༸གོང་ས་མཆོག་ནས་བོད་མི་གཞོན་སྐྱེས་ལ་ནང་ཆོས་ངོ་སྤྲོད།

༄༅༎བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ཉི་ཤུ་བཞི་ནས་ཉི་ཤུ་ལྔ་ཉིན་གྲངས་གཉིས་རིང་བོད་མི་གཞོན་སྐྱེས་ཆོར་ནང་ཆོས་ངོ་སྤྲོད་གནང་རྒྱུའི་མཛད་འཆར་དབུ་འཛུགས་གནང་ཡོད་པའི་སྐོར་བཙན་བྱོལ་བོད་གཞུང་གི་འཕྲིན་གཏོང་དྲ་རྒྱའི་ཐོག་གནས་ཚུལ་སྤེལ་བཞག

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོའི་ཕྱག་ཚེས་བརྒྱད་དང་ཕྱེད་ཀའི་ཐོག་རྡ་ས་བོད་ཕྲུག་ཁྱིམ་སྡེར་བོད་རིགས་ན་གཞོན་ཚོར་ནང་ཆོས་ངོ་སྤྲོད་དབུ་འཛུགས་གནང་སྟེ་ནང་ཆོས་ངོ་སྤྲོད་ཀྱི་མཛད་རིམ་དེ་རྣམས་ཐད་ཀར་བཙན་བྱོལ་བོད་གཞུང་གི་དྲ་རྒྱའི་བརྙན་འཕྲིན་ཐོག་གཟིགས་ཐུབ་རྒྱུ་ཡིན་ཞིང་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་ན་གཞོན་ཚོར་ནང་ཆོས་ངོ་སྤྲོད་གནང་བའི་མཛད་རིམ་དེ་ནི་ཐོག་མར་ཕྱི་ལོ་ཉིས་སྟོང་བདུན་ལོར་དབུ་བཙུགས་གནང་སྟེ་འདི་ལོ་ཐེངས་གསུམ་པ་དེ་ཡིན་པ་རེད། ནང་ཆོས་ངོ་སྤྲོད་མཛད་འཆར་གོ་སྒྲིག་གནང་མཁན་ཚོགས་ཆུང་གི་འགན་འཛིན་དང་བོད་མི་དམངས་སྤྱི་འཐུས་ཟླ་བ་ཚེ་རིང་ལགས་ཀྱིས་ངོ་སྤྲོད་གནང་བར་གཞིགས་ན་སྤྱིར་བཏང་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་ངོ་སྤྲོད་གནང་ཡུལ་དེ་ནི་གཙོ་བོ་བོད་མི་གཞོན་སྐྱེས་ཚེ་ལོ་ཚད་ལ་ཚད་གཞི་གང་ཡང་མེད་པ་རེད་ཅེས་དང་ནང་ཆོས་ཞུ་བར་བཅར་འདོད་ཡོད་མཁན་ཚོས་ངེས་པར་དུ་དོ་བདག་སོ་སོའི་ལོ་རྒྱུས་ཐུང་ངུ་ཞིག་གྲ་སྒྲིག་ཚོགས་ཆུང་ལ་ཕུལ་ཏེ་མིང་གཞུང་ཐོ་འགོད་བྱ་དགོས་ཀྱི་ཡོད་པ་དང་ཡིན་ནའང་ནང་ཆོས་ངོ་སྤྲོད་གནང་ཡུལ་ཚོགས་ཁང་དེའི་ནང་སྤྱིར་རྐུབ་སྟེགས་གསུམ་སྟོང་གཤོང་ཚད་ཡོད་པའི་ནང་ནས་རྐུབ་སྟེགས་ཆིག་སྟོང་བཞུགས་སྒར་རྡ་ར་མ་ས་ལའི་ཕྱི་ཕྱོགས་ནས་ཆོས་ཞུ་བ་ཚོར་མངགས་ཉར་བྱས་ཡོད་པའི་སྐོར་འགྲེལ་བརྗོད་གནང་ཡོད་པ་རེད།