རྒྱལ་ཚོགས་ནས་མའོ་ཚོགས་པའི་དྲག་འཐབ་པར་ཉེན་བརྡ།

༄༅༎འཛམ་གླིང་མཉམ་སྦྲེལ་རྒྱལ་ཚོགས་ཀྱི་དམིགས་བསལ་དོན་གཅོད་ཀྱིས་དམར་ཤོག་མའོ་ཚོགས་པའི་དྲག་འཐབ་པ་རྣམས་སྡོད་སྒར་ཁག་ནས་ཕྱིར་འདོན་ཏེ་སྲིད་དོན་ཚོགས་ཆེན་དུ་བཞུགས་ན་འགྲིག་མིན་གྱི་འགག་ཆ་གནང་འདུག

དམར་ཤོག་མའོའི་ཚོགས་པའི་སྲིད་དོན་ཚོགས་ཆེན་དེའི་ནང་མའོའི་དྲག་འཐབ་པ་སྡོད་སྒར་ཁག་ནས་འཛམ་གླིང་མཉམ་སྦྲེལ་རྒྱལ་ཚོགས་ཀྱི་དོན་གཅོད་ཀྱི་གཟིགས་རྟོགས་འོག་གནས་སྡོད་བྱེད་བཞིན་པ་རྣམས་ཕྱིར་ཐོན་ཏེ་སྲིད་དོན་ཚོགས་པའི་ཚོགས་ཆེན་ནང་བཞུགས་མི་ཆོག་པའི་གྲོས་མཐུན་དང་འགལ་འཇོལ་འགྲོ་གི་ཡོད་པའི་སྐོར་འཛམ་གླིང་མཉམ་སྦྲེལ་རྒྱལ་ཚོགས་ཀྱི་དམིགས་བསལ་དོན་གཅོད་ཀྱིས་འགྲེལ་བརྗོད་གནང་ཡོད་པ་རེད།   

འོན་ཀྱང་གསར་འགྱུར་བརྒྱུད་ལམ་ཁག་ནང་དམར་ཤོག་མའོ་ཚོགས་པའི་དྲག་འཐབ་པ་མི་གྲངས་ཆིག་སྟོང་སྐོར་དམག་ཤོག་མའོ་ཚོགས་པའི་ཚོགས་ཆེན་དུ་ཚོགས་བཞུགས་བྱེད་འཆར་ཡོད་པའི་གནས་ཚུལ་ཐོན་ཡོད་པ་རེད། འཛམ་གླིང་མཉམ་སྦྲེལ་རྒྱལ་ཚོགས་ཀྱི་དམིགས་བསལ་དོན་གཅོད་ཀེ་རིན་ལེན་གེ་རེན་གྱིས་ཡིག་ངག་གཉིས་ཐོག་གནང་བའི་བརྡ་འཕྲིན་གྱི་དོན་སྙིང་ནི། དམར་ཤོག་མའོའི་ཚོགས་པ་དང་དེ་མིན་སྲིད་དོན་ཚོགས་པ་ཚང་མས་བལ་ཡུལ་ནང་ཞི་འགྲིག་གི་ལས་དོན་ལ་དོ་ཕོག་འགྲོ་གཞིའི་རིགས་བྱས་ན་འགྲིག་མིན་གསལ་བཏོན་གནང་ཡོད་པ་རེད།   

དམར་ཤོག་མའོའི་ཚོགས་པའི་དྲག་འཐབ་པ་རྣམས་གཞུང་དམག་ཁོངས་ཟླ་བསྒྲིལ་གཏོང་འཆར་ཡང་ད་ཕན་བལ་ཡུལ་གཞུང་དམག་དང་དམར་ཤོག་མའོའི་ཚོགས་པའི་དབར་མའོའི་དྲག་འཐབ་པ་རྣམས་ཀྱི་འཚོ་རྟེན་མདུན་ལམ་བཟོ་ཕྱོགས་ཐད་མི་མཐུན་པའི་འགལ་ཟླ་ཡོད་མུས་རེད། ལྷག་པར་དུ་དེང་བལ་ཡུལ་ནང་གཞུང་འཛིན་སྲིད་བློན་ལས་གནས་ནས་དགོངས་ཞུ་གནང་སྟེ་བར་བརྒལ་གཞུང་གིས་འཛིན་སྐྱོང་བྱེད་བཞིན་པའི་སྐབས་འདིར་དམར་ཤོག་མའོ་ཚོགས་པས་ཚོགས་ཆེན་ནང་མའོའི་དྲག་འཐབ་པ་རྣམས་དེ་སྔ་ཕྱི་ལོ་༢༠༠༦་ལོར་སྲིད་དོན་ཚོགས་པ་རྣམས་ཀྱིས་བཞག་པའི་གྲོས་མཐུན་གྱི་འབྲུ་དོན་ལ་འགལ་འཛོལལ་དང་། རང་ཉིད་སོ་སོའི་སྡོད་སྒར་གྱི་སྒྲིག་གཞིར་བརྩི་མེད་བཏང་སྟེ་མའོའི་དམག་ཤོག་ཚོགས་པའི་ཚོགས་ཆེན་དུ་བཞུགས་པ་ཡིན་ན། བལ་ཡུལ་གྱི་བདེ་འཇགས་དང་ཞི་འགྲིག་ལས་དོན་ལ་དོ་ཕོག་འགྲོ་ཉེན་ཡོད་པ་རེད༎