རྒྱ་ནག་གིས་ཐེ་ཝན་ལ་རང་བཙན་རྩོད་པ་ནི་དམག་འཁྲུག་སློང་བའི་བྱ་སྤྱོད་ཡིན་པའི་ཉེན་བརྡ་བཏང་འདུག

རྒྱ་ནག་གཞུང་གིས་ཐེ་ཝན་ལ་རང་བཙན་རྩོད་པ་ནི་དམག་འཁྲུག་སློང་བའི་བྱ་སྤྱོད་ཡིན་པའི་ཉེན་བརྡ་བཏང་འདུག
རྒྱ་ནག་གི་ཉེན་བརྡ་འདི་ནི་ཉེ་བའི་ཆར་རྒྱ་ནག་གིས་ཐེ་ཝན་གྱི་མཁའ་དབྱིངས་སུ་མཁའ་དམག་གནམ་གྲུ་འཕུར་བསྐྱོད་བྱེད་ཤུགས་ཆེ་རུ་བཏང་བའི་བྱ་སྤྱོད་ཀྱི་རྗེས་སུ་བྱུང་བ་ཞིག་ཡིན་ལ། དེ་བཞིན་ཨ་རིའི་སྲིད་འཛིན་གསར་པ་འཇོ་སྦཡེ་ཌེན་མཆོག་གིས་ཐེ་ཝན་སྲུང་སྐྱོབ་ཐད་འགྱུར་མེད་ཀྱི་རྒྱབ་སྐྱོར་མུ་མཐུད་དུ་ཡོད་པ་གསུངས་པའི་རྗེས་སུ་བྱུང་བ་ཞིག་ཡིན་པ་རེད། ཨ་རིའི་གཞུང་གིས་རྒྱ་ནག་གིས་ཐེ་ཝན་ལ་འདི་ལྟ་བུའི་ཉེན་བརྡ་གཏོང་བཞིན་པ་ནི་སྟབས་མི་ལེགས་པའི་རང་བཞིན་ཡིན་པར་མ་ཟད། མི་མཐུན་པའི་གནད་དོན་ཁག་གདོང་ཐུག་རང་བཞིན་ཅན་དུ་འགྱུར་མི་དགོས་པ་ཡིན་པ་བརྗོད་ཡོད་པ་རེད།
གནད་དོན་དབྱེ་ཞིབ་པ་ཚོས་ཐེ་ཝན་རང་བཙན་གྱི་ཕྱོགས་སུ་བསྐྱོད་ཤུགས་ཆེ་རུ་གཏོང་བཞིན་པ་ནི་ཐེ་ཝན་རང་བཙན་རྒྱལ་ཁབ་ཡིན་པ་གསལ་བསྒྲགས་བྱེད་པའི་གོམས་སྟབས་ཤིག་ཡིན་པར་རྒྱ་ནག་གི་ངོས་ནས་སེམས་འཚབ་བྱེད་བཞིན་ཡོད་པ་དང་། ཐེ་ཝན་ཐོག་འཇིགས་སྐུལ་གྱི་བྱ་སྤྱོད་ཆེ་རུ་གཏོང་བཞིན་པ་དེ་ཐེ་ཝན་གྱི་སྲིད་འཛིན་ཚཡི་ཡིང་ཝེན་ལ་ཐེ་ཝན་རང་བཙན་གསལ་བསྒྲགས་བྱས་ན་འཇུག་འབྲས་ངན་པ་འབྱུང་རྒྱུའི་སྔོན་བརྡ་བཏང་བ་ཞིག་ཡིན་པར་ཚོད་དཔག་བྱེད་བཞིན་ཡོད་པ་རེད།
གཟའ་ཕུར་བུའི་ཉིན་རྒྱ་ནག་བདེ་སྲུང་ལྷན་ཁང་གི་མགྲིན་ཚབ་པ་ཝུ་ཇིཡན་གྱིས། ཐེ་ཝན་ཐོག་དམག་དོན་གྱི་བྱ་འགུལ་བརྩམ་པ་དེ་དག་ནི་ཐེ་ཝན་མཚོ་འགག་ནང་བདེ་སྲུང་གི་གནས་ཚུལ་འབྱུང་བཞིན་པར་འགོག་ཐབས་ཆེད་དང་རྒྱ་ནག་རྒྱལ་ཁབ་ཀྱི་མངའ་དབང་གཅིག་གྱུར་དང་བདེ་འཇགས་སྲུང་སྐྱོབ་དགོས་ངེས་ཤིག་ཡིན་ལུགས་བརྗོད་འདུག་ལ། ད་དུང་ཁོ་པས་དམག་དོན་གྱི་བྱ་འགུལ་འདི་དག་ནི་ཕྱི་ཕྱོགས་ཀྱི་ཐེ་བྱུས་ཐོག་ནས་ཐེ་ཝན་རང་བཙན་རྩོད་ལེན་བྱེད་པོ་ཚོར་དུས་ཐོག་ལན་འདེབས་ཤིག་ཡིན། ང་ཚོས་ཁོང་ཚོར་མེ་དང་རྩེ་མོ་རྩེད་ན་རང་ཉིད་ཚིག་རྒྱུ་ཡིན་པ་དང་། ཐེ་ཝན་རང་བཙན་དང་དམག་འཁྲུག་དོན་གཅིག་ཡིན་པའི་ཉེན་བརྡ་གཏོང་རྒྱུ་ཡིན་ཞེས་བརྗོད་འདུག
དམངས་གཙོའི་ལམ་ལུགས་ཀྱི་སྒོ་ནས་འོས་འདེམས་བྱས་བའི་ཐའེ་ཝན་གྱི་སྲིད་འཛིན་ལྕམ་ཚེ་ཡེ་དབྱིངས་ཝན་ལགས་ཀྱིས། ཐེ་ཝན་དེ་བཞིན་རྒྱ་ནག་གི་སྤྱི་མཐུན་རྒྱལ་ཁབ་བམ་(Republic of China)ཞེས་གཞུང་འབྲེལ་གྱི་མིང་ཡོད་པའི་རང་བཙན་རྒྱལ་ཁབ་གཅིག་སྔོན་ཚུད་ནས་ཡིན་སྟབས། སླར་ཡང་རང་བཙན་གསལ་བསྒྲགས་མི་དགོས་པ་བརྗོད་བཞིན་ཡོད་པ་རེད།