ཁམས་གསེར་རྟར་བོད་མིས་བོད་ཀྱི་རྒྱལ་དར་འཕྱར་བ།

༄༅༎བོད་ཀྱི་ཤར་ཕྱོགས་ཁམས་དཀར་མཛེས་ཀྱི་གསེར་རྟ་ཁུལ་གྱི་རྒྱ་མའི་བདེ་འཇགས་ལས་ཁུངས་ཨ་མའི་མདུན་དུ་བོད་ཀྱི་རྒྱལ་དར་ཆེན་པོ་ཞིག་བསྐྱལ་ཡོད་པའི་སྐོར་རེས་གཟའ་སྤེན་པའི་ཉིན་ཕ་ཡུལ་དྲ་རྒྱའི་ཐོག་གནས་ཚུལ་སྤེལ་ཡོད་པ་རེད།
བཙན་བྱོལ་བོད་མི་དམངས་སྤྱི་འཐུས་ཟུར་པ་གསེར་རྟ་ཚུལ་ཁྲིམས་ལགས་ཀྱིས་གསར་འགོད་པ་ཚོར་གསུང་དོན། བོད་ཀྱི་རྒྱལ་དར་གསེར་རྟ་རྒྱ་མིའི་བདེ་འཇགས་ལས་ཁུངས་མདུན་འཕྱར་བའི་གནས་ཚུལ་དེ་རེས་གཟའ་ཕུར་བུའི་ཉིན་བྱུང་ཡོད་པ་དང༌། དེ་དང་མཉམ་དུ་བོད་རང་དབང་ཞེས་བྲིས་པའི་ཤོག་ལྷེ་དེ་འདྲ་བདེ་འཇགས་ལས་ཁུངས་ཀྱི་ལམ་ཀའི་ཐོག་འགྲམས་ཡོད་པ་མ་ཟད། རྒྱལ་བ་རིན་པོ་ཆེ་བོད་དུ་གདན་ཞུ་བྱ་དགོས་པ་དང༌། བོད་ལ་རང་དབང་དགོས་ཞེས་པའི་ཡིག་གེ་བྲིས་པའི་སྦྱར་ཡིག་རྒྱ་མའི་ལས་ཁུངས་གཞན་གྱི་རྩིག་འདེབས་སུ་སྦྱར་ཡོད་པའི་སྐོར་འགྲེལ་བརྗོད་གནང་ཡོད་པ་རེད། ད་དུང་ཁོང་གིས་གསུང་པར། ད་ལྟ་བར་བོད་མི་འཛིན་བཟུང་བྱས་ཡོད་མེད་གནས་ཚུལ་གང་ཡང་གསལ་པོ་མེད་ཅིང༌། འོན་ཀྱང་རེས་གཟའ་ཕུར་བུའི་ཕྱི་དྲོ་ནས་བཟུང་རྒྱ་མིའི་དྲག་ཆས་དམག་མི་གསེར་རྟ་ཁུལ་དུ་འགྲེམས་འཇོགས་བྱས་ཡོད་པའི་གནས་ཚུལ་ངེས་གཏན་ཡིན་པ་དང༌། བོད་རང་དབང་གི་ཤོག་ལྷེ་དེ་དག་ནི་བོད་ཡིག་དང་རྒྱ་ཡིག་གཉིས་ཀྱི་ཐོག་བྲིས་པ་ཡིན་ཞིང༌། ད་རེས་རྒྱ་མའི་ལས་ཁུངས་མདུན་བོད་ཀྱི་རྒྱལ་དར་བསྐྱལ་བའི་གནས་ཚུལ་དེ་ནི། གསེར་རྟ་ཁུལ་དུ་ཐེངས་དང་པོ་མིན་པར། ཟླ་བ་འདིའི་འགོ་སྟོད་དུ་གསེར་རྟའི་ཁུལ་གྱི་ཚོང་ཁང་གི་ཁང་པའི་སྟེང་རྒྱལ་བ་རིན་པོ་ཆེའི་སྐུ་པར་དང་བོད་ཀྱི་རྒྱལ་དར་འཕྱར་བའི་རྗེས་རྒྱ་མིས་མེད་པ་བཟོས་ཏེ་རྒྱ་ལམ་ཐོག་དབྱུགས་པར་བརྟེན་བོད་མི་ཉིས་བརྒྱ་ཙམ་འདུ་འཛོམས་ཀྱིས་ངོ་རྒོལ་ལས་འགུལ་སྤེལ་བའི་གནས་ཚུལ་བྱུང་ཡོད་པའི་སྐོར་འགྲེལ་བརྗོད་གནང་ཡོད་པ་རེད།།