ་ཞིག་གོ་ཐོས་བྱུང་། དཔེར་ན། ཁ་ཆེའི་སྙུངས་གནས་སྐབས་དད་ལྡན་ན་གཞོན་ལ་འཇིགས་སྣང་སྐུལ་ཏེ་སྙུངས་གནས་སྲུང་མི་དགོས་པ་བཟོས་པ་ལྟ་བུ་རེད། དེ་བཞིན་ཤིན་ཅང་གི་གྲོང་ཁྱེར་འགའ་ཞིག་ནང་ཁ་ཆེའི་གྱོན་གོས་ལ་ཚད་བཀག་གཏན་འབེབས་བཟོས་པ་དང་། ལྟེ་གནས་གྲོང་ཁྱེར་ཨུ་ལུ་མུ་ཆི་ལ་ན་ནིང་ལོ་མཇུག་ནས་བཟུང་སྤྱི་སྤྱོད་ཁྲོམ་ལམ་སོགས་སུ་བེུད་ཀྱི་གདོང་ཁེབས་གྱོན་མི་ཆོག་པ་བཀག་འགོག་བྱས་ཡོད་པ་རེད།
ད་དུང་གསལ་བསྒྲགས་ནང་བཀོད་པར་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་འཛིན་ལྷན་ཁང་གིས་དངོས་སུ་རྒྱ་ནག་ལ་འཚམས་འདྲི་བསྐྱོད་རྒྱུའི་འབྲེལ་ཡོད་རེ་སྐུལ་བྱས་དོན་ལ་ད་བར་འཕེལ་མེད་རང་སོར་ལུས་ཡོད་པ་རེད། རྒྱ་ནག་གཞུང་འདི་ཉིད་ཕྱོགས་མང་པོ་ཞིག་གི་ཐད་རིམ་འདས་ཀྱི་སྟོབས་ཤུགས་ལྡན་ཡོད་ནའང་དམངས་གཙོའི་ཁྲིམས་མཐུན་རང་བཞིན་གྱི་ཐད་ཉམས་མྱོང་ཞན་པོ་ཡིན་པ་གསལ་པོར་མངོན་གྱི་ཡོད་པ་རེད་ཅེས་བཀོད་ཡོད་འདུག

གསར་འགོད་པ་འཇམ་དཔལ་ཕུན་ཚོགས།