འབར་མའི་མི་དམངས་མང་པོ་རྒྱ་ནག་ཏུ་བྲོས་བྱོལ་སླེབས་པ།

༄༅༎འབར་མའི་དྲག་པོའི་གཞུང་གི་དཔུང་དམག་དང་གོ་མཚོན་ཐོགས་པའི་གྲངས་ཉུང་མི་རིགས་ཀྱི་ཤོག་ཁག་དབར་འཐེན་འཁྱེར་བྱུང་ནས་མི་དམངས་སྟོང་ཕྲག་མང་པོ་ཞིག་ས་མཚམས་བརྒལ་ནས་རྒྱ་ནག་ས་ཐོག་བྲོས་བྱོལ་དུ་འབྱོར་ཡོད་སྐོར་མིག་མཐོང་དཔང་པོ་ཚོས་དེ་རིང་བརྗོད་འདུག

འབར་མའི་ཤན་མངའ་སྡེའི་ཀོ་ཀང་ས་གནས་ནས་མི་འབོར་ཕོན་ཆེ་ཞིག་ཁ་ས་ས་མཚམས་བརྒལ་ནས་རྒྱ་ནག་ལྷོ་ཕྱོགས་ཡུན་ནན་ཞིང་ཆེན་གྱི་ནན་སང་གྲོང་ཚོའི་ནང་འབྱོར་ཡོད་སྐོར་ཁུལ་དེའི་ནང་གི་རོའུ་ཀྲར་གསར་ལས་ཁང་གི་གནས་ཚུལ་འབྱུང་ཁུངས་ཀྱིས་བརྗོད་འདུག ཉེ་ཆར་ཕྱི་ཟླ་བརྒྱད་པའི་ཚེས་བརྒྱད་ནས་བཟུང་འབར་མའི་ཀོ་ཀང་ས་གནས་ནང་མི་གྲངས་ཁྲི་གཅིག་ཙམ་ཞིག་རྒྱ་ནག་ནང་བྲོས་བྱོལ་དུ་འབྱོར་ཡོད་སྐོར་ཀྲོང་ཆིང་དགོང་དྲོའི་གསར་ཤོག་ནས་གནས་ཚུལ་བཀོད་འདུག

ཨ་རིའི་རྒྱལ་ས་ལྦ་ཤིང་ཊོན་ནང་རྟེན་གཞི་བྱས་པའི་ཨ་རིའི་འབར་མའི་ལས་འགུལ་ཁང་གིས་འགྲེལ་བརྗོད་གང་ཡག་ལ་འབར་མའི་དྲག་པོའི་གཞུང་གིས་ལོ་ངོ་བཅུ་ཕྲག་གཉིས་མན་ཙམ་རིང་ཕན་ཚུན་འཁྲུག་འཛིང་དང་མེ་འཕེན་མཚམས་འཇོག་བྱས་པའི་རྒྱ་མི་རིགས་མང་བ་གནས་སྡོད་བྱ་ཡུལ་འབར་མའི་ཀོ་ཀང་ས་གནས་ནང་དཔུང་དམག་ཆེད་རྫོངས་བྱས་ཡོད་པ་རེད།

གྲངས་ཉུང་མི་རིགས་མི་འདྲ་བ་བཞི་མཉམ་འབྲེལ་ཐོག་ནས་ཉེ་ལམ་གསར་འཛུགས་བྱས་པའི་འབར་མའི་ཞི་བདེ་དང་དམངས་གཙོ་མདུན་ཕྱོགས་ཚོགས་པ་བརྒྱུད་གྱེན་ལོག་རུ་ཁག་གིས་གསལ་བསྒྲགས་ཤིག་སྤེལ་ཡོད་པའི་ནང་འབར་མའི་དྲག་པོའི་གཞུང་གིས་ཉིས་སྟོང་བཅུ་ལོའི་རྒྱལ་ཡོངས་འོས་བསྡུ་ཆེན་མོ་མ་ཚུགས་གོང་གྱེན་ལོག་པའི་དམག་མི་ཚོ་གཞུང་གི་ས་མཚམས་དཔུང་སྡེའི་ནང་འཛུལ་བཞུགས་བྱེད་དགོས་རྒྱུའི་བཙན་ཀ་གཏོང་བཞིན་ཡོད་སྐོར་བརྗོད་འདུག

འབར་མའི་དྲག་པོའི་དཔུང་དམག་དང་གྲངས་ཉུང་མི་རིགས་གྱེན་ལོག་པའི་དབར་ལོ་ངོ་བཅུ་ཕྲག་གཉིས་རྗེས་བསྐྱར་དུ་འཐབ་འཁྲུག་ལངས་སྲིད་པའི་འཇིགས་སྣང་འོག་མི་མང་པོ་ཞིག་འབར་མ་ནས་རྒྱ་ནག་ཕྱོགས་སུ་བྲོས་བྱོལ་དུ་འགྲོ་བཞིན་ཡོད་སྐོར་འབར་མའི་ཞི་བདེ་དང་དམངས་གཙོ་མདུན་ཕྱོགས་ཚོགས་པས་འགྲེལ་བརྗོད་བྱས་འདུག།