མཆོག་གསུམ་རྒྱལ་བ་རྒྱ་མཚོར་གསོལ་འདེབས་སྨོན་ལམ་ཞུས་པ།

༄༅༎བཙན་བྱོལ་བོད་གཞུང་གི་ཆོས་དང་རིག་གཞུང་ལྷན་ཁང་གིས་ཉེ་ཆར་ཕྱི་ཚེས་༡༢ ཉིན་རྒྱ་ནག་གི་ལྷོ་ནུབ་ཟི་ཁྲོན་ཞིང་ཆེན་ནང་ས་ཡོམ་གྱི་གོད་ཆགས་འོག་རྐྱེན་འདས་སུ་ཕྱིན་པའི་མི་དམངས་ཚོར་སྨོན་ལམ་གསོལ་འདེབས་ཀྱི་དམིགས་བསལ་གྱི་ཆོས་ཕྱོགས་བྱེད་སྒོ་ཞིག་གོ་སྒྲིག་གནང་ཡོད་པ་རེད།

དེ་ཡང་ཟླ་བ་འདིའི་ཕྱི་ཚེས་༡༤ ཉིན་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྐུ་བཅར་རྣམ་རྒྱལ་གྲ་ཚང་གི་དགེ་འདུན་པས་དབུ་ཁྲིད་པའི་མཆོག་གསུམ་ལ་གསོལ་འདེབས་ཀྱི་དམིགས་བསལ་གྱི་ཆོས་ཕྱོགས་ཀྱི་འདུ་འཛོམས་ཆེན་པོ་ཞིག་གནང་ཡོད་ཅིང། བཙན་བྱོལ་བོད་གཞུང་གི་ཆོས་རིག་དྲུང་ཆེ་ཚེ་རིང་དོན་འགྲུབ་ལགས་ཀྱིས་ད་རེས་ཀྱི་དམིགས་བསལ་སྨོན་ལམ་གསོལ་འདེབས་ཀྱི་ཆོས་ཕྱོགས་ཀྱི་བྱེད་སྒོ་དེ་ནི་ཉེ་ཆར་རྒྱ་ནག་ནང་རང་འབྱུང་གི་གནོད་འཚེ་ཚབས་ཆེ་དེའི་འོག་རྐྱེན་འདས་སུ་ཕྱིན་པའི་རྒྱ་མི་རིགས་རྣམས་ཕྲལ་ཡུལ་ཀུན་དུ་དགེ་བའི་ཐུགས་སྨོན་སྐྱབས་འཇུག་ཡོང་བའི་ཆེད་དུ་དམིགས་པ་དང། ལྷག་པར་དུ་བཙན་བྱོལ་བོད་གཞུང་གིས་རང་འབྱུང་གི་གནོད་འཚེའི་ནང་ཚེ་སྲོག་ཤོར་བའི་མི་དམངས་དང་ཁོང་ཚོའི་ནང་མི་ཚོར་ཐུགས་གསོའི་འཚམས་འཕྲིན་གནང་ཡོད་པའི་སྐོར་གསུང་ཡོད་པ་རེད། བོད་མིའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་བཀའ་ཤག་གིས་རྒྱ་ནག་ནང་ས་ཡོམ་གྱི་རང་འབྱུང་གནོད་འཚེའི་འོག་གོད་ཆགས་ཚབས་ཆེ་ཕོག་པར་དེར་ཧ་ཅང་གི་ཐུགས་ཕམ་ཚད་མེད་དང་གདུང་སེམས་མཉམ་སྐྱེད་ཀྱི་ཐུགས་སྨོན་རྒྱ་ཆེ་གནང་ཡོད་པ་རེད།