༸གོང་ས་མཆོག་གི་སྤྱན་གཡོན་མའི་སྐྱ་སྒྲིབ་སྨན་བཅོས།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་རྒྱལ་ས་ལྡི་ལིའི་གསར་པའི་ནང་གི་AIIMS སྨན་ཁང་གི་སྨན་པས་ཉིན་གཉིས་གོང་སྤྱན་གཡོན་མའི་སྐྱ་སྒྲིབ་སྨན་བཅོས་ཞུས་ནས་ད་ཆ་༸གོང་ས་མཆོག་གི་སྤྱན་དངས་སྐྱེད་ཡག་པོ་བྱུང་ཡོད་སྐོར་རྒྱ་གར་གྱི་ཀྲི་ཨེན་ཨེན་གསར་ལས་ཁང་གིས་གནས་ཚུལ་སྤེལ་བཞག
AIIMS སྨན་ཁང་གི་ཁྱབ་ཁོངས་རཱ་ཇེན་རྡར་པར་སའརྡ་མིག་གི་ཚན་པའི་སྤྱི་ཁྱབ་སྨན་པ་ཨར་ལྦི་ཨ་ཛའརྡ་ཡིས་རེས་གཟའ་ཉི་མའི་ཉིན་སྨན་པ་ཇེ་ཨེསི་ཏི་ཏི་ཡལ་གྱི་སྣེ་ཁྲིད་པའི་སྨན་པའི་རུ་ཁག་ཞིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྤྱན་གཡོན་མའི་སྐྱ་སྒྲིབ་མེད་པ་བཟོ་བའི་གཤག་བཅོས་ཞུས་ཡོད་པ་དང༌། སྨན་བཅོས་དེ་ཞུ་བར་དུས་ཡུན་ཕྱག་ཚོད་ཕྱེད་ཀ་མ་གཏོགས་འགོར་མེད་ཅིང། ཤག་བཅོས་དེ་གྲུབ་མཚམས་༸གོང་ས་མཆོག་སྨན་ཁང་ནང་ཞུགས་དགོས་བྱུང་མེད་པ་དང༌། ཁ་ས་བསྐྱར་དུ་སྨན་ཁང་ལ་བརྟག་དཔྱད་གནང་བར་ཆིབས་བསྒྱུར་གནང་ཡོད་སྐོར་འགྲེལ་བརྗོད་གནང་བཞག
༸གོང་ས་མཆོག་ཁ་ས་AIIMS སྨན་ཁང་དུ་ཉིན་རྒྱབ་ཕྱག་ཚོད་༤པ་ཙམ་ལ་ཆིབས་བསྒྱུར་བསྐྱངས་ནས་སྨན་ཁང་དུ་སྐར་མ་༤༥ཙམ་ཞུགས་གདན་འཇགས་ཡོད་སྐོར་སྨན་པ་ཏི་ཏི་ཡལ་གྱིས་འགྲེལ་བརྗོད་དང་འབྲེལ། ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་ཐུགས་དགྱེས་འཚོར་ཆེན་པོ་བྱུང་གནང་ཡོད་པ་དང༌། རྟགས་དཔྱད་ཞུས་ཟིན་པའི་རྗེས་སྨན་པ་ཚོ་དང་ལྷན་དུ་དུས་ཡུན་རིང་པོ་བཀའ་མོལ་གནང་ཡོད་པ་དང༌། ཐུགས་རྗེ་ཆེ་གསུངས་གནང་མཛད་པ་དང་ཆབས་ཅིག AIIMS སྨན་ཁང་གི་ཞབས་ཞུའི་ལས་དོན་ཚགས་ཚུད་ཡོད་པར་བསྔགས་བརྗོད་གནང་སོང་ཅེས་འགྲེལ་བརྗོད་གནང་འདུག། ༸གོང་ས་མཆོག་ཕྱི་ཟླ་གསུམ་པའི་ནང་AIIMS སྨན་ཁང་ལ་བསྐྱར་དུ་ཐེངས་ཅིག་ཆིབས་བསྒྱུར་གནང་ཡག་ཡིན་པའི་གནས་ཚུལ་འདུག།