རྒྱ་གར་གྱིས་ཕྱི་རྒྱལ་དུ་དངུལ་བཅོལ་མཁན་ཚོར་ཞིབ་བཤེར་བྱ་རྒྱུ།

༄༅༎ད་རིང་རེས་གཟའ་ཟླ་བའི་ཉིན་རྒྱ་གར་གྱི་ཁྲིམས་ཁང་ཆེན་མོ་ནས་བཀའ་རྒྱ་བཏང་བའི་ནང་། ཕྱིའི་རྒྱལ་ཁབ་ཁག་གི་དངུལ་ཁང་ནང་ཁྲིམས་ལུགས་དང་མི་མཐུན་པའི་ཐོག་ནས་ལྐོག་དངུལ་བཅོལ་འཇོག་བྱེད་མཁན་ཚོའི་ཐོག་དམིགས་བསལ་ཞིབ་འཇུག་བྱེད་དགོས་པའི་བཀོད་ཁྱབ་བཏང་བ་དང་ཆབས་ཅིག གཞུང་གི་ངོས་ནས་གནད་དོན་དེ་དག་གི་ཐོག་ནུས་པ་ལྡན་པའི་སྟངས་འཛིན་བྱེད་ཐུབ་མེད་པར་སྐྱོན་བརྗོད་ཀྱང་གནང་ཡོད་པ་རེད། དེ་ཡང་ཁྲིམས་ཁང་ཆེན་མོའི་བཀོད་ཁྱབ་ནང་། ལྐོག་དངུལ་གྱི་ལམ་ནས་རྒྱལ་ཁབ་ནང་ཁྲིམས་དང་མི་མཐུན་པའི་ལས་དོན་སྤེལ་རྒྱུ་དང་། ལྷག་པར་དུ་རྒྱལ་ཁབ་ལ་གནོད་སྐྱོན་གཏོང་གཞིའི་ལས་འགུལ་སྤེལ་རྒྱུའི་ཉེན་ཁ་ཡོད་པ་དང་། དེ་ཚོའི་ཐོག་གཞུང་གི་འབྲེལ་ཡོད་ཚོས་དོ་ནན་པོའི་ཐོག་ནས་ཞིབ་འཇུག་བྱེད་ཀྱི་མེད་པར་ཐུགས་འཚབ་ཡོད་ཅེས་བཀོད་ཡོད་པ་མ་ཟད། ཁྲིམས་ཁང་ཆེན་མོའི་ཁྲིམས་ཞིབ་པ་སུ་དར་ཤན་ རི་དྲིས། གཞུང་གི་ངོས་ནས་གནས་ཚུལ་དེ་བཞིན་སྣང་མེད་དང་གལ་གནད་ཆེན་པོ་བརྩི་གི་མི་འདུག་ཅེས་གསུངས་འདུག ཁྲིམས་ཁང་ཆེན་མོ་ནས་ཞིབ་མཇུག་བྱེད་མཁན་དམིགས་བསལ་ཚོགས་ཆུང་ཞིག་བཙུགས་ཡོད་པ་དང་། དེའི་འགོ་འཁྲིད་མཁན་ཁྲིམས་ཞིབ་ཟུར་པ་ཞིག་བསྐོ་གཞག་བྱེད་པ་དང་། གཞུང་ལའང་ཞིབ་མཇུག་འོག་ཡོད་པའི་མི་དེ་དག་གི་མིང་གཞུང་མཁོ་སྤྲོད་བྱེད་དགོས་ལུགས་གསུངས་ཡོད་པ་བཅས། གང་ལྟར་རྒྱ་གར་བ་འབྱོར་ལྡན་ཅན་ཚོས་ཕྱིའི་ཡུལ་གྲུའི་དངུལ་ཁང་ནང་དངུལ་བཅོལ་པོ་ཡོད་པའི་རོབ་རྩིས་བྱེད་པ་ཡིན་ན་ཨ་རིའི་དྲོ་ལར་ཐེར་འབུམ་ལྔ་བརྒྱ་ནས་ཐེར་འབུམ་ཆིག་སྟོང་ལྷག་ཙམ་ཡོད་འདུག

འོན་ཀྱང་རྒྱ་གར་གཞུང་ཕྱོགས་ནས་དོ་བདག་སོ་སོའི་ཐོག་ཞིབ་འཇུག་བྱེད་རྒྱུར་ཕྱིའི་ཡུལ་གྲུ་དེ་དག་གི་ཁྲིམས་ཀྱི་འགྲོ་སྟངས་ཐོག་ནས་ཞིབ་མཇུག་བྱེད་རྒྱུར་དཀའ་ངལ་འཕྲད་ཀྱི་ཡོད་ལུགས་གསལ་བཤད་གནང་གི་ཡོད་པ་རེད།།