དབྱིན་ཡུལ་གྲོས་ཚོཌ་འཐུས་མིས་རྡ་སར་འཚམས་གཟིགས།

༄༅༎བཞུགས་སྒར་རྡ་རམ་ས་ལར་འཚམས་འདྲིར་ཕེབས་པའི་དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་སྐུ་ཚབ་འཐུས་མི་ཚོས་བཞུགས་སྒར་དུ་ཕེབས་པའི་མྱོང་ཚོར་སྐོར་གསར་འགོད་གསལ་བསྒྲགས་ཤིག་སྐོང་ཚོགས་གནང་ཡོད་པའི་སྐོར་དེ་རིང་བཙན་བྱོལ་བོད་མིའི་དྲ་རྒྱའི་ཐོག་གནས་ཚུལ་སྤེལ་ཡོད་པ་རེད།
གསར་འགོད་གསལ་བསྒྲགས་ཀྱི་འདུ་འཛོམས་དེའི་ཐོག་ཕྱི་ནང་གི་གསར་འགོད་པ་༢༠ལྷག་ཕེབས་ཡོད་པ་མ་ཟད། བཙན་བྱོལ་བོད་མིའི་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང༌། དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་ལགས་མཉམ་ཞུགས་གནང་ཡོད་ཅིང༌། དབྱིན་ཡུལ་ནས་འཚམས་འདྲིར་ཕེབས་པའི་སྐུ་ཚབ་ཚོགས་པ་དེའི་ནང་དུ་དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་སྐུ་ཚབ་ལྔ་དང༌། བོད་ཀྱི་ཚོགས་པ་ཞེས་པ་ནས་སྐུ་ཚབ་གཉིས་ཕེབས་ཡོད་པ་རེད། སྐབས་དེར་སྤྱི་འཐུས་ཚོགས་གཙོ་མཆོག་གིས་གསར་འགོད་ལྷན་ཚོགས་དེའི་ཐོག་གསུང་བཤད་གནང་བའི་ནང༌། བོད་དོན་རྒྱབ་སྐྱོར་བ་སྐུ་ཚབ་རྣམ་པ་ངོ་སྤྲོད་གནང་བ་དང་སྦྲགས་བོད་མི་དམངས་སྤྱི་འཐུས་ལྷན་ཚོགས་དང༌བཀའ་ཤག  ཕྱི་དྲིལ་ལས་ཁུངས་བཅས་ནས་འཛམ་གླིང་གི་རྒྱལ་ཁབ་སོ་སོའི་ནང་དུ་ཡོད་པའི་བོད་དོན་རྒྱབ་སྐྱོར་གནང་མཁན་གྲོས་ཚོགས་ཀྱི་འཐུས་མི་རྣམས་བཞུགས་སྒར་དུ་གདན་ཞུ་གནང་སྟེ། བོད་ཀྱི་གནད་དོན་ཐོག་གོ་བསྡུར་གནང་རྒྱུའི་ལས་དོན་གནང་བཞིན་ཡོད་པ་ནི། ཉིན་ཤས་གོང་དེར་ཉི་ཧོང་གི་གྲོས་ཚོགས་ཀྱི་བོད་དོན་རྒྱབ་སྐྱོར་བ་སྐུ་ཚབ་གཉིས་དབུས་པའི་སྐུ་ཚབ་ཁག་ཅིག་བཞུགས་སྒར་དུ་ཕེབས་ཡོད་པ་དང༌། དེ་བཞིན་དུ་ཕྱི་ཟླ་དགུ་པའི་ཟླ་མཇུག་དང་བཅུ་པའི་མགོ་སྟོད་དུ་ཨི་ཊ་ལའི་གྲོས་ཚོགས་ཀྱི་འཐུས་མི་གསུམ་དང༌། བོད་པའི་གྲོགས་པོ་ཁག་ཅིག ཀྱང་ད་རེས་དབྱིན་ཡུལ་གྱི་གྲོས་ཚོགས་ཀྱི་བོད་དོན་རྒྱབ་སྐྱོར་བ་སྐུ་ཚབ་ལྔ་ཕེབས་ཡོད་ཅིང༌། དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་དང་བོད་མི་དམངས་སྤྱི་འཐུས་ལྷན་ཚོགས་དབར་གྲོས་ཚོགས་ཀྱི་འཐུས་མི་འགྲོ་འོང་གི་ལས་གཞི་དེ་༢༠༠༦ ནས་འགོ་བཙུགས་ཡོད་པའི་ངོ་སྤྲོད་གནང་ཡོད་པ་རེད། དེ་ནས་དབྱིན་ཡུལ་གྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གིས། ད་རེས་བཞུགས་སྒར་དུ་ཕེབས་ཏེ་སྣེ་ལེན་གཟབ་རྒྱས་གནང་བ་ཐུགས་རྗེ་ཆེ་གསུང་བ་མ་ཟད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མཇལ་ཁ་ཐོབ་པ་དེ་ནི་གནད་དོན་གལ་འགངས་ཆེན་པོ་ཞིག་ཏུ་ངོས་འཛིན་ཞུ་གི་ཡོད་ཅེས་དང༌། ཁོང་ནི་༢༠༠༧ ལོར་༧གོང་ས་མཆོག་མཇལ་ཁ་དམིགས་བསལ་ཐོབ་ཏེ་བཀའ་མོལ་ཞུ་རྒྱུའི་གོ་སྐབས་བྱུང་བ་ནས་འགྱུར་ལྡོག་ཆེན་པོ་བྱུང་བ་དང༌། ད་རེས་སླར་ཡང་མཇལ་ཁའི་གོ་སྐབས་ཐོབ་ཏེ་བཀའ་མོལ་ཞུ་རྒྱུ་བྱུང་བའི་ནང༌། གཙོ་བོ་དོན་ཚན་གཉིས་ཡིན་ཞིང༌། བོད་ནང་གི་བོད་རིགས་སློབ་ཕྲུག་རྣམས་ལ་དབྱིན་ཇིའི་གཙུག་ལག་སློབ་གཉེར་ཁང་དུ་སློབ་སྦྱོང་ཆེད་སློབ་ཡོན་རོགས་རམ་གནང་རྒྱུའི་སྐོར་དང༌། གཉིས་པ། རྒྱ་ནག་མི་དམངས་དང་འབྲེལ་བ་བྱས་ཏེ་འདས་ཟིན་པའི་བོད་ཀྱི་གནས་སྟངས་རྣམས་རྒྱ་ནག་མི་དམངས་ཚོར་གོ་རྟོགས་སྤེལ་རྒྱུའི་ལས་དོན་ཐོག་བཀའ་བསྡུར་ཞུས་པ་ཡིན་ཞེས་གསུང་ཡོད་པ་རེད།