འབར་མའི་འོས་བསྡུའི་རྗེས་མི་མང་པོ་ཞིག་བཙན་བྱོལ་དུ་བྲོས།

༄༅༎འབར་མའི་འོས་བསྡུའི་རྗེས་སུ་ནང་ཁུལ་ཟིང་ཆའི་རྐྱེན་པས་ས་མཚམས་ནས་མི་མང་པོ་ཞིག་བྲོས་བྱོལ་དུ་འགྲོ་བཞིན་ཡོད་པའི་གནས་ཚུལ་ཐོན་འདུག

སྦི་སྦི་སི་གསར་འགྱུར་བརྒྱུད་ལམ་ནས་གནས་ཚུལ་སྤེལ་བར་གཞིགས་ན། བདུན་ཕྲག་སྔོན་མ་འབར་མའི་ནང་རྒྱལ་ཡོངས་འོས་བསྡུ་བྱས་ཡོད་པ་དང་། འོས་བསྡུའི་ནང་འབར་མའི་རྒྱལ་ཡོངས་མང་གཙོ་ཚོགས་པའི་ངོས་ནས་མཉམ་ཞུགས་བྱས་མེད་པ་དང་། དྲག་པོའི་སྲིད་གཞུང་གི་ཕྱོགས་སུ་བསྐྱོད་མཁན་ཆབ་སྲིད་ཚོགས་པ་གཉིས་ནས་མཉམ་ཞུགས་བྱས་ཡོད་ཀྱང་འོས་བསྡུའི་ལས་དོན་ནང་མཉམ་ཞུགས་བྱེད་མཁན་མང་པོ་བྱུང་མེད་པ་མ་ཟད་འོས་བསྡུ་དེ་དག་དྲང་བདེན་ཞིག་བྱུང་མེད་ལུགས་སྲིད་དོན་དབྱེ་ཞིབ་ཚོས་སྐྱོན་བརྗོད་བྱེད་ཀྱི་ཡོད་འདུག འོན་ཀྱང་དྲག་པོའི་གཞུང་ཕྱོགས་ནས་འོས་བསྡུའི་ལས་དོན་ཚགས་ཚུད་བྱུང་ཡོད་ལུགས་དྲིལ་བསྒྲགས་བྱེད་ཀྱི་ཡོད་པ་རེད། འོས་བསྡུའི་ལས་དོན་གྲུབ་པའི་རྗེས་སུ་ས་མཚམས་སུ་གནས་སྡོད་ལོ་མང་པོའི་རིང་རང་སྐྱོང་གི་གནས་བབས་རྩོད་ལེན་བྱེད་མཁན་གྲངས་ཉུང་ཀ་རན་མི་རིགས་ཚོ་དང་། དྲག་པོོའི་གཞུང་གི་དམག་མིའི་དབར་འཁོན་འཁྲུགས་ཀྱིས་རྐྱེན་པས་མི་མང་པོ་ཞིག་ས་མཚམས་བརྒྱུད་ཐའེ་ལན་དྲིའི་ས་མཚམས་སུ་བྲོས་བྱོལ་དུ་ཡོང་བཞིན་ཡོད་ལུགས་ཐའེ་ལན་དྲིའི་འབྲེལ་ཡོད་ཚོས་འགྲེལ་བརྗོད་བྱས་འདུག

འབར་མའི་འོས་བསྡུའི་གྲངས་བཤེར་བྱེད་བཞིན་ཡོད་པ་དང་། ད་ལྟའི་ཆར་འོས་བསྡུའི་གྲུབ་འབྲས་ཐོན་པའི་མཚམས་སུ་ནང་ཁུལ་ཟིང་ཆ་ཡོང་རྒྱུའི་ཉེན་ཁའི་འོག་ས་མཚམས་སུ་སྐྱབས་བཅོལ་དུ་གནས་སྡོད་བྱེད་བཞིན་པའི་ཀ་རན་མི་རིགས་མང་པོ་ཞིག་ནས་ཞེ་སྣང་བྱེད་ཀྱི་ཡོད་པ་མ་ཟད་གོ་སྐབས་ནམ་བྱུང་ཡུལ་གྲུ་གཞན་དུ་བྲོས་བྱོལ་དུ་བསྐྱོད་རྩིས་བྱེད་བཞིན་ཡོད་འདུག།