ལྡི་ལིར་བོད་སྒར་ཉེ་འཁྲིས་ནས་བོད་མི་གཉིས་བསད་འདུག

ལྡི་ལི་བོད་སྒར་བསམ་ཡས་གླིང་གི་ཉེ་འཁྲིས་སུ་བོད་མི་གཉིས་བསད་པའི་དོན་རྐྱེན་བྱུང་ཡུལ། ༢༠༡༥།༢།༡༢

རྒྱ་གར་ལྡི་ལི་བོད་སྒར་བསམ་ཡས་གླིང་གི་ཉེ་འཁྲིས་སུ་བོད་མི་གཉིས་བསད་པའི་དོན་རྐྱེན་བྱུང་བ་རྒྱུ་རྐྱེན་གསལ་ཁ་མི་འདུག
དེ་ཡང་ཟླ་བ་འདིའི་ཚེས་༡༢ཉིན་གྱི་དགོང་དྲོར་ལྡི་ལི་བོད་སྒར་བསམ་ཡང་གླིང་གི་ཉེ་འགྲམ་ནས་བོད་མི་གཅིག་བསད་པ་དང་། གཅིག་ལ་རྨས་སྐྱོན་ཚབས་ཆེན་ཕོག་ཡོད་པའི་གནས་ཚུལ་དྲ་ལམ་གསར་ལམ་ཁག་ནང་གནས་ཚུལ་ཐོན་པར་གཞིགས་ན། བོད་མི་དེ་གཉིས་ནི་དགེ་འདུན་པ་རྔ་པ་ཆོས་གྲགས་དང་། མི་སྐྱ་སྤྲོ་ཚིགས་ཆོས་གྲགས་གཉིས་ཡིན་འདུག་ལ་རྔ་བ་ཆོས་གྲགས་ཀྱི་སྐེ་ནས་ཁྲག་མང་པོ་བཞུར་བཞིན་སྐབས་ཐོག་དེར་གྲོངས་ཡོད་པ་མ་ཟད། སྤྲོ་ཚིགས་ཆོས་གྲགས་ཀྱི་ཐོག་གྲིས་ཐེངས་མ་འགའ་ཤས་བསྣུན་ཡོད་པའི་གནས་ཚུལ་བྱུང་ཡོད་པ་རེད།
འདི་ག་རླུང་འཕྲིན་ཁང་ནས་ས་གནས་ལ་འབྲེལ་བྱས་སྐབས། དོན་རྐྱེན་དེ་བྱུང་བ་དངོས་ཡོད་རེད། འོན་ཀྱང་ད་ཆ་ཁོ་གཉིས་ཀ་གྲོངས་ཚར་དུས་ཁོ་གཉིས་ཕན་ཚུན་དམར་འཛིང་བྱས་བ་དང་། ཡང་ན་གཞན་གྱིས་བསད་པ་སོགས་ཚོད་དཔག་ཙམ་ལས་རྒྱུ་རྐྱེན་གང་ཡིན་ཁ་གསལ་གང་ཡང་མི་འདུག་ལ། ཕུང་པོ་ཡང་རྒྱ་གར་ཉེན་རྟོག་པས་རྩིས་བླངས་ཀྱིས་བརྟག་དཔྱད་བྱེད་བཞིན་པ་ཡིན་འདུག
གནས་ཚུལ་ལྟར་། དོན་རྐྱེན་དེ་བྱུང་ས་ནི་ལྡི་ལི་བོད་སྒར་བསམ་གཡས་གླིང་གཞི་ཆགས་གསར་བའི་སྤྱི་སྤྱོད་རླངས་འཁོར་འབབ་ཚུགས་ཕ་རོལ་གྱི་ཟམ་ལམ་ཉེ་འགྲམ་ཞིག་ཏུ་ཡིན་པ་དང་། དོན་རྐྱེན་བྱུང་ནས་དུས་ཡུན་གང་མཚམས་རྗེས་ནས་མ་གཏོགས་ས་གནས་བོད་མི་དང་། ཉེན་རྟོག་པ་སོགས་ཀྱིས་ཤེས་རྟོགས་བྱུང་མེད་པ་རེད་འདུག
ཡང་ཕ་ཡུལ་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། དགེ་འདུན་པ་དེའི་མིང་ལ་བསྟན་འཛིན་ཆོས་གྲགས་དང་། མི་སྐྱ་དེའི་མིང་ལ་བློ་བཟང་ཆོས་གྲགས་ཟེར་གྱི་ཡོད་འདུག ས་གནས་སུ་གྲི་གཅིག་ལས་མེད་པ་སོགས་ཀྱི་རྒྱུ་མཚན་ལ་བརྟེན་ཁོང་གཉིས་འཁྲུག་འཛིང་ཤོར་རྗེས་གཅིག་བསད་པ་དང་། གཅིག་གིས་སོ་སོའི་སྐེ་ལ་གྲིས་རྒྱབ་ནས་རང་ཤི་རྒྱབ་ཡོད་པའི་ཚོད་དཔག་བྱེད་ཀྱི་ཡོད་འདུག། འདས་གྲོངས་གྱུར་པ་སྤྲོ་ཚིགས་ཆོས་གྲགས་ལགས་ནི་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་གཞོན་པ་ཡིན་འདུག

གསར་འགོད་པ་ཀླུ་འབུམ།

འབྲེལ་ཡོད་གནས་ཚུལ་གཤམ་ལ་འདི་གའི་གསར་འགོད་པ་སངས་རྒྱས་རྒྱ་མཚོ་ཡིས་བཏང་བར་གསན་རོགས༎

གསར་འགོད་པ་སངས་རྒྱས་རྒྱ་མཚོ།