ཐའེ་ལྦན་གྱིས་རྒྱ་ནག་དང་ཚོང་འབྲེལ་གྲོས་མོལ་ཕྱིར་འགྱངས།

༄༅༎ཐའེ་ལྦན་གྱིས་རྒྱ་ནག་དང་ཚོང་འབྲེལ་ཐོག་གྲོས་མོལ་གནང་རྒྱུའི་ལས་འཆར་དེ་ཕྱིར་འགྱངས་གནང་ཡོད་པ་རེད། ཐའེ་ལྦན་གྱི་ཕྱི་འབྲེལ་ཚོང་དོན་ལས་ཁང་གི་འགན་འཛིན་དང་ཚོང་དོན་སྐུ་ཚབ་འཐུས་མིའི་འགོ་འཁྲིད་སྐུ་ཞབས་ཧུའང་ཁྲི་ཕེང་ཡིས་སྔོན་འཆར་རྒྱ་ནག་གི་ས་ཐོག་གནང་རྒྱུའི་ཚོང་འབྲེལ་གྱི་གྲོས་མོལ་དེ་ཟླ་བ་རྗེས་མ་བར་དུས་འགྱང་གནང་སྐོར་གསུངས་འདུག ཁོང་གིས་དེང་སྐབས་ཐའེ་ལྦན་གཞུང་གི་སྔོན་རྩིས་འཆར་གཞི་ཁག་གྲོས་ཚོགས་ནང་བསྐྱར་ཞིབ་གནང་བཞིན་པར་བརྟེན་ང་ཚོས་རྒྱ་ནག་དང་ཚོང་འབྲེལ་ཐོག་གྲོས་མོལ་གནང་རྒྱུའི་ལས་འཆར་དེ་ཟླ་བ་རྗེས་མ་བར་དུ་དུས་འགྱང་གནང་བ་ཡིན་ཞེས་གསུངས་འདུག རྒྱ་ནག་གཞུང་དང་མཐུན་འབྲེལ་ཤུགས་ཆེ་བྱེད་པའི་ཐའེ་ལྦན་གྱི་དལྟའི་གཞུང་དེས་གལ་སྲིད་རྒྱ་ནག་གཞུང་དང་ཚོང་འབྲེལ་གྱི་གྲོས་མཐུན་ཞིག་བཞག་གནང་ཐུབ་པ་ཡིན་ན་དེས་ཐའེ་ལྦན་གྱི་དཔལ་འབྱོར་གྱི་འཕེལ་རྒྱས་དེ་བརྒྱ་ཆ་གཅིག་གི་འཕར་ཆ་ཡོང་རྒྱུའི་རེ་བ་གནང་གི་ཡོད་པ་རེད། ཡིན་ནའང་ཐའེ་ལྦན་གྱི་ཕྱོགས་འགལ་དམངས་གཙོ་ཡར་ཐོན་ཚོགས་པས་གལ་སྲིད་ཐའེ་ལྦན་གྱིས་རྒྱ་ནག་དང་ཚོང་འབྲེལ་གྱི་གྲོས་མཐུན་ཞིག་བཞག་གནང་བ་ཡིན་ན་དེས་ཐའེ་ལྦན་གྱི་ཡུལ་དེ་ཐ་དད་ཅིག་ཡིན་པའི་དལྟའི་ངོ་བོ་དེར་གནོད་ཚབ་ཡོང་རྒྱུའི་ཡིན་པའི་ཉེན་བརྡ་བཏང་གནང་ཡོད་པ་རེད། ཐའེ་ལྦན་གྱི་གསར་འགྱུར་བརྒྱུད་ལམ་ཁག་གིས་གོང་ཞུས་རྒྱ་ནག་དང་གྲོས་མོལ་གནང་རྒྱུའི་ཚོང་འབྲེལ་གྱི་འབྲེལ་བ་དེ་ཐེངས་བཞི་པ་དེ་ཆགས་ཀྱི་ཡོད་པ་དང་གྲོས་མོལ་དེས་ཕྱོགས་ཕན་ཚུན་བར་ཚོང་འབྲེལ་གནང་རྒྱུའི་གྲོས་མཐུན་ཞིག་དངོས་སུ་འཇོག་གནང་ཐུབ་པའི་རེ་བ་གནང་གི་ཡོད་པའི་གནས་ཚུལ་བཀོད་ཡོད་པརེད།