བོད་ནང་རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱས་འདུག

༄༅༎དེ་རིང་ཕྱི་ཚེས་བཅུ་བཞི་ཉིན་མོ་དེ་ནི་མདོ་དབུས་ཁམས་གསུམ་གྱི་ས་ཁུལ་མང་པོ་ཞིག་ནང་བོད་མི་ཚོས་རྒྱ་ནག་གཞུང་གི་དབང་བསྒྱུར་ལ་ཞི་བའི་ངོ་རྒོལ་གྱི་ལས་འགུལ་སྤེལ་ནས་ལོ་ངོ་གཅིག་འཁོར་བའི་དུས་དྲན་ཉིན་མོ་ཡིན་པ་དང་དེའི་ཉིན་བོད་ཀྱི་རྒྱལ་ས་ལྷ་ས་གཙོ་བོར་འགྱུར་བའི་བོད་ཀྱི་ས་ཁུལ་ཚང་མའི་ནང་རྒྱ་ནག་གཞུང་གིས་ཉེན་རྟོག་པ་དང་དྲག་ཆས་ཉེན་རྟོག་པ།དམག་མི་སོགས་ཕོན་ཆེ་བཀྲམ་ནས་དམ་བསྒྲགས་ཤུགས་ཆེ་བྱས་ཡོད་པ་དང་བོད་ནང་ཡུལ་སྐོར་སྤྲོ་འཆམ་དུ་བསྐྱོད་མཁན་རྒྱ་མི་རིགས་རུས་མིང་ཁྲུའུ་ཟེར་བ་ཞིག་གིས་ཨེ་པི་གསར་འགྱུར་རྒྱུད་ལམ་གྱི་གསར་འགོད་པར་གྲན་དུའུ་གྲོང་ཁྱེར་དུ་འབྱོར་བའི་སྐབས་བརྗོད་དོན་ལྟར་ན་ཁོ་པ་བོད་ནང་བསྐྱོད་པའི་རིང་ག་པར་བསྐྱོད་ཀྱང་རང་ཉིད་ངོ་ཐག་ཆོད་པའི་ལག་ཁྱེར་བརྟག་དཔྱད་བྱེད་མཁན་ཡོད་པ་དང་དེ་བཞིན་བོད་ཀྱི་ས་ཁུལ་གང་སར་དྲག་ཆས་སྤྲས་པའི་ཉེན་རྟོག་མི་སྣ་འགྲེམས་འཇོག་བྱས་ཡོད་པ་མ་ཟད་བོད་ཀྱི་རྒྱལ་ས་ལྷ་སའི་ནང་ཡོད་པའི་གཙུག་ལག་ཁང་དང་བར་བསྐོར་གྱི་མཐའ་འཁོར་དུ་དྲག་ཆས་ཉེན་རྟོག་དམག་དཔུང་རུ་སྒྲིག་གིས་ཕར་འགྲོ་ཚུར་འོང་བྱེད་བཞིན་ཡོད་པ་དང་དེ་མིན་ལྷ་སའི་མཐའ་དབྱིངས་སུ་དམག་དཔུང་གི་ཐད་ཕུར་གནམ་གྲུས་མཐའ་ཐོག་ནས་བསྐོར་དབྱེངས་བྱེད་ཀྱི་ཡོད་པ་སོགས་མདོར་ན་ཉིན་དེར་བོད་ས་ཡོངས་སུ་དྲག་པོའི་དམ་བསྒྲགས་ཤུགས་ཆེ་ཡོད་པ་གནས་ཚུལ་དངོས་མཐོང་མཁན་གྱི་རྒྱ་མི་རིགས་ཡུལ་སྐོར་སྤྲོ་འཆམ་པ་དང་བོད་ནང་གནས་སྡོད་བྱེད་མཁན་གྱི་གྲོང་མི་ཚོས་འགྲེལ་བརྗོད་བྱས་པའི་སྐོར་ཨེ་པི་དང་རོའུ་ཀྲར་གསར་འགྱུར་རྒྱུད་ལམ་གྱིས་སྤེལ་བའི་གནས་ཚུལ་ནང་འཁོད་འདུག

ན་ནིང་ཕྱི་ཟླ་གསུམ་པའི་ཚེས་བཅུ་བཞི་ཉིན་བོད་མདོ་དབུས་ཁམས་གསུམ་གྱི་ས་ཁུལ་མང་པོའི་ནང་བོད་མི་ཚོས་རྒྱ་ནག་གཞུང་གི་དབང་བསྒྱུར་ལ་ངོ་རྒོལ་གྱི་ལས་འགུལ་ཞི་རྒྱ་ཆེན་པོ་སྤེལ་ནས་དེར་རྒྱ་ནག་གཞུང་གིས་དྲག་གནོན་བྱས་ཏེ་བོད་མི་མང་པོའི་ཚེ་སྲོག་ཤོར་ཡོད་ཅིང་ད་ལོ་ལས་འགུལ་དེ་སྤེལ་ནས་ལོ་གཅིག་འཁོར་བའི་དུས་དྲན་ཉིན་ན་ནིང་ལྟར་གྱི་ངོ་རྒོལ་ལས་འགུལ་སྤེལ་རྒྱུར་དོགས་ཟོན་ཆེད་རྒྱ་ནག་གཞུང་གིས་ཕྱི་ཟླ་གསུམ་པའི་སྔོན་ནས་བོད་ནང་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་བསྐྱོད་རྒྱུ་བཀག་སྡོམ་བྱས་ཡོད་པའི་ཁར་བོད་ཀྱི་ས་ཁུལ་ཚང་མའི་ནང་དྲག་ཆས་དམག་དཔུང་ཕོན་ཆེ་འགྲེམས་འཇོག་བྱས་ནས་དམ་བསྒྲགས་ཤུགས་ཆེ་བྱེད་བཞིན་ཡོད་པ་རེད༎