རྒྱ་གཞུང་དང་ལྟ་བ་མི་མཐུན་པ་ཚོར་བཟོད་བསྲན་དགོས་པའི་རེ་བ།

༄༅༎ཐའེ་ལྦན་གྱི་སྲིད་འཛིན་མཱ་ཡན་ཇུ་ཡིས་རྒྱ་ནག་གཞུང་ལ་སྲིད་དོན་ཀྱི་ལྟ་བ་མི་མཐུན་པ་འཛིན་མཁན་ཚོར་བཟོད་བསྲན་གནང་དགོས་ཀྱི་ཡོད་པའི་སྐུལ་མ་གནང་ཡོད་པ་རེད་ དེ་ནི་གཙོ་བོ་ཐའེ་ལྦན་ནང་གི་བརྒྱུད་ལམ་ཁག་གིས་སྲིད་འཛིན་མཱ་ཡན་ཇུ་ལ་རྒྱ་ནག་གཞུང་གིས་རྒྱ་ནག་གཞུང་དང་སྲིད་དོན་གྱི་ལྟ་བ་མི་མཐུན་པ་འཛིན་མཁན་སྐུ་ཞབས་ལིའུ་ཤའོ་ཕུའུ་ལ་ལོ་བཅུ་གཅིག་གི་ཁྲིམས་ཆད་བཏང་བའི་ཐད་དགོངས་ཚུལ་བཀའ་དྲིས་ཞུས་པའི་བཀའ་ལན་དུ་ཁོང་གིས་རྒྱ་ནག་གཞུང་ལ་གཞུང་དང་སྲིད་དོན་གྱི་ལྟ་བ་མཐུན་པ་འཛིན་མཁན་ཚོར་བཟོད་བསྲན་གནང་དགོས་ཀྱི་རེད་ཅེས་གསུངས་ཡོད་པ་རེད་

དེ་ཡང་ཁོང་གིས་ཁོང་སྐུ་སྒེར་ལ་མཚོན་ན་སྲིད་ཞུའི་ལས་འཁུར་ནང་རྒྱུན་དུ་ནས་དམངས་གཙོ་དང་འགྲོ་བ་མིའི་ཐོབ་ཐང་ སྲུང་སྐྱོབ་ཀྱི་ལས་དོན་ལ་འབད་བཙོན་ཞུ་མཁན་ཞིག་ཡིན་ཞེས་དང་ངས་རྒྱ་ནག་གཞུང་ལའང་རྒྱ་ནག་ནང་ཞི་བའི་ངང་སྲིད་དོན་གྱི་དགོངས་ཚུལ་མི་མཐུན་པ་བཏོན་མཁན་ཚོར་བཟོད་བསྲན་གནང་དགོས་པའི་སྐུལ་མ་ཞུ་ཡི་ཡོད་ཅེས་གསུངས་ཡོད་པ་རེད་

དགུང་གྲངས་༥༣་ལ་ཕེབས་པའི་སྐུ་ཞབས་ལིའུ་ཤའོ་ཕུའུ་ནི་སྔ་ལོ་རྒྱ་ནག་གཞུང་ལ་ཆབ་སྲིད་ཚོགས་པ་གཅིག་གི་དབང་འཛིན་མིན་པར་ཡུལ་ནང་དམངས་གཙོ་དང་ཆབ་སྲིད་ཀྱི་རང་དབང་སྤྲོད་དགོས་པའི་ཉིས་སྟོང་བརྒྱད་ཀྱི་དམངས་གཙོའི་བསྒྲགས་གཏམ་ཞེས་པའི་རྩ་དོན་ཡིག་ཆ་ ཟིན་བྲིས་གནང་མཁན་དེ་ཡིན་པ་དང་རྒྱ་ནག་གཞུང་གིས་ཁོང་ནས་མང་ཚོགས་ལ་ངན་སྐུལ་གྱིས་རྒྱལ་ཁབ་ཀྱི་སྲིད་དབང་མགོ་རྟིང་བསློག་རྒྱུའི་ ངན་བྱུས་སྒྲིག་གི་ཡོད་པའི་ཉེས་བཙུགས་བྱས་ཏེ་ཕྱི་ཚེས་ཉི་ཤུ་ལྔ་ཉིན་ཁོང་ལ་ལོ་བཅིུག་གི་བཙོན་བཅུག་གི་ཁྲིམས་ཆད་བཏང་ཡོད་པ་རེད་

ཐའེ་ལྦན་གྱི་ཕྱོགས་འགལ་དམངས་གཙོ་ཡར་ཐོན་ཚོགས་པས་སྲིད་འཛིན་མཱ་ཡན་ཇུ་གིས་རྒྱ་ནག་གཞུང་ལ་འབྲེལ་བ་ཡར་རྒྱས་བཏོང་རྒྱུ་གཙོ་བཟུང་གིས་རྒྱ་ནག་གཞུང་གིས་་མང་ཚོགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྤྱོད་ཚུལ་ལ་དོ་འཁུར་གནང་གི་མེད་པའི་སྐྱོན་བཙུགས་བྱེད་ཀྱི་ཡོད་པ་རེད༎