དགེ་འདུན་པ་གསུམ་ལ་བཙོན་ཁྲིམས་བཅད་འདུག

༄༅༎རྒྱ་ནག་གཞུང་གིས་བོད་ཀྱི་ཁམས་སྐྱེ་རྒུ་མདོའི་ཁྲི་རྡོ་རྫོང་གི་སྒ་སྟོད་གྲོང། ཉ་མཚོ་ཟིལ་དཀར་དགོན་པའི་དགེ་འདུན་པ་གསུམ་ལ་མི་ལོ་གཅིག་ནས་གཉིས་བར་གྱི་བཙོན་འཇུག་ཉེས་ཆད་ཐག་གཅོད་བྱས་ཡོད་པ་རེད།
དེ་ཡང་ཕྱི་ཚེས་༡༧ ཉིན་བོད་ཀྱི་བང་ཆེན་དྲ་རྒྱའི་གསར་འགྱུར་ཐོག་གནས་ཚུལ་སྤེལ་བར་གཞིགས་ན། བོད་ཀྱི་མཚོ་སྔོན་ཞིང་ཆེན་ཁོངས་ཀྱི་ཁམས་སྐྱེ་རྒུ་མདོའི་ཁྲི་འདུ་རྫོང་གི་ཉ་མཚོ་ཟིལ་དཀར་དགོན་པའི་སྐུ་ཞབས་བསོད་ནམས་དགེ་བ་ལགས་དང༌། བློ་བཟང་བསམ་གཏན་ལགས། བློ་བཟང་ཉི་མ་ལགས་བཅས་སུ་ཕྱི་ཟླ་གསུམ་པའི་ཚེས་༡༧ ཉིན་ཟི་ཁྲོན་ཞིང་ཆེན་གྱི་ཁྲིམས་ཁང་ཞིག་ཏུ་གསང་བའི་ཁྲིམས་བཤེར་བྱས་ཏེ། སྐུ་ཞབས་བསོད་ནམས་དགེ་བ་ལགས་སུ་ལོ་གཉིས་དང༌། སྐུ་ཞབས་བློ་བཟང་བསམ་གཏན་ལགས་དང་སྐུ་ཞབས་བློ་བཟང་ཉི་མ་ལགས་སོ་སོར་ལོ་གཅིག་དང་ཟླ་བ་དགུའི་བཙོན་འཇུག་ཉེས་ཆད་བཏང་ཡོད་པ་རེད། ད་རེས་ཁོང་གསུམ་ལ་རྒྱ་ནག་གཞུང་གིས་གསང་བའི་ཁྲིམས་བཤེར་བྱས་ཏེ་བཙོན་འཇུག་ཉེས་ཆད་བཏང་བ་དེར་ས་གནས་མི་དམངས་ཚོས་འདོད་བློར་མ་ཕྱིན་པའི་རྣམ་འགྱུར་བཏོན་པ་མ་ཟད། ཟིལ་དཀར་དགོན་པའི་དགེ་འདུན་པ་ཚོས་རྒྱ་ནག་གཞུང་གི་དྲང་བདེན་མིན་པའི་བྱ་སྤྱོད་ལ་ངོ་རྒོལ་བྱེད་རྒྱུའི་འཆར་གཞི་བྱས་ཡོད་ཀྱང༌། དགོན་པའི་མཁན་པོ་སོགས་ལས་སྣེ་བས། ངོ་རྒོལ་གྱི་ལས་འགུལ་སྤེལ་ཚེ་རྒྱ་ནག་གཞུང་གིས་དྲག་པོའི་གོ་མཚོན་བེད་སྤྱད་དེ་དྲག་གནོན་བྱ་རྒྱུ་ཡིན་པས་གྱོང་གུད་དེ་ང་ཚོར་ཕོག་རྒྱུ་ཡིན་པས། ད་རེས་ངོ་རྒོལ་གྱི་ལས་འགུལ་མ་སྤེལ་བའི་ཞུ་བ་ཐེངས་མང་བྱ་དགོས་བྱུང་ཡོད་པ་རེད།
འདི་ལོའི་ཕྱི་ཟླ་གཉིས་པའི་ཚེས་བརྒྱད་ཉིན་ཁྲི་རྡུ་རྫོང་དུ་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་བ་ནས་བཟུང་ད་ལྟ་བར་དུ་ཟིལ་དཀར་དགོན་པའི་དགེ་འདུན་པ་ཡོངས་རྫོགས་དགོན་པའི་ཕྱིར་འགྲོ་བསྐྱོད་རང་དབང་མེད་པར་བཀག་འགོག་བྱས་ཏེ་བཟང་བཙོན་ལྟ་བུ་དོ་དམ་བྱེད་པ་མ་ཟད། རྒྱལ་གཅེས་ཆོས་གཅེས་ཟེར་བའི་སློབ་གསོའི་ལས་འགུལ་སྤེལ་བཞིན་པར་དགེ་འདུན་པ་རྣམས་བསུན་བཙིར་ཆེན་པོ་བཟོ་བཞིན་ཡོད་པ་དང༌། གོང་གསལ་ཟིལ་དཀར་དགོན་པའི་དགེ་འདུན་པ་གསུམ་པོ་ཡང་རྒྱ་ནག་གཞུང་གིས་ཕྱི་ཟླ་གཉིས་པའི་ཚེས་༡༥ ཉིན་འཛིན་བཟུང་བྱས་པ་ནས་བཟུང་ད་བར་དུ་ཁོང་གསུམ་གྱི་གནས་སྟངས་དང་ག་པར་བཙོན་འཇུག་བྱས་ཡོད་མེད་ཀྱི་གནས་ཚུལ་ཙམ་ཡང་ཤེས་རྟོགས་མེད་པའི་གནས་སུ་གྱུར་ཡོད་པ་མ་ཟད། ནང་མི་དང་ཐུགས་འཕྲད་ཀྱང་རྩ་བ་ནས་བྱེད་བཅུག་མེད་པ་རེད།།