བལ་ཡུལ་ནང་བོད་པའི་བེུད་བཙན་གཡེམ་མཚམས་འཇོག་དགོས།

༄༅༎བཙན་བྱོལ་ནང་གི་བོད་ཀྱི་བུད་མེད་ལྷན་ཚོགས་ཀྱིས་བལ་ཡུལ་ཉེན་རྟོག་པས་བལ་ཡུལ་ནང་བོད་ནས་བྲོས་བྱོལ་ལ་ཕེབས་མཁན་བོད་པའི་བུད་མེད་ཚོ་འཛིན་བཟུང་དོ་དམ་སྐབས་བཙན་གཡེམ་གཏོང་མཚམས་འཇོག་དགོས་པའི་དགོས་འདུན་བསྟོན་གནང་འདུག།

ཁ་ས་བོད་ཀྱི་བུད་མེད་ལྷན་ཚོགས་ཀྱིས་ནིའུ་ཡོཀ་དུ་འཛམ་གླིང་མཉམ་སྦྲེལ་རྒྱལ་ཚོགས་ཀྱི་བུད་མེད་ལ་དབྱེ་འབྱེད་ཕྱོགས་ལྷུང་མཚམས་འཇོགས་ཀྱི་ལྷན་ཚོགས་ཐེངས་༤༩པའི་ཐོག། བལ་ཡུལ་ནང་བོད་པའི་བུད་མེད་ཚོར་བལ་པོའི་ཉེན་རྟོག་པས་གང་བྱུང་བཙན་གཡེམ་བྱེད་ཀྱི་ཡོད་པའི་ཞུ་སྙན་ཞིག་ཕུལ་གནང་བཞག། ཤོག་གྲངས་༡༠བྱས་པའི་ཞུ་སྙན་དེའི་ནང༌གི་ཞུ་དོན་གཙོ་བོ་དེ་ བལ་པོའི་ཉེན་རྟོག་པས་འཛིན་བཟུང་སྐབས་ལྷག་པར་དུ་བོད་པའི་བུད་མེད་ཚོར་ལྟ་སྟངས་དང་སྐྱོངས་ཚུལ་ཡག་པོ་མེད་པ་སོགས་ བལ་ཡུལ་ནང་བོད་པའི་བུད་མེད་སྐྱབས་གཅོལ་བ་ཚོའི་ཐོབ་ཐང་ལ་བརྩི་སྐུར་ཙ་བ་ནས་བྱེད་ཀྱི་མེད་པའི་གནས་ཚུལ་ཞིབ་ཕྲ་འགྲེལ་བརྗོད་གནང་ཡོད་པ་རེད། དེ་བཞིན་ བུད་མེད་ལ་དབྱེ་འབྱེད་ཕྱོགས་ལྷུང་མཚམས་འཇོག་བྱ་རྒྱུའི་འཛམ་གླིང་མཉམ་སྦྲེལ་རྒྱལ་ཚོགས་ཀྱི་ཚོགས་འདུར་ཕུལ་བའི་ཞུ་སྙན་དེའི་ནང་བོད་ཀྱི་བུད་མེད་ལྷན་ཚོགས་ཀྱིས་ བལ་ཡུལ་གཞུང་ཕྱོགས་ནས་བྲོས་བྱོལ་ལ་ཕེབས་མཁན་བོད་མི་ཚོ་ས་མཚམས་ཁུལ་འཇུ་བཟུང་གིས་རང་ཡུལ་ཕྱིར་ལོག་བཏང་གི་ཡོད་པར་སྐྱོན་བརྗོད་དང་འབྲེལ། བལ་ཡུལ་གཞུང་གིས་ལག་བསྟར་གནང་དགོས་པའི་སློབ་སྟོན་ཁག་བཞི་གནང་འདུག། སློབ་སྟོན་དེ་ཚོའི་ནང་ བལ་ཡུལ་གཞུང་གིས་ཉེན་རྟོག་དཔོན་རིགས་ཚོར་ཞི་བའི་ངོ་རྒོལ་གནང་མཁན་བོད་པའི་བུད་མེད་ཐོག་ཚུལ་མིན་བྱ་སྤྱོད་རིགས་མཚམས་འཇོག་དང་འབྲེལ་ངོ་རྒོལ་བྱེད་མཁན་བོད་པའི་བུད་མེད་ལ་བལ་པོའི་ཉེན་རྟོག་པས་བཙན་གཡེམ་བཏང་བའི་གྱོད་གཞི་ཁག་ལ་རྟོག་ཞིབ་མཐིལ་ཕྱིན་པ་གནང་དགོས་རྒྱུའི་དགོས་འདུན་ཀྱང་བཏོན་གནང་འདུག།

བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་ རྒྱལ་ཚོགས་ཀྱི་འབྲེལ་ཡོད་ཚོགས་ཆུང་ལ་ཕུལ་བའི་ཞུ་སྙན་དེའི་ནང༌། འཛམ་གླིང་མཉམ་སྦྲེལ་རྒྱལ་ཚོགས་དང༌། རྒྱལ་ཚོགས་ཀྱི་བུད་མེད་ཐོག་དབྱེ་འབྱེད་མཚམས་འཇོག་གི་ལྷན་ཚོགས་གཉིས་ནས་ བུད་མེད་ཀྱི་ཐོབ་ཐང་སྲུང་སྐྱོབ་གནང་བའི་རེ་བ་དང་ཡིད་ཆེས་ཡོད་ཅེས་གསུངས་བཞག།