ལུགས་མཐུན་ཁྲིམས་ཞིབ་མེད་པའི་སྲོག་ཐོག་ལ་སྐྱོན་བརྗོད།

༄༅༎འཛམ་གླིང་མཉམ་འབྲེལ་རྒྱལ་ཚོགས་ནང་སྐུ་ཚབ་མེད་པའི་རྒྱལ་ཁབ་དང་མི་དམངས་ཀྱི་མཐུན་ཚོགས་ཀྱིས་ཉེ་ཆར་ཟླ་བ་འདིའི་ཚེས་ཉི་ཤུ་ཉིན་བོད་ནང་བོད་མི་བཞི་སྲོག་ཐོག་བཏང་བའི་གནས་ཚུལ་ཕྱི་ལ་ཁྱབ་པ་དེར་བློ་འཚབ་དང་འབྲེལ་རྒྱ་ནག་གིས་བོད་མི་དེ་རྣམས་ལ་ལུགས་མཐུན་ཁྲིམས་ཞིབ་མ་བྱས་པ་དང་སྲོག་ཐོག་གི་ཉེས་ཆད་བཏང་ཡོད་པར་སྐྱོན་བརྗོད་དྲག་པོ་གནང་བཞག

མཉམ་འབྲེལ་རྒྱལ་ཚོགས་ནང་སྐུ་ཚབ་མེད་པའི་རྒྱལ་ཁབ་དང་མི་དམངས་ཀྱི་མཐུན་ཚོགས་ཀྱི་དྲུང་ཆེ་མཱ་རི་ནོ་སྦུ་སི་རྡ་ཆིན་གྱིས་ད་རེས་བོད་མི་བཞི་སྲོག་ཐོག་བཏང་བའི་གནད་དོན་དེ་ནི་རྒྱ་ནག་གིས་ཆེད་མངགས་བྱས་པའི་ཕྱི་གསལ་ནང་གསལ་མེད་པའི་ཁྲིམས་ལུགས་ཀྱི་འབྱུང་འབྲས་ཤིག་ཡིན་པ་དང་དབང་ཆ་གཅིག་བསྡུས་རིང་ལུགས་འོག་སྲོག་ཐོག་གཏོང་རྒྱུ་སྔ་ས་ནས་ཐག་གཅོད་བྱས་ཟིན་པ་དང་ཞུ་གཏུགས་བྱེད་མཁན་ཁྲིམས་རྩོད་པར་འཇིགས་སྣང་སྐུལ་བ། སྲོག་ཐོག་གཏོང་མཁན་ག་དུས་ཡིན་ནས་གྲ་སྒྲིག་ཨང་གསར་ངང་ཡོད་པའི་དབང་ཆ་གཅིག་བསྡུས་ལམ་ལུགས་ཐོག་རྟེན་པའི་རྒྱ་ནག་གཞུང་གིས་རང་དབང་དང་དྲང་བདེན་གྱི་ཁྲིམས་དཔྱོད་ལམ་ལུགས་ལ་རྩིས་མེད་རྡོག་རོལ་བཏང་བའི་ཡིད་སྐྱོའི་དཔེ་ཚོན་ཞིག་རེད་ཅེས་རྒྱ་གཞུང་གིས་ཉེ་ཆར་བོད་མི་བཞི་ལ་ཁྲིམས་དཔྱོད་སོགས་གང་ཡང་མ་བྱས་པར་གློ་བུར་སྲོག་ཐོག་བཏང་བའི་བྱ་སྤྱོད་ལ་རྒྱལ་ཚོགས་ནང་སྐུ་ཚབ་མེད་པའི་རྒྱལ་ཁབ་དང་མི་དམངས་ཀྱི་མཐུན་ཚོགས་ཀྱི་དྲུང་ཆེ་མཱ་རི་ནོ་སྦུ་སི་རྡ་ཆིན་གྱིས་སྐྱོན་བརྗོད་གནང་འདུག

ནེ་ཐར་ལེན་ཌིའི་གྲོང་ཁྱེར་ཧེག་ནང་སྤེལ་གནང་བའི་གོང་ཞུས་མཐུན་ཚོགས་ཀྱི་གསལ་བསྒྲགས་དེའི་ནང་རྒྱ་ནག་གིས་ཉེ་བའི་ཆར་ཤར་ཏུར་ཀིསྟཱན་དང་བོད་ནང་སྲོག་ཐོག་བཏང་བའི་གནད་དོན་དེ་ནི་རྒྱ་ནག་དམར་ཤོག་ཚོགས་པ་བཙུགས་ནས་ད་ལོ་ལོ་དྲུག་བཅུ་འཁོར་བའི་སྐབས་སུའང་བོད་དང་ཤར་ཏུར་ཀིསྟཱན་ལྟ་བུའི་མངའ་ཁུལ་ནང་མི་རིགས་རྩགཏོར་གཏོང་བའི་རྒྱ་ནག་གི་སྲིད་བྱུས་དེ་མཚམས་འཇོག་བྱ་རྒྱུ་སྟར་ཞོག་ དེར་འགྱུར་བ་ཙམ་ཡང་གཏོང་རྒྱུའི་འདོད་པ་མེད་པའི་རྟགས་མཚན་གསལ་པོ་ཞིག་ཡིན་སྐོར་སྐྱོན་བརྗོད་གནང་བཞག།