འགྲོ་བ་མིའི་ཐོབ་ཐང་ཐད་རྒྱ་ནག་ལ་སྐྱོན་བརྗོད།

༄༅༎ཨ་རིའི་ཕྱི་སྲིད་དྲུང་ཆེ་ཕྱག་རོགས་མཀལ་སྤོས་ནར་གྱིས་རྒྱ་ནག་ནང་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནས་སྟངས་ཡར་རྒྱས་འགྲོ་རྒྱུའི་ཚབ་ཛ་དྲག་ཆེ་རུ་འགྲོ་བཞིན་ཡོད་སྐོར་རྒྱ་ནག་གཞུང་ལ་སྐྱོན་བརྗོད་ཤུགས་ཆེ་ཞིག་གནང་ཡོད་པ་རེད་

ཕྱི་སྲིད་དྲུང་ཆེ་ཕྱག་རོགས་མཀལ་སྤོས་ནར་ནི་ཨ་རིའི་གཞུང་གི་རྒྱལ་སྤྱིའི་འགྲོ་བའི་ཐོབ་ཐང་སྲུང་སྐྱོབ་ཀྱི་ལས་དོན་འགན་འཁུར་བ་དེ་ཡང་ཡིན་ཞིང་ ཁོང་གིས་དབུ་ཁྲིད་པའི་ཨ་རིའི་གཞུང་གི་དཔོན་རིགས་ཁག་ཅིག་དང་རྒྱ་ནག་གཞུང་གི་ཕྱི་འབྲེལ་དཔོན་རིགས་ཁྲེན་ཞུས་ཟེར་བའི་འགོ་ཁྲིད་འོག་རྒྱ་གཞུང་དཔོན་རིགས་ཁག་ཅིག་ད་རེས་ཉིན་གཉིས་རིང་རྒྱ་ནག་གི་རྒྱལ་ས་པི་ཅིང་ནང་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནད་དོན་སྐོར་ལྷན་ཚོགས་གནང་ཡོད་ཅིང་ ལྷན་ཚོགས་ཐོག་ཨ་རིའི་གཞུང་གིས་ཉེ་བའི་ཆར་རྒྱ་ནག་གཞུང་གིས་རྩོམ་པ་པོ་དང་སྒྱུ་རྩལ་བ་ ཁྲིམས་རྩོད་པ་དང་གཞན་ཡང་དམངས་གཙོ་དོན་གཉེར་བ་སོགས་ལ་དྲག་གནོན་ཇེ་ཆེར་བྱེད་བཞིན་པ་དེ་འཕྲལ་དུ་མཚམས་འཇོག་དགོས་པའི་དགོས་དོན་བཏོན་ཡོད་ནའང་རྒྱ་ནག་གཞུང་གིས་དེར་དང་ལེན་གནང་གི་་མེད་པས་གནས་ཚུལ་ཐོན་ཡོད་པ་རེད་

ཨ་རིའི་ཕྱི་སྲིད་དྲུང་ཆེ་ཕྱག་རོགས་མཀལ་སྤོས་ནར་ཡིས་ཉེ་བའི་གཟའ་འཁོར་གྱི་ནང་རྒྱ་ནག་ནང་མང་ཚོགས་ཀྱི་འགྲོ་བ་མིའི་ཐོབ་བརྩི་མེད་རྡོག་རོལ་དུ་བཏང་བའི་དོན་རྐྱེན་དེ་ཛ་དྲག་ཆེ་རུ་ཕྱིན་ཡོད་ལ་ ཉིན་ཤས་ཀྱི་གྲོས་མོལ་ནང་དུའང་ང་ཚོས་གླེང་སློང་བྱ་ཡུལ་གཙོ་བོ་ཛ་དྲག་གི་གནས་སྟངས་དེའི་སྐོར་བྱ་རྒྱུ་བྱུང་ཞེས་གསུངས་ཡོད་པ་རེད་

གནས་ཚུལ་ཐོན་ཁུངས་ལ་གཞིགས་ན་ ཨ་རིའི་གཞུང་གི་དཔོན་རིགས་ཚོས་རྒྱ་ནག་གཞུང་གིས་བོད་དང་ཤིང་ཅང་གི་མངའ་ཁུལ་ལ་འཛིན་བཞིན་པའི་མ་འོས་པའི་སྲིད་བྱུས་དང་ དེ་བཞིན་རྒྱ་ནག་ནང་རྩོམ་པ་པོ་དང་ཁྲིམས་རྩོད་པ་སྒྱུ་རྩལ་བ་འགྲོ་བ་མིའི་ཐོབ་ཐང་དོན་གཉེར་བ་བཅས་ལ་བཀག་སྡོམ་གྱིས་དྲག་གནོན་བྱེད་བཞིན་པ་རྣམས་འཕྲལ་དུ་མཚམས་འཇོག་དགོས་པའི་གླེང་སློང་ཤུགས་ཆེ་གནང་ཡོད་པ་་གསལ་གྱི་ཡོད་པ་རེད་

དེ་ལྟར་ཡང་རྒྱ་ནག་གཞུང་གི་ཚུར་ལེན་ལན་འཆར་འདི་རྒྱུན་ལྟར་རྒྱ་ནག་གཞུང་གིས་ཕྱིའི་རྒྱལ་ཁབ་ནས་འགྲོ་བ་མིའི་ཐོབ་ཐང་གི་གནད་དོན་བེད་སྤྱོད་ཀྱིས་རྒྱ་ནག་གི་ནང་སྲིད་ལ་ཐེ་བྱུས་བྱ་རྒྱུར་ངོས་ལེན་གཏན་ནས་ཐུབ་ཐབས་མེད་སྐོར་གཏམ་བཤད་བྱེད་ཀྱི་ཡོད་པ་རེད་

རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཁག་གིས་ཨ་རིའི་གཞུང་གི་རྒྱ་ནག་ལྷན་འགྲོ་བ་མིའི་ཐོབ་ཐང་གི་གནས་སྟངས་ལེགས་བཅོས་ཀྱི་ཆེད་གྲོས་མོལ་ལ་བཞུགས་བཞིན་པ་འདི་གྲུབ་འབྲས་ཐོན་རྒྱུ་མེད་ན་གྲོས་མོལ་དེ་རིགས་ཞུ་དགོས་མིན་རྣོ་བསམ་སྐྱར་དུ་གཏོང་དགོས་ཀྱི་རེད་ཅེས་གསུངས་ཀྱི་ཡོད་པ་རེད་