ཧི་མ་ལ་ཡའི་ཡུལ་མིའི་ཆོས་དང་རིག་གཞུང༌།

༄༅༎རྒྱ་གར་ཕྱོགས་ལ་དྭགས་ཀྱི་རྒྱལ་ས་སླེ་ནང་དུ་བོད་དང་ཧི་མ་ལ་ཡའི་ཞིབ་འཇུག་པ་མི་གྲངས་བཅིུག་འདུ་འཛོམས་ཀྱིས་དེ་སྔ་བོད་དང་ཧི་མ་ལ་ཡའི་དབར་ཐོུང་མ་ཡིན་པའི་ཆོས་དང་རིག་གཞུང་གི་འབྲེལ་བའི་སྐོར་ལ་བགྲོ་གླེང་ཚོགས་འདུ་གནང་ཡོད་པ་རེད།
དེ་ཡང་བོད་དང་ཧི་མི་ལ་ཡའི་ཆོས་དང་རིག་གཞུང་གི་འབྲེལ་བའི་སྐོར་གྱི་བགྲོ་གླེང་ཚོགས་འདུ་དེ་ནི་ཕྱི་ཟླ་༡༠་ཚེས་༥ ནས་༧ བར་རྒྱ་གར་གྱི་རྒྱལ་ས་ལྡི་ལིར་ཡོད་པའི་འཚེ་མེད་ཞི་བའི་ཐེབས་རྩ་ཁང་ཞེས་པའི་ཚོགས་པས་གོ་སྒྲིག་གནང་བ་ཞིག་ཡིན་པ་དང༌། བགྲོ་གླེང་གི་འདུ་འཛོམས་དེའི་ཐོག་བཙན་བྱོལ་བོད་བོད་མིའི་སྒྲིག་འཛུགས་ཀྱི་སྐུ་ཚབ་ཀྱང་མཉམ་ཞུགས་གནང་ཡོད་པ་དང༌། ཚོགས་འདུ་དེའི་ཐོག་ལ། ཐོག་མར་གསུང་བཤད་གནང་མཁན་རྒྱ་གར་གྱི་མངའ་སྡེ་Kashmir ཡི་དགུན་ཁའི་རྒྱལ་ས་Jammu ནང་གི་ཁ་ཆེའི་མཐོ་སློབ་ཁང་གི་འཕྲུལ་རིག་དང་ཚན་རིག་སློབ་དཔོན་བསོད་ནམས་འབྱོར་ལྡན་ལགས་ཀྱིས་བོད་དང་ལ་དྭགས་དབར་གྱི་འབྲེལ་བའི་ལོ་རྒྱུས་སྐོར་དང༌། ད་ལྟའི་འབྲེལ་ལམ་སོགས་སྐོར་གཏམ་བཤད་གནང་ཡོད་འདུག དེ་ནས་བཙན་བྱོལ་བོད་གཞུང་གི་བོད་ཀྱི་སྲིད་ཇུས་ཁང་གི་འགན་འཛིན་བློ་བཟང་ལགས་ཀྱིས། རྒྱ་ནག་གཞུང་གིས་བོད་ཐོག་བཙན་འཛུལ་དང་དབང་བསྒྱུར་བྱས་པའི་ལོ་རྒྱུས་དང༌། རྒྱ་ནག་གཞུང་གིས་བོད་དབང་བསྒྱུར་བྱས་པའི་རྗེས་ལ་བོད་ཀྱི་ཁྱིམ་མཚེས་ཡུལ་གྲུ་ཁག་ཐོག་ལ་ཤུགས་རྐྱེན་ཇི་ལྟར་བྱུང་བའི་སྐོར་གཏམ་བཤད་གནང་ཡོད་པ་རེད། དེ་རྗེས་རྒྱ་གར་གྱི་མཁས་དབང་Sangeeta Thapliyal མཆོག་གིས་བོད་དང་བལ་ཡུལ། རྒྱ་གར་བཅས་ཁྱིམ་མཚེས་རྒྱལ་ཁབ་གསུམ་གྱི་འབྲེལ་བའི་སྐོར་དང༌། ཡང་རྒྱ་གར་གྱི་Aunachal མངའ་སྡེ་ནས་ཡིན་པ་སྐུ་ཞབས་Nani Bath ཡིས་བོད་དང་རྒྱ་གར་གྱི་སྔ་རབས་ཀྱི་འབྲེལ་བའི་སྐོར་དང༌། བཙན་བྱོལ་བོད་གཞུང་གི་བོད་ཀྱི་སྲིད་ཇུས་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས། བོད་དེ་བཞིན་རྒྱ་ནག་གཞུང་གིས་དབང་བསྒྱུར་བྱས་པའི་དཀའ་ངལ་དེ་ནི་བོད་མི་རིགས་ཀྱི་དཀའ་ངལ་ཁོ་ན་མ་ཡིན་པར་ཨེ་ཤེ་ཡའི་ཡོངས་ཀྱི་དཀའ་ངལ་ཞིག་ཡིན་སྐོར་གསུངས་འདུག།