དགེ་འདུན་པ་ཁག་གིས་ཨ་རིའི་ནང་དཀྱིལ་འཁོར་བཞེང་འཆར།

༄༅༎རྒྱ་གར་ལྷོ་ཕྱོགས་ཀར་ཌ་ཊ་ཀ་མངའ་སྡེའི་མོན་རྒོ་ཌ་འདོད་རྒུ་གླིང་གི་བོད་མིའི་གཞིས་སྒར་ནང་རྟེན་གཞི་བྱས་པའི་གདན་ས་ཆེན་པོ་འབྲས་སྤུངས་བློ་གསལ་གླིང་གི་དགེ་འདུན་པ་འགའ་ཞིག་གིས་ཨ་མི་རི་ཀའི་མངའ་སྡེ་མེ་ས་ཆུ་སེཏ་སེ་མངའ་ཁུལ་གྱི་གྲོང་ཁྱེར་ནིའུ་སྦེ་ཌེ་ཕོདྲ་ཟེར་བའི་ནང་འཛམ་གླིང་ཞི་བདེའི་དོན་དུ་དམིགས་ཏེ་དཀྱིལ་འཁོར་བཞེང་རྒྱུ་དང་གར་འཆམ་བསྐྱོན་པ་ཆོས་དབྱངས་འདོན་པ་ལ་སོགས་པའི་བོད་ཀྱི་ཆོས་དང་རིག་གཞུང་མཚོན་པའི་བྱེད་སྒོ་སྣ་ཚོགས་ཤིག་ཁུལ་དེའི་མི་མང་ཚོར་རིན་པ་མེད་པར་དེང་སྐབས་འགྲེམས་སྟོན་གནང་བཞིན་པ་ཡིན་པ་རེད། ས་གནས་ཀྱི་གནས་འཕྲིན་དྲ་རྒྱའི་ཐོག་ལ་སྤེལ་བའི་གནས་ཚུལ་ལྟར་ན་འབྲས་སྤུངས་བློ་གསལ་གླིང་གི་དགེ་འདུན་པ་ཚོས་དེ་རིང་ནས་འགོ་འཛུགས་གནང་སྟེ་ཕྱི་ཟླ་དྲུག་པའི་ཚེས་བདུན་བར་དཀྱིལ་འཁོར་བཞེང་རྒྱུ་དང་གར་འཆམ་བསྐྱོན་པ།ཆོས་དབྱངས་འདོན་པ་ལ་སོགས་པའི་ཆོས་ཕྱོགས་ཀྱི་ཐབས་ལམ་རྒྱུད་ནས་སྤྱིར་འཛམ་གླིང་ནང་ཞི་བདེ་བསྐྲུན་ཐབས་དང་བྱེ་བྲག་མིའི་སེམས་རྒྱུད་འདུལ་བའི་ལམ་ནས་བདེ་སྐྱིད་འབྱུང་ཐབས་སླད་དུ་ཆོས་ཕྱོགས་ཀྱི་བྱེད་སྒོ་སྣ་ཚོགས་སྤེལ་རྒྱུ་ཡིན་པ་རེད། སྤྱིར་བཏང་བྱེད་ན་སྐྱེ་བོ་བྱིངས་ཀྱིས་སོ་སོའི་རྒྱལ་ཁབ་ཀྱི་བདག་དབང་རྒྱལ་ཁབ་གཞན་ལ་ཤོར་བ་དང་དུས་མཚུངས་རིམ་པས་སོ་སོའི་ཕ་མེས་ཀྱི་ལག་རྒྱུན་རིག་གཞུང་དང་ཡུལ་གོམས་གཤིས་ལུགས་སོགས་དང་འབྲེལ་བ་བརླག་འགྲོ་གི་ཡོག་རེད། དེ་ལས་ལྡོག་སྟེ་རྒྱ་ནག་གིས་བོད་བཙན་བཟུང་བྱས་རྗེས་བོད་ཀྱི་དགོན་སྡེ་གྲངས་༦༥༠༠ལྷག་རྩ་མེད་གཏོར་བཤིག་བཏང་ཀྱང་འབྲས་སྤུངས་བློ་གསལ་གླིང་གི་དགེ་འདུན་གྲངས་ཉིས་བརྒྱ་ལྔ་བཅུ་ལྷག་རྒྱ་གར་དུ་བཙན་བྱོལ་ལ་ཕེབས་ཐུབ་པ་བྱུང་སྟེ་རྒྱ་གར་ལྷོ་ཕྱོགས་ཀར་ཎ་ཊ་ཀ་མངའ་སྡེའི་ནང་འབྲས་སྤུངས་བློ་གསལ་གླིང་གི་གཙུག་ལག་སློབ་གྲྭ་གསར་འཛུགས་གནང་བས་མ་ཟད་ད་ཆ་དགེ་འདུན་ཞལ་གྲངས་ཉིས་སྟོང་ལྔ་བརྒྱ་ཙམ་གདན་ས་དེར་བཞུགས་ཅིང་བོད་ཀྱི་ཐུན་མོང་མ་ཡིན་པའི་རིག་གནས་ཆེ་ཆུང་ཡོངས་རྫོགས་གསན་སྦྱོང་གནང་བཞིན་པ་ཡིན་པ་རེད་ཅེས་གནས་ཚུལ་བཀོད་ཡོད་པ་རེད༎