རང་བཙན་ནམ་ཡང་བློས་མི་གཏོང་བའི་གཏམ་བཤད།

༄༅༎ཨ་རིའི་ཨིན་ཌིའི་ཡཱ་ཎ་གཙུག་ལག་སློབ་ཆེན་གྱི་སློབ་དཔོན་ཨི་ལི་ཡརྚི་སཔར་ལིང་། (Prof. Elliot Sperling )གིས་བོད་མི་ཚོས་ལོ་རྒྱུས་ཐོག་རང་བཙན་གྱི་རྩ་དོན་ནམ་ཡང་བློས་གཏོང་མི་རུང་བའི་སྐོར་གཏམ་བཤད་གནང་འདུག
རེས་གཟའ་སྤེན་པའི་ཉིན་གྱི་སྔ་དྲོའི་ཆུ་ཚོད་༡༡།༣༠ཙམ་ལ་བཞུགས་སྒར་ཉེ་འཁྲིས་ས་རཱ་མཐོ་སློབ་དུ། བོད་ཀྱི་དགུ་བཅུ་གསུམ་ལས་འགུལ་ཚོགས་པ་དང་ས་རཱ་མཐོ་སློབ་ཐུན་མོང་གི་གོ་སྒྲིག་འོག་ ཨ་རིའི་ཨིན་ཌིའི་ཡཱ་ཎ་གཙུག་ལག་སློབ་གྲྭའི་(Indiana University) སློབ་དཔོན་ཨི་ལི་ཡརྚི་སཔར་ལིང་ (Prof. Elliot Sperling ) ལགས་གདན་ཞུའི་ཐོག དེར་ཡོད་དགེ་སློབ་རྣམས་ལ་ལོ་རྒྱུས་ཐོག་བོད་ཀྱི་གནས་བབ་ཅེས་པའི་བརྗོད་གཞིའི་ཐོག་གཏམ་བཤད་གནང་ཡོད་པ་མ་ཟད། སློབ་གྲྭའི་སློབ་མ་རྣམས་ཀྱི་དྲི་བ་ཁག་ལ་ལན་འདེབས་གནང་ཡོད་འདུག།   རྒྱ་ནག་གཞུང་གིས་རྒྱལ་སྤྱིའི་ནང་བོད་རང་བཙན་ཡིན་པའི་ལོ་རྒྱུས་ལ་འཁྱོག་བཤད་དྲིལ་བསྒྲགས་ཀྱི་ཡིག་ཆ་མང་པོ་འགྲེམས་སྤེལ་བྱས་ཏེ། བོད་དེ་ཡོན་རྒྱལ་རབས་ཀྱི་སྐབས་ནས་རྒྱ་ཁོངས་ཡིན་ཚུལ་དང་། རྒྱ་ནག་དང་ཁ་བྲལ་དུ་མི་རུང་བའི་ས་ཆ་ཞིག་ཡིན་སྐོར་བཤད་ནས་མགོ་སྐོར་གཏོང་ཐབས་བྱེད་ཀྱི་ཡོད་ནའང་། བོད་དང་རྒྱ་ནག་གི་ཡིག་ཆ་ཁག་ཏུ། བོད་དང་སོག་པོར་བཙན་རྒྱལ་རིང་ལུགས་པའི་དབང་ཤུགས་ལ་བརྟེན་ནས་རང་བཙན་ཡིན་པའི་རྒྱལ་ཁབ་གཏོར་བཤིག་བཏང་བ་ཡིན་ཚུལ་དང་བོད་མི་ཚོས་ལོ་རྒྱུས་ཀྱི་བདེན་པ་ར་སྤྲོད་དང་རང་ཉིད་ཀྱི་རྩ་དོན་བརླག་མི་རུང་བ་དང་བོད་རང་བཙན་ཡིན་པ་ཕྱི་རྒྱལ་བ་མང་པོས་ཤེས་ཀྱི་ཡོད་པ་རེད། ངས་ཁུངས་ལྡན་གྱི་ར་སྤྲོད་ཁྱེད་རང་ཚོར་སྤྲོད་ཐུབ་ཀྱི་རེད་ཅེས་གསུངས་ཡོད་པ་བོད་ཀྱི་དུས་བབ་ཀྱིས་ལུང་འདྲེ་བྱས་འདུག།  བོད་རང་བཙན་ཁས་ལེན་དང་མི་ལེན་དེ་ཁྱེད་རང་ཚོའི་ལག་པར་ཡོད་པ་རེད། ངས་ལོ་མང་རིང་བོད་ཀྱི་ལོ་རྒྱུས་ཐོག་ཞིབ་འཇུག་ཐོག་ནས་བོད་རང་བཙན་ཡིན་པ་གསལ་བོ་རེད།ཡིན་ནའང་།ཁྱེད་རང་ཚོས་མི་རབས་འདིས་བོད་རང་བཙན་མིན་པ་ཁས་བླངས་པ་ཡིན་ན། ལོ་རྒྱུས་ངོས་ཀྱི་མི་རིགས་དང་མེས་པོར་རྒྱལ་འགལ་ཆགས་པ་རེད་ཅེས་གསུངས་གནང་འདུག།
དྲི་བ་དྲིས་ལན་གྱི་སྐབས་སུ་ཁོང་གིས་དབུ་མའི་ལམ་གྱི་སྲིད་ཇུས་སྐོར་ལ། ཁོང་གིས་ངོས་ནས་དབུ་མའི་ལམ་གྱི་ཐོག་ནས་བོད་དོན་བདེན་མཐའ་སེལ་རྒྱུ་ཧ་ཅང་ཁག་པོ་མཐོང་གི་ཡོད་པ་དང་། དབུ་མའི་ལམ་གྱི་ཐ་སྙད་དེ་ཆོས་ཀྱི་ཐ་སྙད་ཅིག་ཡིན་སྟབས། མི་ལ་འགྲེལ་བཤད་རྒྱག་སྐབས་གསལ་བོ་བཟོ་རྒྱུ་ཧ་ཅང་གལ་ཆེན་པོ་ཡིན་ཚུལ་དང་། མི་ཁག་ཅིག་གིས་དབུ་མའི་ལམ་གྱི་སྲིད་ཇུས་བརྒྱུད་དེ་བོད་ནང་ལོག་ཐུབ་པ་དང་བོད་རང་བཙན་ལེན་ཐུབ་པའི་རེ་བ་རྒྱག་གི་ཡོད་ཀྱང་། བོད་རྒྱ་ཁོངས་ཡིན་པ་ཁས་བླངས་པ་ཡིན་ན། རྒྱལ་སྤྱིའི་ངོས་ནས་རྒྱབ་སྐྱོར་ཡོང་མི་སྲིད་པ་ཞིག་ཡིན་པ་རེད། གཙོ་བོ་བོད་རང་བཙན་ཡིན་པ་དང་བོད་ཆོལ་ཁ་གསུམ་གཅིག་གྱུར་གྱི་རང་བཙན་དང་རང་ཐག་རང་གཅོད་ཀྱི་ཐོབ་ཐང་དེ་བོད་མི་ཚོས་རྩོད་དགོས་པ་རེད། དེ་ལྟར་རག་པ་ཡིན་ན་བོད་པ་ཚོ་རང་བཙན་གཙང་མ་ཞིག་རག་པ་རེད་ཅེས་གསུངས་གནང་འདུག།