༧གོང་ས་མཆོག་འཛམ་གླིང་ནང་པའི་ཆོས་ཚོགས་སུ་ཆིབས་བསྒྱུར།

༄༅༎བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལིར་ཚུགས་བཞིན་པའི་འཛམ་གླིང་ནང་པའི་ལྷན་ཚོགས་ཀྱི་མཇུག་བསྡོམས་མཛད་སྒོའི་སྐུ་མགྲོན་གཙོ་བོར་གདན་ཞུ་གསོལ་འདེབས་ཞུ་དོན་ལྟར་བཞུགས་སྒར་ནས་ཆིབས་ཐོན་གྱིས་རྒྱ་གར་གྱི་རྒྱལ་ས་ལྡི་ལིར་ཞབས་སོར་འཁོད་གནང་མཛད་ཡོད་པ་རེད།
ལྡི་ལིར་ཚུགས་བཞིན་པའི་འཛམ་གླིང་ནང་པའི་ལྷན་ཚོགས་དེ་བཞིན་ཨ་ཤོ་ཀ་མི་ཤིན་(Ashoka Mission)ཞེས་པའི་ཆོས་ཚོགས་ནས་གོ་སྒྲིག་ཞུས་པ་ཞིག་ཡིན་པ་དང་ དེའི་ནང་འཛམ་གླིང་ཡུལ་གྲུ་ ༣༢ ལྷག་ནས་ནང་པའི་མཁས་པ་དང་དགེ་འདུན་པ་སོགས་ཚོགས་མི་སྟོང་ཕྲག་བརྒལ་བ་ཆེད་བཅར་ཞུས་ཡོད་པ་རེད།
༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ ཕྱི་ཟླ་ ༡༡ ཚེས་ ༣༠ ཉིན་ཚོགས་འདུའི་མཇུག་བསྡོམས་ཀྱི་བཀའ་སློབ་གསུང་བཤད་སྩལ་གནང་མཛད་རྒྱུ་ཡིན་ཞིང་ དེ་རྗེས་ཕྱི་ཟླ་ ༡༢ ཚེས་ ༣ ཉིན་ ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་India Habitat Center ཞེས་པར་བདེ་སྐྱིད་ཀྱི་སྒྱུ་སྩལ་ཞེས་པའི་བརྗོད་གཞིའི་སྒོ་ནས་མང་ཚོགས་ལ་བཀའ་སློབ་གསུང་བཤད་སྩལ་གནང་མཛད་རྒྱུ་དང་གསུང་བཤད་དེ་ནི་པེན་གུཨིན་(Penguin)ཞེས་པ་འཛམ་གླིང་ནང་གི་སྙན་གྲགས་ཆེ་བའི་དཔེ་དེབ་དཔར་བསྐྲུན་ཁང་གི་ལོ་རེའི་གསུང་བཤད་རིམ་པ་གོ་སྒྲིག་ཞུ་བཞིན་ཡོད་པ་དེའི་དེའི་ཁོངས་ཤིག་ཡིན་པ་རེད།
རྒྱ་གར་གྱི་རྒྱལ་ས་ལྡི་ལའི་ནང་གི་མཛད་འཆར་ཁག་ལེགས་གྲུབ་རྗེས་༧གོང་ས་༧སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་སུ་ཡོད་པའི་ ཧོན་སུར་རབ་རྒྱས་གླིང་བོད་མིའི་གཞིས་སྒར་དུ་ཆིབས་བསྒྱུར་གྱིས་དཔལ་ལྡན་བརྒྱུད་སྨད་གྲྭ་ཚང་ནས་ཇི་ལྟར་གསོལ་འདེབས་ཞུས་དོན་ལྟར་ ཕྱི་ཟླ་ ༡༢ ཚེས་ ༥་ནས་ ༧་ བར་༧གོང་ས་༧སྐྱབས་མགོན་ཆེན་པོ་མཆོག་ནས་ཆོས་འབྲེལ་གསུང་ཆོས་སྩལ་གནང་མཛད་རྒྱུ་ཡིན་འདུག།