ཨ་རིའི་གཞུང་ཚབ་པ་བོད་ནང་རྟོགས་ཞིབ་ཏུ་ཕེབས་དགོས།

༄༅༎ཕྱི་ཟླ་བཅུ་གཅིག་པའི་ཚེས་༡༧ཉིན་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སིའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མི་ཡིན་པ་ཨ་རིའི་གྲོས་ཚོགས་ཀྱི་འཐུས་མི་སྐུ་ཞབས་ཕེརེང་ལྦུཕ་དང་ཇེམསི་མེ་ག་ལྦན། ཇོ་སེཕ་པིཏ་སི་བཅས་ཀྱིས་རྒྱ་ནག་ནང་ཡོད་པའི་ཨ་རིའི་གཞུང་ཚབ་པ་སྐུ་ཞབས་གེ་རི་ལོཀ་བོད་ནང་གི་བོད་མི་ཚོའི་དངོས་ཡོད་གནས་སྟངས་ཇི་ཡིན་གསལ་རྟོགས་ཡོང་ཆེད་ བོད་ནང་གཟིགས་སྐོར་དུ་ཕེབས་དགོས་པའི་དགོས་འདུན་ཞུ་སྙན་ཞིག་ཕུལ་ཡོད་པའི་སྐོར་བོད་མིའི་དྲ་གནས་ཐོག་གནས་ཚུལ་འཁོད་འདུག་
ཞུ་སྙན་དེའི་ནང་ཉེ་ལམ་བཙན་བྱོལ་བོད་མིའི་སྒྲིག་འཛུགས་ཀྱི་བཀའ་ཁྲི་མཆོག་དང་ ཀིརྟི་རིན་པོ་ཆེ་མཆོག་གིས་ཨ་རིའི་ཊོམ་ལན་ཊོ་སིའི་འགྲོ་བ་མིའི་ཐོབ་ཐང་ལྷན་ཁང་དུ་བོད་དོན་ཉན་ཞིབ་སྐབས་གྲོས་ཚོགས་འཐུས་མི་རྣམས་ལ་སེམས་འགུལ་ཐེབས་ཚུལ་དང་ ཉན་ཞིབ་སྐབས་བོད་ནང་དུ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག་བོད་མི་ཚོར་དཀའ་སྡུག་མྱོང་བཞིན་པ་མ་ཟད་ཉེ་ལམ་རང་ལུས་མེར་བསྲེག་བཏང་སྟེ་རྒྱ་ནག་གཞུང་ལ་ངོ་རྒོལ་མི་བྱེད་ཐབས་མེད་ཆགས་པའི་གནས་སྟངས་དེའི་འོག་ཨ་རིའི་གཞུང་ཚབ་མཆོག་གིས་བོད་ནང་གཟིགས་སྐོར་བསྐྱོད་ཐོག་བོད་མི་ཚོར་རྒྱབ་སྐྱོར་གྱི་རྣམ་པ་བསྟེན་དགོས་པའི་ཛ་དྲག་གི་འབོད་སྐུལ་ཞུས་ཡོད་པའི་ཁར་བོད་མདོ་སྨད་རྔ་པ་ཀིརྟི་དགོན་པའི་ནང་དངོས་ཡོད་གནས་སྟངས་གསལ་རྟོགས་ཆེད་སྐུ་ཚབ་འཐུས་མི་གཏོང་དགོས་པའི་འབོད་སྐུལ་ཡང་གནང་འདུག