བོད་དུ་ཨ་མདོ་བླ་བྲང་དགོན་པའི་དགེ་འདུན་ཞིག་ལ་ཁྲིམས་བཅད།

༄༅༎ཉེ་ལམ་ཀན་ལྷོ་འབྲིང་རིམ་མི་མང་ཁྲིམས་ཁང་གིས་ཨ་མདོ་བླ་བྲང་དགོན་པའི་དགེ་འདུན་སྐལ་བཟང་རྒྱ་མཚོ་ལགས་ལ་ལོ་བཅུ་བཙོན་འཇུག་གི་ཁྲིམས་ཐག་བཅད་ཡོད་འདུག

ཕྱི་ལོ་ཉིས་སྟོང་བརྒྱད་ལོའི་ཕྱི་ཟླ་གསུམ་པའི་ཚེས་༡༤ཉིན་ཨ་མདོ་བླ་བྲང་དགོན་པ་དང་གསང་ཆུ་རྫོང་ཐོག་བོད་མི་སེར་སྐྱ་མི་སེར་སྟོང་ཕྲག་མང་པོས་རྒྱ་ནག་གཞུང་གི་དབང་བསྒྱུར་ལ་ཞི་རྒོལ་བྱེད་སྐབས་རྒྱ་ནག་གཞུང་གིས་བླ་བྲང་དགོན་པའི་དགེ་འདུན་སྐལ་བཟང་རྒྱ་མཚོ་ལགས་ཞི་རྒོལ་བའི་སྣེ་ཁྲིད་ཡིིན་ལུགས་བརྗོད་ནས་ཐེངས་མང་འཛིན་བཟུང་བྱེད་རྩིས་བྱས་པར་བརྟེན་ཁོང་ལོ་ངོ་གཅིག་ཙམ་རིང་རི་ཀླུང་གང་སར་ཡིབ་དགོས་བྱུང་ཡོད་ཅིང་ཕྱི་ལོ་ཉིས་སྟོང་དགུ་ལོའི་ཕྱི་ཟླ་གསུམ་པའི་ནང་ཁོང་གསང་ཆུ་རྫོང་ནས་གཙོད་གྲོང་ཁྱེར་དུ་ཕེབས་པའི་ལམ་བར་རྒྱ་ནག་ཉེན་རྟོག་པས་འཛིན་བཟུང་བྱས་ནས་གར་སོང་ཆ་མེད་དུ་གྱུར་ཡོད་པ་དང་ཡིན་ནའི་ཉིན་ཤས་སྔོན་བོད་ནས་གནས་ཚུལ་ཤེས་རྟོགས་བྱུང་གསལ་ལྟར་ན་དགེ་འདུན་སྐལ་བཟང་རྒྱ་མཚོ་ལགས་ལ་ཀན་ལྷོ་འབྲིང་རིམ་ཁྲིམས་ཁང་ནས་བཙོན་འཇུག་ལོ་བཅུའི་ཁྲིམས་ཐག་བཅད་ཡོད་འདུག དགེ་འདུན་སྐལ་བཟང་རྒྱ་མཚོ་ལགས་བླ་བྲང་དགོན་དུ་བཞུགས་སྐབས་ཚོགས་ཆོས་འགྲིམ་མཁན་གྱི་དགེ་འདུན་ཀྱུས་མ་ཞིག་ཡིན་ཞིང་ཕྱི་ལོ་ཉིས་སྟོང་བརྒྱད་ལོའི་ཕྱི་ཟླ་གསུམ་པའི་བླ་བྲང་དགོན་གྱི་ཞི་རྒོལ་ནང་བཞུགས་པའི་རྐྱེན་གྱིས་རྒྱ་ནག་གཞུང་གིས་བཙོན་འཇུག་ལོ་བཅུའི་ཁྲིམས་ཐག་ཉེས་ཆད་བཏང་ཡོད་ཅིང་སྐུ་ཞབས་སྐལ་བཟང་རྒྱ་མཚོ་ལགས་གསང་ཆུ་རྫོང་རྩ་ཡུལ་སྡེ་པ་ནས་ཡིན་པ་དང་དགུང་གྲངས་སུམ་ཅུ་ཙམ་ལ་ཕེབས་ཀྱི་ཡོད་འདུག