ཐའེ་ལྦན་ནི་ད་ལྟའི་གནས་སྟངས་སུ་མུ་མཐུད་སྡོད་རྒྱུའི་སྐོར།

༄༅༎ཐའེ་ལྦན་གྱི་སྲིད་འཛིན་མའ་དབྱིངས་ཇིའུ་མཆོག་གིས་ཐའེ་ལྦན་དང་རྒྱ་ནག་སྐམ་ས་གཅིག་གྱུར་ཐད་འགྱུར་བ་མེད་སྐོར་གསལ་བཤད་གནང་ཡོད་པ་རེད།

དེ་ཡང་ཐའེ་ལྦན་གྱི་སྲིད་འཛིན་མའ་དབྱིངས་ཇིའུ་མཆོག་གིས་བར་སྐབས་ཤིག་ལ་ཐའེ་ལྦན་གྱི་རྒྱལ་ས་ཐའེ་པེ་ནང་རྟེན་གཞི་བྱས་པའི་སྙན་དེབ་ཅིག་ལ་རྒྱ་ནག་གཅིག་གྱུར་གྱི་རྩ་དོན་སྒྲུབ་སྲིད་པ་རེད་ཅེས་བརྗོད་ཡོད་པ་དེའི་ཐོག་ཐའེ་ལྦན་ནང་གི་སྲིད་དོན་ཐོག་ཚོད་དཔག་གནང་མཁན་དང་དབྱེ་ཞིབ་པ་ཁག་ཅིག་གིས་སྲིད་འཛིན་མའ་དབྱིངས་ཇིའུ་མཆོག་གིས་རྒྱ་ནག་གི་དམིགས་ཡུལ་ལྟར་ཐའེ་ལྦན་དང་རྒྱ་ནག་ཟླ་སྒྲིལ་གཏོང་རྒྱུའི་ཁ་ཕྱོགས་སུ་བསྒྱུར་རྒྱུའི་འདུན་པ་ཆེན་པོ་ཡོད་པ་རེད་ཅེས་སྐྱོན་བརྗོད་བྱེད་བཞིན་ཡོད་པ་རེད། ཡིན་ནའང་ཐའེ་ལྦན་སྲིད་འཛིན་གྱི་མགྲིན་ཚབ་པ་ལྦང་ཡིས་གསར་འགོད་པར་གསལ་སྟོན་གནང་བར་གཞིགས་ན་སྲིད་འཛིན་མའ་དབྱིངས་ཇིའུ་མཆོག་གིས་ཐའེ་ལྦན་སྙན་དེབ་ཐོག་གསུངས་པ་དེ་དག་ཐའེ་ལྦན་དང་རྒྱ་ནག་སྐམ་ས་གཅིག་གྱུར་གནང་རྒྱུའི་འདུན་པ་ཡོད་པ་ཞིག་མ་ཡིན་པར་དེ་ནི་སྲིད་དོན་དབྱེ་ཞིབ་པ་ཚོས་གོ་ནོར་ཐེབས་པའི་གནས་སྟངས་སུ་གྱུར་ཡོད་ལུགས་གསལ་སྟོན་གནང་བ་མ་ཟད་སྲིད་འཛིན་མའ་དབྱིངས་ཇིའུ་མཆོག་གིས་ཐའེ་ལྦན་དེ་བཞིན་ད་ལྟའི་གནས་སྟངས་སུ་རྒྱུན་གནས་གནང་རྒྱུ་ཡིན་པ་མ་ཟད་མ་འོངས་ཐའེ་ལྦན་གྱི་ཐག་གཅོད་དེ་ཐའེ་ལྦན་མི་མང་ས་ཡ་ཉི་ཤུ་རྩ་གསུམ་གྱི་ལག་ཏུ་གནས་ཡོད་ལུགས་བརྗོད་གནང་གི་ཡོད་པ་རེད་ཅེས་དེ་རིང་རེས་གཟའ་ལྷག་པའི་ཉིན་གསལ་སྟོན་གནང་བཞག