རྒྱ་གཞུང་གིས་བོད་མི་མཚོ་སྐྱེས་ཞུ་བ་ཞིག་འཛིན་བཟུང༌བྱས་ཡོད་པ།

༄༅༎ཟླ་འདིའི་ཚེས་༡༣ཉིན། ཁམས་ནག་ཆུ་རྫོང་རྟར་ཆེན་ཤང་ཨག་ཆེན་གྲོང་ཚོ་ནས་ཡིན་པའི་མཚན་ལ་མཚོ་སྐྱེས་ཞུ་བའི་བོད་མི་ཞིག རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་རྗེས། ད་ཆ་ཁོང་གར་སོང་ཆ་མེད་དུ་གྱུར་ཡོད་པ་རེད་འདུག
དེའང་མཚོ་སྐྱེས་ལགས་འཛིན་བཟུང་བྱེད་དགོས་པའི་རྒྱུ་མཚན་ནི། རྒྱ་ནག་གཞུང་གིས་བཙན་དབང་ཐོག་ནས་ས་གནས་མི་དམངས་ཀྱི་འདོད་པ་མེད་བཞིན་དུ་ཤག་རོང་པོ་ཆོས་རྗེའི་ཡང་སྲིད་ཁྲི་འདོན་བྱས་པ་དེར། མཚོ་སྐྱེས་ལགས་ཀྱིས་མི་དམངས་ཚོས་ཡང་སྲིད་དེར་ངོས་ལེན་མེད་པའི་སྐོར་གྱི་གནས་ཚུལ་ཤུགས་ཆེ་བཤད་ཡོད་པར་བརྟེན། རྒྱ་ནག་གཞུང་ཕྱོགས་ནས་ཁོང་འཛིན་བཟུང་བྱས་པ་ཞིག་ཡིན་པར་ས་གནས་མི་དམངས་ཚོས་ཚོད་དཔག་བྱེད་བཞིན་ཡོད་པ་རེད་འདུག། ཁོང་འཛིན་བཟུང་བྱས་རྗེས། ཁོང་གི་བཞུགས་ཡུལ་ཨག་ཆེན་གྲོང་ཚོ་ཡོངས་རྫོགས་རྒྱ་ནག་གི་དམག་མིས་མཐའ་བསྐོར་ཡོད་པ་དང་། དེ་སྔོན་རོང་དགོན་གྱི་དོན་རྐྱེན་བྱུང་བར་བརྟེན། རྒྱ་ནག་གཞུང་གིས་ཁུལ་དེའི་བརྡ་འཕྲིན་བརྒྱུད་ལམ་ཡོངས་རྫོགས་བཀག་སྡོམ་བྱས་པར་བརྟེན། ད་ཆ་ས་གནས་མི་དམངས་ཚོས་མཚོ་སྐྱེས་ལགས་འཛིན་བཟུང་བྱས་པའི་གནས་ཚུལ་ལས་། དེ་མིན་མཚོ་སྐྱེས་ལགས་གང་དུ་འཁྲིད་ཡོད་མེད་ལ་སོགས་པའི་ཁོང་གི་ཞིབ་ཕྲའི་གནས་ཚུལ་གསལ་པོ་ཤེས་རྟོགས་མེད་པ་རེད་འདུག།