རྒྱལ་ཞེན་གྱི་གླུ་གཞས་གཏོང་མཁན་ཕུལ་བྱུང་རི་འགོར་བྲོས་བྱོལ།

༄༅༎བོད་ཀྱི་མདོ་སྨད་ཨ་མདོ་ཨ་ལྕོག་ཁུལ་ནས་ཡིན་པའི་རྒྱལ་ཞེན་གྱི་གླུ་གཞས་གཏོང་མཁན་ཕུལ་བྱུང་ལགས་ཀྱིས་ཉེ་ཆར་འོད་སྡེར་གསར་པ་ཞིག་བཏོན་པའི་ནང༌། ༧གོང་ས་སྐྱབས་མགོན་ཆེན་པོ་མཆོག་དང༌། བཀའ་ཁྲི་བློ་བཟང་སེང་གེ་རྣམ་གཉིས་ལ་བསྟོད་གླུ་ཞིག་ཕུལ་ཡོད་པར་བརྟེན། ས་གནས་རྒྱ་ནག་གཞུང་གིས་འགོ་འཁྲིད་ཚོས། དེ་ནི་ཆབ་སྲིད་དང་འབྲེལ་བའི་ཁྲིམས་འགལ་གྱི་བྱ་སྤྱོད་ཞིག་ཡིན་པའི་སྐྱོན་འཛུགས་ཀྱིས་ ཕུལ་བྱུང་ལགས་འཛིན་བཟུང་བྱེད་དགོས་པའི་བཀའ་ཁྱབ་བཏང་ཡོད་པར་སོང༌། འཛིན་བཟུང་བྱེད་པའི་ཉེན་ཁ་ལས་གཡོལ་ཐབས་སུ་ ཕུལ་བྱུང་ལགས་རི་འགོར་བྲོས་བྱོལ་དུ་ཕེབས་དགོས་པ་བྱུང་ཡོད་པ་བཅས་ཀྱི་སྐོར་ ཁོང་དང་ལུང་པ་གཅིག་པ་ཡིན་པ་འཇམ་དབྱངས་ལགས་ཀྱིས་འདི་གའི་རྒྱ་གར་ལྷོ་ཕྱོགས་གསར་འགོད་པ་ཀུན་བཟང་བསྟན་འཛིན་ལགས་སུ་གནས་ཚུལ་ངོ་སྤྲོད་གནང་འདུག