༸གོང་ས་མཆོག་དང་ཨ་རིའི་སྲིད་འཛིན་མཇལ་འཕྲད་གནང་རྒྱུ།

༄༅༎རྒྱ་ནག་གཞུང་གིས་སྐྱོན་བརྗོད་བྱེད་མིན་ལ་མ་ལྟོས་པར་ཨ་རིའི་སྲིད་འཛིན་མཆོག་ནས་བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་རྒྱུའི་མཛད་འཆར་ལ་འགྱུར་བ་གང་ཡང་མེད་པའི་སྐོར་ནན་བརྗོད་གནང་ཡོད་པའི་གནས་ཚུལ་ཐོན་འདུག

རེས་གཟའ་ལྷག་པའི་ཉིན་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་མའ་ཀྲའོ་ཤུ་ཡིས་ཨ་རིའི་སྲིད་འཛིན་མཆོག་གི་ཏ་ལའི་བླ་མ་ལྷན་དང་མཇལ་འཕྲད་གནང་རྒྱུར་རྒྱ་ནག་གཞུང་གིས་མཐའ་གཅིག་ཏུ་ངོ་རྒོལ་ཡོད་ལུགས་དང་རྒྱལ་ཁབ་གཉིས་ཀྱི་འབྲེལ་བའི་འཕེལ་རིམ་ལ་དོ་ཕོག་གི་ཤུགས་རྐྱེན་མི་ཡོངས་བའི་སླད་རྣོ་ངར་ཆེ་བའི་བོད་ཀྱི་གནད་དོན་ཐད་ལ་ཨ་རི་གཞུང་གིས་རྒྱ་ནག་ལ་ཕོག་ཐུག་མི་ཡོང་བའི་དོག་ཟོན་གནང་དགོས་པའི་སྐོར་བསྐྱར་དུ་སྐུལ་མ་བཏང་ཡོད་པ་རེད་

ཡིན་ན་ཡང་ཁ་ས་ཨ་རིའི་སྲིད་འཛིན་ལས་ཁང་གི་མགྲིན་ཚབ་པ་སྦིལ་སྦར་ཀྲེན་གྱིས་ཨ་རིའི་སྲིད་འཛིན་མཆོག་གི་༸གོང་ས་༸ཏ་ལའི་བླ་མ་མཆོག་དང་མཇལ་འཕྲད་གནང་རྒྱུར་འགྱུར་བ་གང་ཡང་མེད་པའི་སྐོར་གསལ་འདོན་གནང་ཡོད་པ་རེད་ ཁོང་གིས་གསུངས་ན་ སྲིད་འཛིན་ཨོ་སྦ་མ་མཆོག་གིས་༸གོང་ས་༸ཏ་ལའི་བླ་མ་མཆོག་དང་མཇལ་འཕྲད་གནང་རྩིས་ཡོད་པ་དེ་སྔ་ལོ་སྲིད་འཛིན་མཆོག་རྒྱ་ནག་ཏུ་རྒྱལ་དོན་འཚམས་གཟིགས་སུ་ཕེབས་སྐབས་རྒྱ་ནག་གི་དཔོན་རིགས་ཚོར་གསལ་སྟོན་གནང་ཡོད་པ་དང་ དེ་གཞིར་བཟུང་མཇལ་འཕྲད་གནང་རྒྱུ་ཡིན་པའི་སྐོར་གསར་འགོད་པ་ཚོར་འགྲེལ་བརྗོད་གནང་བཞག་  སྲིད་འཛིན་གྱི་མགྲིན་པས་མུ་མཐུད་གསུངས་དོན་དུ་ ༸གོང་ས་༸ཏ་ལའི་བླ་མ་མཆོག་ནི་ཆོས་ཕྱོགས་དང་རིགས་གཞུང་གི་ཐད་ནས་རྒྱལ་སྤྱིའི་ཐོག་གུས་བརྩི་ལྡན་པའི་དབུ་ཁྲིད་ཅིག་ཡིན་ཞིང་ སྲིད་འཛིན་མཆོག་ནས་༸གོང་ས་མཆོག་དང་མཇལ་འཕྲད་གནང་རྒྱུ་དེ་ཡང་མཚན་གནད་དེའི་ཐོག་ནས་མཇལ་འཕྲད་གནང་རྒྱུ་ཡིན་སྐོར་འགྲེལ་བརྗོད་གནང་འདུག བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་འདིའི་ཚེས་༡༧ཉིན་ནས་བཟུང་ཨ་རིའི་ནང་ཉིན་གྲངས་བཅུའི་རིང་ཆིབས་བསྒྱུར་གནང་རྒྱུ་ཡིན་ཞིང་ཚེས་༡༧ནས་༡༩བར་རྒྱལ་ས་ལྦ་ཤིང་ཀྲོན་ཏུ་ཆིབས་བསྒྱུར་ཕེབས་གཏན་འཁེལ་ཡོད་པ་རེད་༎