ཨོ་སི་ཀྲི་ལི་ཡའི་མེལ་སྦོན་གྱི་ས་ཁང་ཚོང་སྒྱུར་གྱིས་ཨོ་སྒོར་ས་ཡ་གཅིག་དང་འབུམ་གཉིས་ལྷག་ཝིཀ་ཊོ་རི་ཡ་བོད་རིགས་མཐུན་ཚོགས་ལ་དབུལ་རྒྱུ་ཡིན་པ་གྲོས་ཚོགས་ཀྱིས་གཏན་འབེབས་གནང་།

འཛིན་སྐྱོང་བཀའ་ཤག་ནས་ཨོ་སི་ཀྲི་ལི་ཡའི་སྐུ་ཚབ་དོན་གཅོད་དམ་བོད་ཀྱི་རིག་གཞུང་ལྟེ་གནས་ཁང་གི་སྔོན་རྩིས་ལ་སྤར་ཆ་ཁྱེར་ཏེ། མེལ་སྦོན་གྱི་ས་ཁང་ཚོང་སྒྱུར་གྱིས་ཝིཀ་ཊོ་རི་ཡ་བོད་རིགས་མཐུན་ཚོགས་ལ་ཨོ་སྒོར་ས་ཡ་གཅིག་དང་ཉིས་འབུམ་བཞི་ཁྲི་བརྒྱད་སྟོང་ཉིས་བརྒྱ་སུམ་ཅུ་སོ་བརྒྱད་སྤྲོད་རྒྱུ་གཏན་འབེབས་གནང་སོང་།

བོད་མི་མང་སྤྱི་འཐུས་ལྷན་ཚོགས་ཀྱི་སྐབས་བཅུ་བདུན་པའི་གྲོས་ཚོགས་ཚོགས་དུས་དགུ་པའི་ལས་ཉིན་བཅུ་བ་སྟེ། སྤྱི་ཟླ་ ༣ པའི་ཚེས་ ༢༧ ཉིན་སྤྱི་ལོ་ ༢༠༢༥ དང་ ༢༦ ལོའི་ལྷན་ཁང་རེ་རེ་བཞིན་སྔོན་རྩིས་གཏན་འབེབས་ཀྱི་རིམ་པའི་ནང་། ཨོ་སི་ཀྲི་ལི་ཡའི་བོད་ཀྱི་རིག་གཞུང་ལྟེ་གནས་ཁང་གི་ཟུར་བཀོལ་བཀའ་འཁྲོལ་རྒྱབ་གཉེར་ཧིན་སྒོར་ས་ཡ་བདུན་ཅུ་དོན་གཅིག་དང་དགུ་འབུམ་བཞི་ཁྲི་བདུན་སྟོང་ལ་ཚོགས་ཆུང་ནས་སྤར་ཆ་མེད་པའི་སྐོར། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་མི་སྤྱི་འཐུས་ཀརྨ་དགེ་ལེགས་ལགས་ནས་སྙན་སྒྲོན་གནང་བ་དང་འབྲེལ། ཕྱི་དྲིལ་བཀའ་བློན་ནོར་འཛིན་སྒྲོལ་མ་ལགས་ནས་སྤར་ཆའི་གྲོས་འཆར་ཅིག་བཏོན་པའི་ནང་། “རྩིས་འགོ་མེལ་སྦོན་ས་ཁང་ཚོང་སྒྱུར་འགྲོ་གྲོན་དང་རིན་འབབ་ནས་ཕྱེད་ཀ་ཝིཀ་ཊོ་རི་ཡ་བོད་རིགས་མཐུན་ཚོགས་ལ་སྤྲོད་དམིགས་ཆེད། ཚོང་སྒྱུར་རིན་འབབ་ཨོ་སྒོར་འབུམ་ཉི་ཤུ་རྩ་ལྔ་དང་སྟོང་ཕྲག་ལྔ་བཅུ་ནས། འགྲོ་གྲོན་ཨོ་སྒོར་ལྔ་ཁྲི་སུམ་སྟོང་ལྔ་བརྒྱ་ཉི་ཤུ་རྩ་བཞི་འཐེན་འཕྲོས། ས་ཡ་གཉིས་དང་བཞི་འབུམ་དགུ་ཁྲི་དྲུག་སྟོང་བཞི་བརྒྱ་བདུན་ཅུ་དོན་དྲུག་དུམ་བུ་གཉིས་ཆ་བགོས་ཀྱིས་ཝིཀ་ཊོ་རི་ཡ་བོད་རིགས་མཐུན་ཚོགས་ལ་ཨོ་སྒོར་ས་ཡ་གཅིག་དང་ཉིས་འབུམ་བཞི་ཁྲི་བརྒྱད་སྟོང་ཉིས་བརྒྱ་སུམ་ཅུ་སོ་བརྒྱད་སྤྲོད་”རྒྱུ་ཞེས་འཁོད་འདུག

གྲོས་ཚོགས་སུ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ནས། སྤར་ཆའི་གྲོས་འཆར་དེ་ལ་དགག་པ་གནང་སྐབས། གྲོས་འཆར་དེར་དགག་པ་རྒྱག་དགོས་པའི་རྒྱུ་མཚན་ངོ་མ་ནི། ས་གནས་ས་ཐོག་ཏུ་ས་ཆ་དེའི་སྒང་རྩོད་གཞི་ཆེན་པོ་ཆགས་ཏེ་ངས་དེ་རིང་ཐག་བཅད་ནས་ཞུ་ཐུབ་པ་ཞིག་ལ། བཀའ་འཁྲོལ་འདི་ཐོབ་ནས་འགྲོ་བ་ཡིན་ན། ས་གནས་བོད་རིགས་ཚོགས་པ་ནང་ཁུལ་ལ་རྙོག་གྲ་ཆེན་པོ་དང་ཤོག་ཁག་གཉིས་ཆགས་འགྲོ་བའི་གནད་དོན་ཡིན་པ་གཅིག་ནས་གསལ་བོ་ཡིན་པ་དང་། གཉིས་ནས་བཀའ་ཤག་གི་འདིའི་ནང་གསལ་བཤད་བྱས་པ་དེར། མ་གིའི་ས་ཆ་དེ་བེད་སྤྱོད་མེད་པ་དང་འགྲོ་སོང་ཡོད་པ་སོགས་ནི། ས་གནས་ཀྱི་འགྲེལ་བཤད་དང་མཐུན་གྱི་མེད་ཅེས་དགག་པ་གནང་སོང་།

སྤར་ཆའི་གྲོས་འཆར་དེ་དང་འབྲེལ་བར་སྲིད་སྐྱོང་སྤེན་པ་ཚེ་རིང་ལགས་ནས་གསལ་བཤད་གནང་སྐབས། བཀའ་ཤག་སྐབས་བཅུ་དྲུག་པ་མ་སླེབས་གོང་ནས། དོན་གཅོད་དང་མེལ་སྦོན་བོད་རིགས་སྤྱི་མཐུན་ཚོགས་པའི་དབར་མེལ་སྦོན་བོད་རིགས་སྤྱི་མཐུན་ཚོགས་པར་ཕན་ཐོགས་པ་དང་། དོན་གཅོད་ལའང་ཕན་ཐོགས་པའི་བཀའ་མོལ་དེ་འདྲ་ཞིག་འདུག་པ་དང་། ང་ཚོ་མར་ཕྱིན་ནས་དེ་མཇུག་སྐྱོང་རང་བྱས་པ་མ་གཏོགས་སྔོན་མ་བཀའ་མོལ་ཡོད་པ་དེ། བཀའ་ཤག་གིས་རྩ་བ་ནས་ཡོང་གི་མ་རེད་ལབ་ན་རྦད་དེ་ལྡོག་ཕྱོགས་ཆགས་འགྲོ་ཡི་འདུག་ཅེས་གྲོས་ཚོགས་སུ་གསལ་བཤད་གནང་སྟེ། སྤར་ཆའི་གྲོས་འཆར་དེ་བཞིན་གྲོས་ཚོགས་སུ་མང་མོས་ཀྱིས་གཏན་འབེབས་གནང་ཐུབ་སོང་ཞིང་། དེ་རིང་གི་གྲོས་ཚོགས་ལས་རིམ་དུ་ནང་སྲིད་ལས་ཁུངས་ཀྱི་སྔོན་རྩིས་གཏན་འབེབས་དང་དོན་གཅོད་ཁག་ཅིག་གི་སྔ་འཕྲོས་སྔོན་རྩིས་གཏན་འབེབས་གནང་ཡོད་པ་རེད། །

གསར་འགོད་པ། བློ་བྷེ། 

རྩོམ་སྒྲིག་པ། བསྟན་འཛིན་བསྟན་སྐྱོང་། 

དྲྭ་ཐོག་སྤེལ་མཁན། བསྟན་འཛིན་བསྟན་སྐྱོང་།