༸གོང་ས་མཆོག་གིས་རྒྱ་གར་ལྷོ་ཕྱོགས་ཀྱི་མཛད་འཕྲིན།

༄༅༎ཟླ་བ་འདིའི་ཚེས་༣ཉིན་སྔ་དྲོ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་བེ་ལ་གོ་བིའི་སྔ་འགྱུར་མཐོ་སློབ་མདོ་སྔགས་རིག་པའི་གླིང་གི་བཤད་གྲའི་དགེ་ཚུལ་མཐར་སོན་པ་རྣམས་ལ་ཕྱག་འཁྱེར་གནང་བའི་རྟེན་འབྲེལ་མཛད་སྒོ་ཐེངས་དྲུག་པའི་ཐོག་ཆིབས་བསྒྱུར་བསྐྱངས་ཏེ་ མཛད་སྒོའི་ཐོག་ཆེད་ཕེབས་གནང་བའི་བཙན་བྱོལ་བོད་གཞུང་གི་མཛད་གཙོ་རྣམ་པ་དང་  རྒྱ་གར་ལྷོ་ཕྱོགས་ཀ་ན་ཊ་མངའ་སྡེའི་དྲུང་ཆེ་མཆོག་གི་གཙོས་ཕྱི་ནང་སྐུ་མགྲོན་རྣམ་པ་དང་སེར་སྐྱ་མི་མང་ཁྱོན་ཆེ་ཞིག་འདུ་འཛོམས་ཀྱི་ཐོག་༧གོང་ས་༧སྐྱབས་མགོན་ཆེན་པོ་མཆོག་ནས་མཛད་སྒོ་དབུ་འབྱེད་དང་འབྲེལ་བཀའ་སློབ་སྩལ་བའི་ནང་ སྐྱབས་རྗེ་གྲུབ་དབང་དཔལ་ནོར་རིན་པོ་ཆེ་མཆོག་དགོངས་པ་གཞན་དོན་དུ་ཕེབས་ནས་ཞལ་བཞུགས་མེད་པར་བློ་ཕམ་ཞིག་ཡིན་ཡང་ ཆོས་གར་དེའི་ནང་རིན་པོ་ཆེ་ཞལ་བཞུགས་པ་བཞིན་རིན་པོ་ཆེའི་དགོངས་པ་མུ་མཐུད་སྒྲུབ་བཞིན་འདུག་པ་དེ་ནི་དགའ་འོས་པ་ཞིག་ཡིན་པ་བཀའ་སྩལ་གནང་མཛད་པ་དང་ཕྱོགས་མཚུངས་ ཞིང་གཤེགས་སྐྱབས་རྗེ་གྲུབ་དབང་རིན་པོ་ཆེ་དམ་པ་གང་ཉིད་ཀྱིས་ནང་པ་སངས་རྒྱས་པའི་བསྟན་པར་འཛིན་སྐྱོང་སྤེལ་གསུམ་གྱི་ཐུགས་ཁུར་ཆེ་བཞེས་ཀྱི་རླབས་ཆེན་མཛད་རྗེས་ལ་གདེང་འཇོག་བཟང་པོ་གནང་ཡོད་པ་རེད་

དེ་བཞིན་༧གོང་ས་༧སྐྱབས་མགོན་ཆེན་པོ་མཆོག་ནས་བཀའ་སློབ་སྩལ་བའི་ནང་ རབ་བྱུང་བ་རྣམས་ཀྱིས་གྲུབ་མཐའི་ཕྱོགས་ལྷུང་སྤང་ནས་ཆོས་ལུགས་རིས་མེད་ལ་དད་པ་དང་དས་སྣང་སྦྱོང་རྒྱུ་གལ་ཆེ་ཡིན་པའི་ལམ་སྟོན་བཀའ་སློབ་སྩལ་བ་མ་ཟད་ རབ་བྱུང་བ་ཚོས་གཞི་ཚུལ་ཁྲིམས་ཀྱི་བསླབ་པ་མ་ཉམས་པ་སྲུང་རྒྱུའི་གལ་ཆེའི་བཀའ་སློབ་གནང་ཡོད་འདུག