༸གོང་ས་མཆོག་གི་རྒྱལ་ས་ལྡི་ལིའི་ནང་གི་མཛད་འཆར།

༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་གར་གྱི་ལྡི་ལིར་ཚོགས་རྒྱུའི་གལ་ཆེའི་ལྷན་ཚོགས་ཤིག་ཐོག་ཆིབས་བསྒྱུར་གཙོས་པའི་མཛད་འཕྲིན་དུ་མ་བསྐྱང་གནང་མཛད་འཆར་ཡོད་པའི་གནས་ཚུལ་ཐོན་འདུག

དེ་ཡང་རྒྱལ་ས་ལྡི་ལིར་རྟེན་གཞི་བྱས་པའི་བོད་གཞུང་སྐུ་ཚབ་དོན་གཅོད་ལས་ཁུངས་ཀྱིས་སྤེལ་བའི་གསར་འགོད་གསལ་བསྒྲགས་གནང་གསལ་ལྟར་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཚེས་ཉི་ཤུའི་སྔ་དྲོ་ཨི་ཊ་ལི་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱང་སྟེ་དེ་ཉིན་དགོང་དྲོ་ཤྲི་ཕོཏ་ཞེས་སྙན་གྲགས་ཅན་གྱི་ཚོགས་ཁང་དུ་མང་ཚོགས་ལ་བཀའ་སློབ་སྩལ་རྒྱུ་དང་དེ་ནས་ཚེས་ཉི་ཤུ་གཅིག་ཉིན་མེཀསི་ཧེལ་ཐི་ཁེར་ཞེས་པའི་སྨན་ཁང་གི་ཡན་ལག་སྨན་ཁང་ཞིག་དབུ་འབྱེད་གནང་རྒྱུ་ཡིན་པ་རེད། དེ་ནས་ཉིན་རྒྱབ་ལྡི་ལི་མཐོ་རིམ་གཙུག་ལག་སློབ་གཉེར་ཁང་དུ་ལྡི་ལི་མཐོ་སློབ་དང་ལྦར་ན་བོད་ཀྱི་ཆེས་མཐོའི་གཙུག་ལག་སློབ་གྲྭ་གཉིས་ཀྱི་ཐུན་མོང་གོ་སྒྲིག་འོག་བོད་ཀྱི་ལོ་རྒྱུས་དང་རིག་གཞུང་སྐོར་གྱི་རྒྱལ་སྤྱིའི་ཚོགས་འདུའི་ཐོག་༸གོང་ས་མཆོག་ཆིབས་བསྒྱུར་གནང་སྟེ་མཇུག་བསྡོམས་གསུངས་བཤད་སྩལ་རྒྱུ་ཡིན་པ་རེད། ཉིན་གྲངས་གསུམ་སྐོང་ཚོགས་གནང་རྒྱུའི་བོད་ཀྱི་ལོ་རྒྱུས་དང་རིག་གཞུང་སྐོར་གྱི་ལྷན་ཚོགས་འདིའི་ཐོག་རྒྱལ་སྤྱིའི་ཡུལ་གྲུ་གང་ས་ནས་བོད་དོན་མཁས་དབང་བཞི་བཅུ་ལྷག་ལྷན་བཅར་གནང་སྟེ་བོད་ཀྱི་ལོ་རྒྱུས་དང་རིག་གཞུང་གཏིང་ཟབ་དང་ཕྱི་ཕྱོགས་ལ་ཤུགས་རྐྱེན་གྱི་ཁྱབ་ཚད་སྐོར་གྲོས་བསྡུར་དང་བགྲོ་གླེང་གནང་རྒྱུ་ཡིན་པ་རེད། དེ་ནས་ཚེས་ཉི་ཤུ་གཉིས་ཉིན་ཧིནརྡ་ས་ལྦ་རཇ་འམ་རྒྱ་གར་རང་བཙན་ཞེས་མེས་པོ་དམ་པ་གྷན་རྡི་རྗེས་དྲན་གྱི་རྒྱལ་སྤྱིའི་ཚོགས་འདུ་ཞིག་གི་ཐོག་༸གོང་ས་མཆོག་ཆིབས་སྒྱུར་བསྐྱང་གནང་མཛད་རྒྱུ་དང་ཡང་ཚེས་ཉི་ཤུ་གསུམ་གྱི་སྔ་དྲོ་༸གོང་ས་མཆོག་ནས་ཆོས་རིག་ལས་ཁུངས་ཀྱི་གོ་སྒྲིག་ཐོག་ཧི་མ་ལ་ཡའི་ཁུལ་ནས་ཕེབས་པའི་བློ་ཆེན་རྣམས་ཀྱི་ལྷན་ཚོགས་ཀྱི་དབུ་འབྱེད་མཛད་སྒོའི་ཐོག་ཆིབས་སྒྱུར་བསྐྱང་གནང་མཛད་རྒྱུ་བཅས་མཛད་འཆར་གསལ་བསྒྲགས་གནང་འདུག།