ར་ཧུལ་གན་རྡི་རྒྱ་གར་གྱི་སྲིད་བློན་དུ་འདེམས་རྒྱུར་མང་མོས།

༄༅༎རྒྱ་གར་ནང་མི་མང་གི་བསམ་ཚུལ་བསྡུ་ལེན་གནང་བའི་ནང་ཀོང་གིརེས་སྲིད་དོན་ཚོགས་པའི་ཚོགས་གཙོ་ལྕམ་སོནིཡ་གདིའི་སྲས་ར་ཧུལ་གན་རྡི་རྒྱ་གར་གྱི་སྲིད་བློན་དུ་འདེམས་རྒྱུར་མང་མོས་བྱུང་ཡོད་པ་རེད་

རྒྱ་གར་ནང་མི་མང་གི་བསམ་ཚུལ་བསྡུ་ལེན་གནང་མཁན་གྱི་ཚོགས་པ་གཙོ་བོ་གྲས་ཤིག་གི་གཙོ་འཛིན་སྐུ་ཞབས་ཡོ་གེན་རྡར་ཡ་རྡལྦ་ཡིས་ཀོང་གིརས་ཚོགས་པའི་ནང་ར་ཧུལ་གན་རྡི་མཆོག་ལ་རྒྱབ་སྐྱོར་གནང་མཁན་དེ་བརྒྱ་ཆ་ ༤༢ ཆགས་ཀྱི་ཡོད་སྟབས་ཁོང་ལ་རྒྱབ་སྐྱོར་ཐོབ་བ་བཞིན་སྲིད་དོན་པ་གཞན་སུ་ལའང་མེད་པ་རེད་ཅེས་གསུང་འདུག དལྟའི་རྒྱ་གར་གྱི་ལས་ཐོག་སྲིད་བློན་མན་མོ་ཧན་སིང་མཆོག་གི་གཞུང་དེར་ལྐོག་ཟ་རུལ་སུངས་ཀྱི་དཀའ་རྙོག་དུ་མ་ཡོད་པར་བརྟེན་གོང་ཞུས་མི་མང་གི་བསམ་ཚུལ་བསྡུ་ལེན་དེར་མི་མང་བརྒྱ་ཆ་ ༣༤ ཡིས་ར་ཧུལ་གན་རྡི་འཕྲལ་དུ་སྲིད་བློན་གྱི་ལས་འགན་བཞེས་དགོས་པའི་བསམ་ཚུལ་བཏོན་ཡོད་པ་རེད་ ད་ཐེངས་ཀྱི་རྒྱ་གར་ནང་གི་མི་མང་གི་བསམ་ཚུལ་བསྡུ་ལེན་དེ་ཀོང་གིརེས་ཚོགས་པའི་ཚོགས་གཙོ་ལྕམ་སོའོ་ནི་ཡ་གན་རྡི་མཆོག་གིས་རང་ཉིད་ཀྱི་སྲས་ར་ཧུལ་ལ་ཚོགས་པའི་ལས་དོན་ཐོག་ཕྱག་རོགས་གནང་དགོས་པའི་འབོད་བསྐུལ་གནང་བའི་དུས་སྐབས་དང་ཁོང་རང་ཉིད་སྨན་དོན་གཤག་བཅོས་་གནང་བའི་དུས་སྐབས་དང་མཉམ་འཁེལ་བྱུང་ཡོད་པ་རེད་ དེང་སྐབས་ལྕམ་སོའོ་ནི་ཡ་གན་རྡི་མཆོག་སྨན་ཁང་ནང་སྙུང་བཞིན་པའི་དུས་སྐབས་དེར་དགུང་གྲངས་  ༤༡ ལ་ཕེབས་པའི་ཁོང་གི་སྲས་ར་ཧུལ་གན་རྡི་དང་གཞན་ཚོགས་པའི་མི་བཞི་ཡིས་ཀོང་གིརེས་ཚོགས་པའི་ལས་དོན་ཁག་ལ་བལྟ་རྟོག་གནང་དགོས་པའི་བཀོད་མངགས་གནང་ཡོད་པའི་གནས་ཚུལ་ཐོན་བཞག