བོད་པའི་སློབ་སྤྱི་ཞིག་ལ་རྒྱ་གར་རྒྱལ་ཡོངས་ཕུལ་བྱུང་བྱ་དགའ།

༄༅༎རྒྱ་གར་བྱང་ཤར་ཀ་ལིམ་པོང་བོད་མིའི་གཏན་འཇགས་སློབ་གྲའི་སློབ་སྤྱི་སྐལ་བཟང་བསྟན་འཛིན་བོ་ཌི་ཡ་ལགས་སུ་ཕྱི་ལོ་༢༠༡༠ལོའི་རྒྱ་གར་རྒྱལ་ཡོངས་དགེ་རྒན་ཕུལ་བྱུང་གི་བྱ་དགའ་རྒྱ་གར་གྱི་སྲིད་འཛིན་མཆོག་གིས་གནང་རྒྱུ་ཡིན་པའི་གནས་ཚུལ་ཐོན་བཞག། ཕྱི་ཟླ་༩ཚེས་༥ཉིན་རྒྱ་གར་གྱི་སྲིད་འཛིན་པར་ཏི་བ་པ་ཀྲིལ་མཆོག་གིས་དགེ་རྒན་གྱི་ཉིན་མོའི་དུས་ཆེན་ཉིན་རྒྱ་གར་རྒྱལ་ཡོངས་ནས་དགེ་རྒན་ཕུལ་བྱུང་ ༣༧༠ལ་བྱ་དགའ་གནང་རྒྱུ་ཡིན་པ་དང་བྱ་དགའ་ཐོབ་པའི་དགེ་རྒན་རྣམས་ལ་ལག་འཁྱེར་རེ་དང་ རྒྱ་གར་གྱི་ཤོག་དངུལ་སྒོར་ཉིས་ཁྲི་ལྔ་སྟོང་རེ་གསོལ་སྩལ་གནང་རྒྱུ་ཡིན་འདུག། 

དེ་ཡང་ཕྱི་ཟླ་༩ཚེས་༥ཉིན་མཚན་ཉིད་རིག་པ་དང་ དགེ་རྒན་མཆོག་ཏུ་གྱུར་པ་ རྒྱ་གར་གྱི་སྲིད་འཛིན་དམ་པ་ར་རྡ་ཀིརིཤ་ནན་མཆོག་ལ་ཆེ་བསྟོད་ཞུ་ཆེད་ལོ་ལྟར་དགེ་རྒན་གྱི་ཉིན་མོའི་དུས་ཆེན་སྲུང་བརྩི་ཞུ་གི་ཡོད་པ་རེད། ཕྱི་ལོ་༡༩༥༨ལོར་རྒྱ་གར་གཞུང་གིས་དམའ་རིམ་དང་ འབྲིང་རིམ་ མཐོ་རིམ་བཅས་ཀྱི་དགེ་རྒན་ ཕུལ་བྱུང་ རྣམས་ལ་ལེགས་སྐྱེས་ཀྱི་ཚུལ་དུ་རྒྱལ་ཡོངས་དགེ་རྒན་གྱི་བྱ་དགའ་འབུལ་རྒྱུ་དབུ་འཛུགས་གནང་ཡོད་པ་རེད། འདི་ལོ་༢༠༡༠ལོར་དབུས་བོད་སློབ་འཛིན་སྐྱོང་ཚོགས་པས་རྒྱབ་གཉེར་གནང་བ་བཞིན་ རྒྱ་གར་བྱང་ཤར་ཀ་ལིམ་པོང་བོད་མིའི་གཏན་འཇགས་སློབ་གྲའི་སློབ་སྤྱི་སྐལ་བཟང་བྷོ་ཌི་ཡ་ལགས་སུའང་རྒྱ་གར་རྒྱལ་ཡོངས་དགེ་རྒན་ཕུལ་བྱུང་གི་བྱ་དགའ་འབུལ་བཞེས་གནང་རྒྱུ་ཡིན་པ་དང་ དབུས་བོད་མིའི་སྒྲིག་འཛུགས་ཀྱི་ཤེས་རིག་ལྷན་ཁང་གིས་སྐལ་བཟང་བོ་ཌི་ཡ་ལགས་སུ་ཧ་ཅང་ཆེས་ཐོངས་ཆེ་བའི་བྱ་དགའ་ཐོབ་པ་དེར་འཚམས་འདྲི་ཞུས་གནང་བཞག།